展圖豬可能上報紙呀~~~~~

大前日媽媽上網突然見到有人急徵2-6個月既小朋友上報紙影相，做小小小model， 媽媽第一時間即刻同展圖豬報名，仲要好hard sell咁話俾人知展圖豬唔怕陌生人，仲要平日成日影相，唔怕閃燈~~~~~(媽媽諗起都覺得自己有少少唔知醜呢~~~~)

終於果日即刻有人回覆約展圖豬上去影相，原來要影相既係明報既親子版，因為當中要介紹一d bb既搖椅產品，所以需要搵小朋友去做demo影相~~~~~

今日下晝四點半媽媽同婆婆就帶左展圖豬去左柴灣明報果度影相，除左展圖豬以外仲有兩個小朋友，不過可能因為係下午時間，平時d小朋友多數瞓晏晝覺，所以另外兩個小朋友有dd扭計，其實媽媽都驚展圖豬會扭計，因為婆婆話佢今日成個上畫都無瞓過，不過好在我地響的士果陣，佢瞓左一陣。

到埋位影相三個小朋友都上晒搖椅，其中一個竟然即時瞓著左~~~~~(唔通張搖椅真係咁舒服？)另一個比較活潑，成日都想坐起身，因為坐唔到，又可能想瞓覺，又可能有dd肚餓，所以喊得好凄涼~~~~~展圖豬仲係做番自己，好鎮定咁周圍望~~~~~~

因為個bb喊得太可憐，可以唯有影在展圖同另一個bb先，諗住等bb冷靜少少再比佢影過，但係好可惜佢食野，都係喊呀~~~~~可能真係眼仔瞓！！！所以唯有skip左呢個bb~~~~而展圖又因為明報既姐姐見到展圖著左件外套好似唔同左，就叫展圖豬瞓埋另一張搖椅影相，實行一人分飾兩角，不過因為展圖對襪太醒目，所以姐姐要除左佢(媽媽即時覺得好唔整齊呀~~~~平時展圖豬落街，媽媽都一定同佢著對襪，費事赤腳落街咁肉酸~~~~~)不過明報姐姐話咁又無辦法啦~~~~跟住影多幾張就走得，前後都唔駛一個鐘~~~~~~好快手.......不過媽媽睇過個studio即時覺得爸爸打燈pro好多，原來報紙影野，都只係兩支打背景，加一枝燈直打，好簡單，唔怪得知爸爸成日都認叻，話d人唔識打燈，淨係打世界光，我仲成日諗唔知爸爸係咪蝦我唔識野添~~~~~依家先知唔係~~~~~~

係啦走之前我問明報位姐姐佢話份稿會響1月6號出街，大家有興趣既話買黎睇下啦~~~~~不過我唔敢保証真係會見到展圖豬/佢張相得丁咁大粒~~~~~~！

Venture睇相+遲來的聖誕大餐+boxing day

今日下晝係去venture睇相既日子，不過因為時間又係好緊迫，所以我地遲到左40mins，即係淨番20mins俾我地睇相同揀相，去到首先佢俾個slideshow我地睇左先，睇slide覺得影得幾好，睇完之後佢地就逐張show俾我地揀，因為之前我同爸爸有左共識，如果佢地比我地淨係order 3個blocks既話，我地就揀3張(1張展圖豬、1張我同爸爸、1張全家福)，如果唔係既話我地淨係要1張全家福，因為爸爸覺得淨係展圖豬既話我地隨時都影到，咁佢show果陣話唔可以order 3個blocks only，所以我同爸爸同集中揀全家福，一開始我地已經揀淨5幅(唔好懷疑，因為爸爸同媽媽揀相一向好挑剔，我地既挑剔情度唔可以同常人比較)，跟住compare幾張相，就好容易就揀到心水相，然後就係加錢upgrade揀框(因為之前package係唔俾揀框，而且無執相)，之後就係開單俾錢就走得，可能我地過程好快，所以準時20mins後走人。其實平心而論venture d相係影得幾好，如果爸爸唔係做開攝影(而且我覺得爸爸都叫影得好唔錯)，多數會失手啦~~~~~！不過venture既價錢真係幾貴，只要係係order佢其他野，而唔係promotion入面既坐枱相，一定過萬，呢個價錢唔係人人捨得~~~~不過媽媽有個諗法就係一年join佢一次promotion影全家福都可能ok wor，因為venture影d野係動感d，自己無可能影到呀~~~~

之後我地就去左times square影相啦~~~~~因為近呀麻，影左一陣就返屋企

展圖豬呢張個表情好奇怪~~~~~~

上面呢三張係媽媽影既~~~~~

比朋友投訴無全家福~~~~~加番張啦！
另外今日爸爸終於放假啦，所以媽媽決定今日整聖誕大餐~~~~無錯呀，同往年一樣都係自己整，不過今年因為二叔佢地唔喺度，所以只係我地一家幾口慶祝啦！今年整d野好簡單，差唔多唔駛點煮，因為上年婆婆見我整左好鬼耐叫我是但d喎~~~~！好寫低菜單先：

1.)麵包(牛油+basil leaves)
2.)雜菜 + 醋油
3.)鹽燒雞肉串(灯灯野)
4.)牛蒡牛肉卷(灯灯野)
5.)長腳蟹(即食)
6.)蕃茄濃湯(即煮即食)
7.)煙火雞肉(即食)
8.)牛扒
9.)青椒意粉(用意粉醬)

係咪好簡單易整~~~~呢！仲要婆婆一早同我切晒d野，所以我前後響廚房逗留都無一個鐘~~~~超慳水慳力！本來媽媽諗住買個蛋糕，或者好似以前咁焗個麵包布甸，不過好在無咋，因為都食唔晒！

呢d就係我地既聖誕大餐啦~~~~~！左上角有我既靚女model bb陪襯！

Venture體驗第二彈+忙到死

呢幾日好忙，為左想將手頭d野俾d客，所以連續幾日都係瞓得幾個鐘~~~~~就死啦！

下畫係我地去venture補影既日子，因為展圖豬食飽奶又睡眼充足，所以好合作，好肯笑，而我同爸爸當然亦都係合作既人，所以我覺得d相應該會影得唔錯~~~~！佢用既方法，我覺得就係平時爸爸影外影咁羅，無咩分別，唯一既分別係室內同室外~~~~

影完之後爸爸又要返studio做野，而我就仲有少少手尾要執，先返屋企放低展圖豬，再落工場，攞番d客d野，響工場因為又有其他要搞都搞左我幾個鐘好耐，然後去studio搵爸爸，之後我地先同二叔食飯~~~~然後先返屋企~~~~~~~！

今年最後一次聖誕party

今日係展圖豬第3次參加聖誕party啦，今次爸爸終於可以出席到啦！今次既搞手係bk0707既媽媽，要多謝佢既付出呢~~~~~因為媽媽都知道搞個party要晒好多時間！

今日既party地點係尖沙咀，時間係點半鐘開始，由於爸爸上晝都有野做，所以我地唯有響尖沙咀度join埋一齊，因為呢個party係tea，所以事前同爸爸食定少少野打下底先，然後我地地就向party場地進發啦！去到場地已經有好幾個bb同佢地既爸爸媽媽到左啦！媽媽自然係同下計啦~~~~後到齊人之後就食下野傾下計咁，節目有大抽獎、交換禮物、影大合照.......

到下左晝四點幾之後媽媽同爸爸就走左lu，因為我地仲有下一站「海港城」，去海港城之前少不免要去下starbuck~~~~休息一陣，大約六點左右我地就先去海旁影相、跟住就係海港城，其實媽媽同爸爸由拍拖同結婚咁多年都未影過燈飾嫁，因為不嬲覺得好無聊，但係為左展圖豬大個有多d快樂既回憶(雖然都未必記得)，點都要去下嫁!點知去海港城影下影竟然俾媽媽發現到一個好高大，但行路「on」居居既人，呢個就係二叔啦，仲有碧鳳姐姐啦~~~~咁當然又係大家影下相，之後就諗住返屋企。

途中經過半島酒店，媽媽見到佢地每年既星星燈飾又話要同你影下，之後諗住入去買d朱古力咁，點知今日晏左dd，收左舖lu，咁當然順便去洗手間，到左2樓發覺佢地今年既佈置都幾靚，又影左幾張，之後就真係番屋企lu~~~~

今日展圖豬全日都好乖，眼瞓就瞓，見人就笑，飲奶又快，好可愛，果然係媽媽既寶貝豬呀！

同聖誕禮物影相

因為展圖豬今年到到好多禮物，雖然然該仲有得收，不過媽媽好心急話要展圖豬同d禮物影相~~~~~

媽媽先用d禮物圍住展圖豬，影相途中展圖豬對包禮物d玻璃紙好有興趣，一路抆一路有「查查」聲，展圖豬就笑到咭咭聲，估唔到展圖豬反而最鍾意玩玻璃紙。

Venture體驗

今日媽媽、爸爸同展圖豬約左去venture度影相，係呀大家無睇錯我地係俾錢出去搵人影相，因為爸爸成日都話，就算自己識影相，都係要搵人影啦，唔通成日自拍咩~~~~~所以爸爸一早響我生左展圖豬幾日後，因為媽媽拜託爸爸幫手去bb展買d野，就順手join埋venture，當係俾展圖豬既禮物，當然順便睇下人地點解可以收得咁貴啦！

之但係今日由下晝開始，展圖豬已經瞓唔到覺，媽媽已經心感大事不妙，點知~~~~~真係出左事！平時唔扭計既展圖豬，今日一下到無耐已經狂喊，喊到抱佢tum佢都唔掂，不過都去到左唯有係咁意影下，之但係真係唔得，最後攝影師提議比佢休息一下，一坐低無耐展圖豬就瞓左啦~~~~~~10min後攝影師返黎，諗住影番，點知展圖豬一醒左就即喊啦~~~~~~~無奈之下唯有收工，不過venture佢地都好好，同我地book番24號補影(呢樣抵讚！)我諗我地studio都要呢，不過到時可以photo session唔可以依家咁長，1hr會ok d！

之後就唯有返屋企啦~~~~~~我地搭車返去時，展圖豬已經熟睡啦！

今日展圖豬去覆疹+打針

尋日媽媽返到屋企超攰，仲搞到頭痛，所以一早就瞓左，夜晚由婆婆照顧你，今朝因為你要去曾醫生度覆疹，睇下d濕疹，醫生話你d濕疹好左好多，我呢個問題媽媽當然又有野要問醫生，今次就係問下醫生同你轉低敏奶粉/羊奶粉會唔會改善到你既濕疹皮膚，醫生話其實個個bb都唔同，而且因為你太細個唔可以做皮膚點刺測試，所以如果轉奶粉都未必可以改善到，不過可以試下。

睇完曾醫生，就到去樓下高醫生度打針，今次你打針都好叻，第一針直程無喊，係第二針先喊幾聲，之後食埋輪狀就走得啦！

今日係展圖豬既第二個聖誕party

尋日可能真係玩得太攰，展圖豬好好訓，之後婆婆先媽媽都好攰咁，都叫媽媽早d訓，就係咁媽媽做完d野(都到夜晚兩點)就去左瞓，一瞓就瞓到第二日既點幾鐘，之後我地一家幾口就去左樓下食少少野，諗住同你去四姨婆屋企參加你既第二個聖誕party，點知爸爸竟然話好攰，唔去四姨婆度，要去尖沙咀按摩真係抵打！

咁媽媽唯有同婆婆兩個人同你一齊入去馬鞍山，去到你既進培表哥超興奮，不停要俾玩具你玩，仲話要教壞你，瑋軒表哥就話，要睇住進培唔可以教壞你，真係勁搞笑！

不過可惜因為爸爸無黎到，所以無影到相，而你又可以太攰，之前果日未回到氣，所以到左夜晚都有少少扭眼瞓，但係都好在無狂喊~~~~~

我地六點鐘左右已經開始大食會~~~不過無你份，你淨係可以食奶咋！食到六點幾已經個個好好飽，之後就係小朋友既收禮物時間，嘩！你竟然五份禮物咁多，有d仲係一份禮物入面有好幾份，再加埋早尋日果兩份禮物，同媽媽同婆婆買俾你果兩份，即係你最少有九份禮物，展圖豬今年真係大豐收。

今日係展圖豬人生第一個聖誕party

今日係展圖豬人生第一個聖誕party，亦都係媽媽第一個搞既bb party，感想係好攰呀！仲有就係套用爸爸講既一句，媽媽又「賴」左啦！

因為朝早要返舖頭見客所以搞到時間好迫，趕到死死下，所以樣樣都爭咁d~~~~~

其實今日我因為唔夠時間做野，所以party上面都唔得閒理展圖豬，完全由婆婆take care，對唔住呀~~~~最多下個星期個party媽媽全程take care番你，你大個唔好嬲媽媽~~~~~

不過雖然d bb仲係細其實無咩可以參與到個party，但係我發覺展圖豬都攰嫁，走果陣一上到的士，見展圖豬想瞓咁俾個奶咀佢，佢啜左唔夠一分鐘，就已經瞓著左！但係展圖豬你聽日仲要去姨婆屋企開party，好多哥哥想要睇你，佢地話個個都唔黎都唔緊要，最緊要係你黎，自從展圖豬出世之後，媽媽既受歡迎程度已經插水式下跌，睇黎已經跌至負level。

不過今日party好好彩呀，本來媽媽負責抽獎環節，抽到最尾兩份禮物，媽媽講笑話點解無我地份，結果就抽中左啦！雖然唔係大獎，但係都好開心，由其是之前婆婆已經買左一份同大獎差不多既玩具俾展圖豬，如果抽到真係唔知點算好！仲有就係之前媽媽睇敏兒姨姨個blog見到佢話買左套combi餐具黎做交換禮物，果陣媽媽已媽諗如果係我地交換到就好啦！事關媽媽仲未買餐具俾展圖豬，結果真係係lucky交換到呢！睇黎展圖豬都係一個lucky boy :p

完左個party搭的士返到屋企已經成七點，即刻叫番個外賣，因為無咩食過野，不過好在媽媽都食左一件朱古力蛋糕，好好味呀！

展圖豬咭咭笑

今日展圖豬唔知因為咩事，夜晚婆婆同展圖浸完浴，叫媽媽入黎同展圖搽藥糕，唔知做咩，展圖豬突然間對住媽媽咭咭笑，不過之後又無喎，唔知展圖豬會成日咭咭笑呢？

仲有尋晚係展圖豬第一次正式剪頭髮，個髮型師係邊個？咪係媽媽羅，媽媽吼夜晚展圖豬瞓著時，淨雞雞同佢剪左兩面既頭髮，等佢星期六同日去聖誕party可以靚仔d！

展圖豬今日上堂好眼瞓呀

今日同展圖豬返kinderu，展圖豬真係好眼瞓，落堂前會有一個section係休息時間，會熄左燈，放d輕音樂，展圖豬就即刻瞓著左，ms. hidly見到都笑。上完堂之後，原來婆婆黎左銅鑼灣，因為佢知道媽媽今日要去玩具反斗城買聖誕禮物比四姨婆既孫。婆婆同媽媽食先飯先，然後去買玩具，媽媽買左幾樣科學玩具俾佢地，唔知佢地會唔會鍾意呢？

展圖豬濕疹又發作啦~~~

唔知呢幾日係咪真係太乾呢？(但係其實媽媽已經日日開住部放濕機)展圖豬本來濕疹已經好得七七八八，但係今朝發覺佢塊面同個身又突然好紅，所以知道濕疹又番發，急急就同展圖豬去曾醫生道睇，好在去左，原來曾醫生聽日就要去西安開會，可能要幾日先返到黎香港，如果唔係展圖豬就慘慘啦！因為婆婆同媽媽同發覺展圖豬d濕疹都應該既痕，因為佢已經識得用隻手掃下掃下個身。醫生雖然無話話展圖豬今次濕疹緊要左，但係見佢藥水都開多隻，媽媽諗可能今次展圖豬d濕疹都幾厲害。

今日展圖豬又識新朋友啦！

今日又有三個小朋友黎studio影相，展圖豬當然係當仁不讓做我地既PR大使，三個小朋友影相期間，展圖豬都好乖，一d都無扭計，果然係媽媽既寶貝豬！

今日展圖豬去東山試堂

今日係媽媽同展圖豬報左東山試堂既日子，點解媽媽會試東山呢，一來之前響kinderu試堂時，同另一個媽媽傾計，佢話佢試過東山幾好，二來東山響將軍澳有分校，三來就係有一位bk既媽媽俾左一張東山既免費試堂卷我，又唔駛錢，又近，又有人話好，咁媽媽哽係帶埋展圖豬去試下~~~~~~

不過東山果邊話如果試堂既話就只可以試french或者spanish，因為spanish既用途比較廣泛，所以媽媽就揀左spanish，上堂既感覺都ok，老師好有心機，學野都多，依家仲要做推廣，比5個月錢free一個月，每星期上2堂，即係一次過比$11000讀半年，如果媽媽搵番之前比coupon果位媽媽，仲可以大家都平$1000，搞到媽媽心郁郁，諗住同展圖豬上東山，唔去kinderu。

p.s 不過幾日後媽媽就已經決定唔同展圖豬上東山，因為原來之前東山請過一位無工作証既外藉老師，所以依家老闆俾人告緊，媽媽怕東山突然執笠，所以決定都係唔報啦！

展圖豬咳呀！(續)

唔知係咪真係好似婆婆講咁，展圖豬食完藥水，尋晚同今朝好似咳得利害左，婆婆話有d藥係會等咳起佢，不過好在到夜晚已經好左好多好多！不過唔知係咪因為食左藥既關係，展圖豬全日都不停係咁訓，而因為展圖豬病左無咩精神，媽媽呢兩日都無心機同佢玩flash咭，希望展圖豬快d好番啦！聽日展圖豬又要返學啦！希望佢唔會因為返學又咳得利害左~~~~~

展圖豬咳呀！

其實展圖豬尋日已經好似有兩聲咳，不過因為隔得太疏，所以媽媽都唔太肯定，今日見佢又係咁，所以帶左佢出高醫生度睇，入到診所睇醫生果陣，展圖豬不停咁同高醫生笑，高醫生都話佢笑得好開心，不過同佢照鼻時，竟然照到有一大舊鼻屎響個鼻入面，高醫生仲要比媽媽睇，媽媽真係覺得好失禮，之後展圖豬仲要放一個好大既響屁~~~~~~~真係好唔好意思呀！

返到屋企同婆婆傾，我地估，可能展圖係早兩日返學果陣唔小心感染到病菌，因為果日d班真係好密，一班接一班，d玩具又可能會同一時間幾班共用，中間無時間清潔消毒，所以好大機會係咁中招。不過好在媽媽同展圖豬都係報左平日最早果班，正常d野消毒清潔都係收工後，就算唔係過左一晚d菌都死得七七八八，媽媽唔想展圖因為返學咁辛苦呢！

今日係展圖豬第一次返學既大日子

今日又係好忙既日子，事關展圖豬要返學呀！今日晏晝食完飯，媽媽就預備帶展圖豬去kinderu返學，今次因為係試堂，所以可以有兩個家長陪住展圖豬上堂，一位當然係媽媽啦！第二位就係婆婆啦！

去到銅鑼灣，因為係星期六，真係超超超迫人，媽媽幾經艱苦，先至將展圖豬由sogo果度帶到去利園果度。一去到，其實個course已經開始左，媽媽啦啦聲同展圖豬埋位，原來展圖豬係最細既一個，大d果位小朋友有5個幾月，首先係「馬殺雞」熱下身先，之後就開始玩flash card，有英文咭、百科咭、dot dot card，今日既課題係kitchenware，之後仲有玩樂器，做運動，講故事，唱歌仔，我覺得位老師都教得幾好，可以draw到小朋友既attention。

展圖豬上堂都好合作，好乖，係淨係唔望老師，只係八掛望住其他小朋友羅，仲要食手添，媽媽都無乎，係到最後果幾分鐘好似有少少不耐煩(唔知關唔關肚餓事呢？)。之後媽媽去左報名，因為媽媽真係怕左星期六迫人，所以同展圖豬報左平日既上午班，而婆婆就餵展圖豬食奶，然後我地就返屋企。咁樣出去，又搞左成四個鐘lu！

返到屋企之後一陣，媽媽就同爸爸出街拍拖睇戲lu！(展圖豬唔好意思啦，無預你！)去到首先食d野先啦！媽媽為求快d可以行街，所以決定食mos burger，可以一路行一路食，因為mos burger響溜冰場隔離，而個場啱啱打緊冰上曲棍球，我就同爸爸講話第日展圖豬大個我要比佢學，爸爸都話好，因為好型！之後我地買左杯starbuck，啱啱starbuck果位姐姐promote我地用佢既starbuck card(其實之前我都買過，不過覺得同用現金買無分別)爸爸話都好啦買左張，結果原來今次christmas 買starbuck咭會送小手套一隻，我見得意就要爸爸買多張，湊成一對要俾展圖豬戴黎影相，之後我地就係去imax睇下所謂既3d電影啦！媽媽n年前去disneyland睇過一次，覺得好真，不過今次睇，覺得d人有d似紙板人一層層咁，爸爸就話唔覺，不過話d人好似好膠感，好似電腦動畫咁。

睇完戲之後，我地就坐shuttle bus返觀塘，爸爸話想食譚仔米線，咁我地就去買外賣，但係竟然發生超級驚嚇事件，話說我地響路邊等緊外賣，竟然唔知邊度衝左隻老鼠出黎，當街當巷，燈光火著，旁若無人咁走黎走去，嚇到我同爸爸走左出馬路，d人都竟然可以當無事發生，期間仲要有個人走去踢左隻老鼠一腳，爸爸一拎左外賣，我地即刻，好快咁急步走啦！嚇死媽媽~~~~~

本來應該係爬既，不過展圖豬仲未識爬呀！

練平衡

今日做左超多野

嘩今日媽媽同展圖豬好好忙呀，今朝媽媽餵完展圖豬11點果餐奶，就可開執野準備出街，開始今日既大作戰！

首先第一站展圖豬同媽媽去左BK0708媽媽將會搞CHRISTMAS PARTY既CAFE去睇場先，途中婆婆黎會合我地，去到CAFE覺得個場都OK，好開揚，都幾光猛，感覺幾舒服，而且有好多梳化添! 第一件事，緊件叫野食食番個LUNCH睇下D野OK唔OK先啦！媽媽分別叫左一個魚飯同一個有機蕃茄意粉。頭盤先黎個沙律先，一般野，野菜+千島醬，無難度，食到一半個飯同意粉都黎左，都OK好食，之後再叫左杯野飲，媽媽叫左杯薄荷咖啡，婆婆叫左杯紅莓汁，都幾好，埋單$90，呢餐值80分。食完之後順便搵負責人落埋D訂就走LU！要去第二站！

第二站係去荃灣，先前媽媽上網同人買2張IMAX既戲票，超抵$140/2張，約左今日交收，所以要去攞，攞完之後又要去第三站LU！

第三站係去長沙灣，因為之前BK有人話長沙灣有玩具開倉，所以帶埋展圖豬去買玩具，雖然入面唔係好多玩具，但係有D媽媽好鍾意，而且係媽媽鍾意既牌子FISHER PRICE，仲要係比起平時半價左右咋！所以超抵！因為媽媽早前都已經想買個BABY GYM俾展圖豬玩，本來媽媽諗住買個跳跳虎俾展圖豬，之但係想俾錢果陣見到有個仲平仲好既所以就改買左果個，婆婆見到D玩具咁平仲忍唔住手ORDER左兩件，一件件搖控POOH，只要一搖個搖鈴，隻POOH就識唱歌同周圍行，另一件就係廚房，呢件野真係超大件，同好好好抵，不過要展圖豬歲幾先可以玩，但係婆婆話咁抵要買喎，所以就買左啦！之後婆婆仲埋晒呢張單，盛惠$580-，展圖豬婆婆咁鍚你，你大個一定要好好孝順婆婆呀!其實我買果幾件野都超大舊，不過見真係好平，所以順便買埋1512PART既禮物，終於係多到攞唔晒，要麻煩佢地個STAFF幫我地拎落樓下。

返到屋企已經係五點半展圖豬已經超攰，不過媽媽仲要返舖頭，一出門口，已經聽到展圖豬喊到拆天~~~~陰公！

展圖豬玩baby gym 1

展圖豬玩baby gym 2

當當訂d書黎左lu

大半個月前響當當度訂左一D有關小朋友既教育書同故事書，今日終於黎到LU!好開心呀，等左好耐啦！

雖然呢D書話多唔多，但係都成二十幾本，好在昨日所有漫畫都賣左出去，即時俾人收走左，如果唔係又係唔知放邊LU！

好啦D故事書黎左，終於可以實行媽媽既講故事計劃，媽媽諗住每晚等展圖豬飲埋最後一餐奶就講故事TUM佢訓 (雖然平時唔駛TUM)，不過媽媽希望佢每晚可以訓得甜D，同大個有好既童年回憶嘛！

flash字咭送到啦+媽媽為左展圖豬賣晒d漫畫

早幾日媽媽幫展圖訂既flash字咭今日終於收到貨啦!媽媽又要開工寫字咭啦！雖然媽媽覺得自己都唔係訂左好多(都係二千張左右)但係都幾多野嫁！見到呢一堆字咭，媽媽即時好煩惱唔知放響邊，仲要遲d當當會送一批媽媽早前訂左既育兒書同教學書，都唔知點搞好！

終於因為以上呢d野，媽媽的起心肝搵人收左珍藏左成十幾年既漫畫(由最舊果本計)，因為媽媽都係心急人，即刻四圍search上邊度可以收書，終於都好在搵到一間，不過呢四百幾本書只係賣左四百蚊，不過為左放展圖豬d野都無辦法啦！媽媽都要再執下間屋，掉左d無謂野，俾多d位放展圖豬d野啦！

夜晚食飯果陣，爸爸發覺展圖豬會用BU口水引人注意，我地一唔望佢，唔同佢傾計，佢就會BU口水，跟住我地同佢抺口水/講野/望佢，佢即時笑得好開心，就係咁展圖豬響我地食飯時玩左我地成半個鐘！

p.s. 其實媽媽都幾唔捨得d漫畫嫁！展圖豬大個買番俾媽媽好唔好呀？

不過今日同琴日唔知點解，展圖豬心情好似好一般，笑得小左...........

展圖無得去澳門呀！

今日媽媽響網上買左四套好平既澳門船票，諗住可以遲d無咁忙可以同爸爸、婆婆(因為之前講過佢好多年無去過澳門話好想去！)、五姨媽(因為佢送過好多野俾展圖豬唔好意思)、同埋展圖豬去一次澳門，本來爸爸都讚成嫁，不過後來婆婆提議話可以分兩批去，大家都可以放下假，又可以玩得開心d，展圖豬就留響香港，跟住爸爸就話，都好嫁一歲前都係唔好亂咁去第二度，就係咁媽媽想帶展圖豬去旅行既念頭又再一次俾人打消左啦！

今日媽媽終於過晒數買flash咭做中文咭、英文咭同百科咭，原來香港都有得訂，早知媽媽唔駛山長水遠去大陸訂番黎，d咭如果黎左既話展圖豬就要開始學認字啦！唔知咁多野做媽媽做唔做得切呢？

展圖豬第二次笑到咭咭聲，雖然唔係好勁，但係媽媽已經好開心啦！

小朋友今日第一次笑到咭咭聲+第5日玩flash咭

今晚係展圖豬第一次笑到咭咭聲，事緣今晚媽媽抱住展圖豬，婆婆就同展圖豬玩「嗚唧」 - 唔見左遊戲。展圖豬玩得超開心，仲要突然間笑到咭咭聲，好得意呀！

另外今日係flash card第5日到左夜晚玩最後一次果陣，本來媽媽見展圖豬呆呆地仲諗同唔同佢玩，後來諗下都係玩啦！結果一拎左出黎同展圖豬玩，佢就即時笑得好開心，原來大人同小朋友玩既定義係唔同嫁。

第四日玩flash咭+去睇醫生

今日展圖豬去左醫生度覆診(濕疹)，媽媽同佢著左件鹿仔衫，護士姐姐見到好鍾意，話展圖豬好可愛，媽媽即刻勁開心。醫生話展圖豬既濕疹好左好多(哽係啦日日要浸2次浴做spa喎)，浸浴可以減番做一次，仲讚媽媽湊你湊得好(其實醫生究竟係點判斷既呢？媽媽有時會好懷疑係咪客氣說話......)如果覺得有需要既話一個月後再覆診。

媽媽問醫生有無咩方法可以減少濕疹復發，佢話都有，不過會麻煩，後來原來係要搵出致敏原同介口(不過你淨係食奶，仲可以介咩口？)

返到屋企媽媽又要出門口啦，呢排真係好忙好忙，不過如果唔忙既話即係舖頭無生意，希望遲d媽媽可以train到d人幫輕下啦！

今日媽媽同你玩flash card你好開心呀，唔知你係咪真係識呢？另外媽媽都開始留意身邊既野，有無o岩你可以做百科flash card呢樣媽媽覺得係flash card之中最難做既一種，但係媽媽唔想你淨係識睇字讀書計數，希望你第二時既知識真係可以做到博大精深，所以媽媽都要勤力d睇多d書，希望可以教好你呢！

今晚夜晚媽媽同你玩時，你笑得好開心，叫得好大聲，原來你真係識嫁，而且婆婆仲話你知道有奶樽係要食奶奶，因為今日婆婆攞個奶樽出黎，但係未比你食住，你不停叫呀！

展圖豬既食手相(電話真係影得好濛......)

展圖豬既食手video

第一日玩flash card

尋日收到做dot card既物料，開始著手整flash card俾展圖豬，今日開始玩，可能因為o岩o岩開始，所以展圖豬好始唔係好明咁，不過唔緊要啦!我都唔期望你好快識晒，媽媽會俾多d耐性去教你，希望可以教識展圖豬啦！

今日展圖豬100日啦！

今日展圖豬100日啦!晏晝時間我首先出左去太子攞番張錶左，前排幫展圖豬繡果幅十字繡，之後同爸爸去左旺角既kinderu聽個seminar，聽完之後我發覺其實佢地既理念都係抄杜曼既理論，不過同爸爸商量後都係決定報名，因為可以俾人教下睇下人地會唔會教得好d。

聽完seminar之後當然係報trial course，然後就係同爺爺、嫲嫲、婆婆、二叔、二叔女友一齊食飯，地點又係旺角金龍船，貪近阿嘛~~~~食完飯，爸爸抱下展圖豬，今日展圖豬學識同人玩厘埋，好可愛喔！

食完飯之後當然係返屋企啦！然後我地就同展圖豬整手腳印，不過因為展圖豬未瞓著，所以結果係失敗左，但係唔緊要啦!呢個手腳印雖然整得唔好，但係始終係爸爸、媽媽同婆婆親手幫展圖豬整嫁！

呢塊板本來係媽媽諗住教展圖豬識字，後來有一日媽媽寫左媽媽love展圖，跟住婆婆睇到又加左字，爸爸見到話點解無佢份，又加埋佢，最後係二叔黎到寫埋佢果份，就完成左呢幅野啦！

展圖豬同人玩厘埋

展圖豬張皇帝椅黎左啦！

響上個星期因為媽媽發覺展圖豬開始鐘意睇電視同周圍望，因為媽媽有時要響屋企做野，而婆婆同媽媽亦都抱展圖豬抱到手痛，再加上之前朋友送果張highchair無安全帶，媽媽想展圖豬坐得舒服d又安全d，所以上個星期日就同婆婆去左將軍澳babyclub果度訂左張aprica既highchair，盛惠$1550-(已經揀最普通果隻)，媽媽當堂覺得自己窮晒，唔好懷疑，媽媽呢排真係買買埋埋好多野比展圖豬，份收入全部比晒佢，所以依家媽媽真係窮到loan。

今日張highchair送左黎，媽媽即時拆開比展圖豬試下，一試之下展圖豬真係好似坐得好舒服，坐坐下響度睇電視就瞓著左，仲要係好諗果隻，媽媽即時覺得咩都抵番。

二叔睇到張highchair覺得佢搖椅果part好好玩，而爸爸就話呢張係展圖豬既皇帝椅。

有左呢張highchair，睇黎媽媽可以攞d 迪士尼美語比展圖豬睇下啦!不過有人話咁細既小朋友睇小小愛因斯坦好d，媽媽仲諗緊買唔買.......

展圖豬今日三個月啦

展圖豬今日三個月生日啦，仲有7日就到100日啦！今日佢仲要有史以來第一次一條氣飲晒成支奶，然後再好乖咁一掃風就aur左，好叻仔！

不經不覺己經湊左展圖豬三個月，原來只係三個月咋!唔知點解好似好耐咁，但係媽媽所覺既耐唔係「度日如年」而係日日都好開心，包括埋生完果時傷口痛到死死下果個幾月。

日日咁對住展圖豬媽媽覺得展圖豬越黎越可愛，媽媽未生展圖豬前從來未咁鍾意過bb，以前見到人地d bb可能都係例行公事咁讚下人地既bb可愛，但係生左展圖豬之後，唔單止覺得展圖豬好可愛，連帶人地既bb都覺得好可愛，唔知呢個係咩心情呢？

抬頭的先兆？

今日夜晚媽媽發覺展圖豬瞓覺果時會將雙手放響胸前玩手指，之前睇babymo話過咁係小朋友開始既抬頭既先兆之一，唔知展圖豬幾時識抬頭呢？媽媽真係好期待。

又，果日媽媽同婆婆講有d 07年8月既媽媽佢地既小朋友都識轉轉地身，唔知展圖豬幾時會識呢？因為佢到依家都無咩學轉身既跡象，不過唔緊要啦，小朋友總會學識，就算比人慢d遲d又點，最緊要展圖豬健康，媽媽細個都係10個月先識轉身之麻，依家咪又會行會走。

又有其他小朋友黎影相啦！仲有展圖豬既相！快d黎睇啦！

尋日bk有兩個0708媽媽同埋佢地既老公+小朋友上黎我地個studio影相，小展圖好乖呀！一d都無喊，係夠時間食奶果陣喊左唔夠一分鐘，好抵錫！

影相途中展圖豬當然有插隊又要影番兩張啦！不過中間有一張瞓響毛巾上面影，小展圖look左落黎，個頭叩左落塊阿加力膠板一下，即刻喊呀，個高度都有成25cm，對於bb黎講都高嫁，不過好在小展圖都好叻，喊左唔夠一分鐘就收左聲無事，不過媽媽同爸爸都好肉赤呀！

今次一期影左5個鐘左右，因為有兩個bb反而好，一個喊就另一個影，一個換衫又到另一個，食奶又係咁，所以影一個同兩個既時間反而又唔係多好多。

爸爸呢排好忙，當然未有時間執展圖d相，不過媽媽都想比大家睇下，所以係咁依執少少俾你地睇下先啦！


幾個響雲上面既小天使！


展圖豬幾淡定？！


咁細個就有兩美相伴，展圖豬幾有艷福！！！


可愛嗎？


展圖豬有時會大細眼嫁！


咕咕唔可以俾人睇嫁！


展圖豬已經學緊抬頭啦！


展圖豬係我地一家既小天使！


咁~~~~~~~~高~~~嚇唔嚇人呀！

今日媽媽接番小狗bb番屋企啦！

今日媽媽接番bb番屋企啦，bb佢響vet度唔知係咪因為吊左兩日鹽水，休息夠，所以去接佢果時勁有精神，媽媽見到都鬆一口氣，好在bb無事，如果唔係真係勁擔心+勁傷心！

今日晚飯媽媽、爸爸、婆婆、展圖仲有爺爺同嫲嫲一齊去左觀塘一間齋舖食飯，食飯果陣爸爸話俾爺爺聽小展圖好多野講，爺爺笑話緊係啦，展圖個圖字有成四個口，再加埋佢自己果個，唔多咀就奇啦！

好擔心

好擔心BIBE(我隻狗仔)，事源小朋友自從出左世之後，有一日我地帶BB去左一間未試過既舖頭沖涼剪毛之後，佢就嘔左一日，之後我地同佢睇左3次醫生，最初果次醫生診斷佢係胃潰瘍，過左成兩個月佢都要不斷食藥，食一D腸胃敏感既犬糧，一直都無咩精神。直到尋日佢朝早一D野都唔肯食，下晝突然一小時內疴左四次，大便仲要有血，跟住仲要嘔左超大灘既黃色水。果刻我同婆婆即刻好擔心，即時帶佢去左獸醫度睇，醫生同佢驗血，照X-RAY，結果係話BB有出血性腸炎，而且因為腸炎既問題消化系統好差，飲左水同食左既野都消化唔到，所以已經脫水，即時要吊鹽水同留醫兩日。見到佢咁辛苦真係好心UP。返到屋企我即刻上網查下呢個病，原來呢種病對狗隻係有高度傳染性，如果無打防疫針既話，死亡率高達九成。因為我地一向好少帶BB落街，所以推算番，應該係果次沖涼間舖頭唔乾淨，即時覺得BB病得好唔抵。

不過婆婆返黎時跌左個電話，仲係要新出左俾佢唔夠一個月，不過都無所謂，只要BB快D好番就好啦！

今日寵物診所既姑娘打黎俾我，話BB既精神都OK，不過仲吊緊鹽水，聽日會俾小小狗糧佢食，睇下O唔OK，希望BB快D可以好番！

另外因為婆婆唔見電話既關係，爸爸、媽媽同婆婆計劃出3G，因為咁樣就算唔響小朋友身邊都可以見到佢呢！

小朋友戒左夜奶啦！

本來媽媽無諗住咁早同小朋友戒夜奶，因為之前媽媽聽過人地講小朋友最好三、四個月戒夜奶好D。點知上個星期一連三日小朋友竟然連續三晚夜晚無起身要食奶，到第四日又開始喊想要食夜奶，媽媽心諗，佢自己連續三日唔食，都介左一半，無理有唔介埋佢，所以就攞個奶咀呃佢，點知佢一食奶咀又OK唔喊，如事者過左幾日，小朋友依家終於一覺訓到大天光，唔駛再食夜奶LU!我地全家人都終於有覺好瞓LU！

依家佢每日既PATTERN係

7:00AM起身飲奶然後瞓覺

11:AM起身飲奶然後玩

3:00PM飲奶後瞓半小時覺，再玩一陣，6-7點左右瞓半小時覺

7:00PM飲奶，然後開始扭計，10點左右會瞓著

11:00PM飲奶然後就瞓覺覺

潮州凍魚&潮州凍蟹

今日媽媽第一次整潮州凍魚&潮州凍蟹，成功左啦！事源媽媽不嬲好鍾意食打冷既大眼雞，而爸爸又成日話想食潮州舖既凍蟹，不過自從小展圖出世之後我地都好少出街食飯(以前大部份都係出街食)，因為媽媽話想要適應一下響屋企煮飯，第日小展圖開始食大人野無理由要佢食街d味精野，爸爸聽左都同意。果日我問過爸爸好唔好食，需然佢話一般，但係果日我地整左四碟餸，潮州凍魚、潮濕凍蟹、南乳煮齋&煎豬扒，但係爸爸猛咁夾魚食，我諗都佢都覺得OK好食，我自己就覺得同街既差不多。而蟹就因為爸爸太懶，唯我我拆肉俾佢食，點知俾我發覺婆婆又唔食蟹，原來佢又係怕麻煩，所以又係我拆肉，媽媽笑話，第日小展圖又要媽媽拆肉，媽媽就真係好唔得閒LU！

所以小展圖出世之後我地屋企就開始再唔係無「飯」家庭啦！而且除左做野之外，我地日日都好準時食飯添，以前有時六七點，有時八九點，十點都仲有，小展圖真係改變左我地既生活好多，婆婆都話咁耐以來未見過媽媽咁勤力做家務！

好講番個潮州凍魚同凍蟹，原來超級易做，等我show個食譜出黎先！

潮式凍魚

大眼雞　　１條
芹菜莖　　２條(切碎)
芫荽　　　２條
普寧豆醬　２湯匙

鹽　　　　１茶匙
薑汁　　　１茶匙
胡椒粉　　適量

1. 大眼雞去魚鱗及內臟後，洗淨，抹乾，以醃料塗勻大眼雞面醃約20分鐘，備用 。
2. 將大眼雞放碟上，灑芹菜莖碎於魚面及魚肚內，隔水蒸約8分鐘，取出待涼後，放芫荽於魚面，以普寧豆醬蘸吃。

• 普寧豆醬可於雜貨店購買
• 先將薑磨碎便可搾取薑汁

潮式凍蟹

大 花 蟹　１隻

1. 不要洗蟹，先將蟹放入冰箱兩小時。
2. 將蟹拿出，洗刷乾淨後備用。 
3. 煲一大鑊熱水，放三兩羹砂糖，水滾放入蟹煮半小時。 
4. 把蟹放涼，放入雪櫃，雪凍便可隨時供食。

小朋友真係日日都唔同嫁

早上個星期媽媽先同婆婆討論完話小朋友好少笑！點知今個星期小朋友就笑得好多，我地先發覺原來小朋友唔係一出世就會笑，佢地都要學嫁！而且今個星期佢多左好多聲氣，唔係淨係識「ar」，依家好間唔中會blue、有叫嗯咕......etc好多唔同發音，而且好明顯八掛左，成日周圍望，最鍾意望電視機同電腦，小朋友原來幾日就可以好唔同架啦！

小朋友又去探高醫生啦！

由大前日開始發覺小朋友個屁股仔有d紅，尋晚仲有少少脫皮，再加上小朋友既手爭同手臂摺位有d鞋手，我覺得d有d似濕疹，但又唔肯定，所以決定帶小朋友去睇下高醫生，結果醫生話佢手臂果d係濕疹，而屁股就可能係念珠菌/尿疹，不過都唔太肯定，自問次次小朋友去完大小便都已經用濕棉花抺乾淨，再加凡士林，點解小朋友都係爛patpat咁陰公？

仲有小朋友仲有d頭泥，因為有d響腦筍位，所以我唔敢掂，話俾高醫生知，佢就搵個姑娘幫小朋友捽藥膏，點知姑娘捽得原來好大力，小朋友個頭仔都紅晒，但係又無問題喎，捽既中途小朋友一話「ar ar」聲叫，之後食住自己手指就無出聲，原來姑娘話佢其實係唔知我地做咩搞佢，唔鍾意人搞佢先至出聲，其實原來無整痛佢嫁，不過小朋友俾佢捽到頭仔都紅晒，搞到媽媽好肉赤。

探討食奶咀既問題

小朋友呢兩個月，媽媽一次都無比過小朋友食奶咀，因為驚佢第日大個d牙出得唔靚，之前去健康院問過醫生同護士，有d話食奶咀無問題，有d有話有問題，今日咁o岩Stephanie打電話黎，終於解決左我既問題。

原來小朋友係歲幾前牙床未開始發育，所以食奶咀係無問題，係唔會食壞牙。

講番點解媽媽會有呢個問題，其實係小朋友已經開始食手指，仲要成日食，媽媽擔心佢食到d手指變型爛晒，又驚佢大d周圍摸完，再放隻手入口，咁就仲唔衛生，所以開心諗緊好唔好俾小朋友食奶咀。

跟住Stephanie話小朋友一定有樣野會依賴，唔係奶咀就手指，唔係手指就毛巾，再唔係就公仔，總之一定會有一樣，唔想佢食奶咀最多掉左佢，等佢喊下就可以介左，但係手指無辦法唔要，所以仲難介，就咁媽媽就決定俾小朋友食奶咀啦！

小朋友尋日去打針啦！

尋日媽媽帶左小朋友去高醫生打針，一共打左2枝針(五合一&肺炎縺球球)同食左1隻抗體(輪狀病毒)，用左成二千蚊，好貴呀！不過係為小左朋友既健康，所以貴d都要啦！

高醫生同小朋友打針果時，小朋友喊左幾下，好可憐！

之後媽媽帶左小朋友去新世紀去荷花親子中心果度買左兩個奶咀，再加幾件玩具俾小朋友(又用左五百幾蚊)，就帶左小朋友番屋企，之後同爸爸去左打冷，期間小朋友做左安睡豬。

點知番到屋企無幾耐，小朋友醒左突然大喊，喊到唔停，媽媽同爸爸都估可能係因為打完針唔舒服所以係咁喊，之後媽媽就叫爸爸早d訓，而媽媽就繼續take care小朋友，因為擔心小朋友打完針會發燒，所以每半個鐘同佢探熱一次，結果到左兩點幾真係發左燒，所以跟手就即刻餵小朋友食退燒藥同貼退熱貼(不過唔知點解貼極唔實，只好係咁意放上去)，好左小朋友即刻就退燒，不過媽媽怕小朋友會燒得反反覆覆，所以都唔敢訓，只好抱住小朋友坐響廳，仲抱抱下訓著左，就咁訓下醒下就到六點幾爸爸起身接力啦！

唔好以為爸爸訓足一晚好歎，因為之後爸爸都肉赤小朋友唔舒服，連續抱左小朋友六個鐘，仲要抱到手踭痛！

小朋友夠兩個月要去健康院啦！

今日帶左小朋友去健康院檢查，小朋友依家已經60cm高，12磅重，頭圍37cm，醫生話一切正常，不過係返黎果陣突然落雨，幸好係婆婆同我一齊帶小朋友去健康院，所以可以我出去「捷」的士，婆婆就同小朋友響有瓦摭頭既地方等，唔駛淋濕小朋友。

好耐無寫啦，大量野要報告

首先早上兩個星期我同爸爸捉左小朋友番studio影相，影相前我地同小朋友既爺爺、嫲嫲同二叔飲茶，之後我番屋企執好小朋友要影既野，而爸爸就帶小朋友番studio，我地足足影左成個下晝，到大約七點左右先走，期間嫲嫲睇睇下走左，而婆婆執完屋又黎八掛下小朋友影成點。期間仲要發生一段小插曲，就係媽媽未去到studio之前，小朋友疴臭臭，爸爸、二叔同嫲嫲知道媽媽就到，竟然袖手旁觀，由得小朋友up住，激死媽媽同婆婆。

之後果日唔知係咪因為茶樓太多人，有病菌，媽媽同小朋友都傷風病倒左，二叔都係，而婆婆仲比我地傳染到，真係好陰公，所以又要帶小朋友去睇高醫生，小朋友走左高醫生度磅左重，成11磅啦！唔怪得之覺得佢咁墬手，之但係睇完醫生之後小朋友就要食佢人生第一次既藥水，不過好在佢都好似唔太抗拒。好在小朋友食左5日藥之後就好番啦！

25號果日係中秋節，雖然小朋友仲未識得玩燈籠，不過婆婆已經封左封利是話要俾小朋友買燈籠呢！果晚爸爸同我帶左小朋友落公園同商場行左一個圈，可能真係周圍太多聲，所以小朋友一反常態，超級咁精靈，周圍咁望，就係咁小朋友就渡過左佢人生第一個中秋啦！

中秋之後果日係公眾假期，我同爸爸帶埋小朋友去左太婆屋企(即係媽媽既嫲嫲)同埋飲茶，小朋友既大姑婆仲買左一件好靚既睡袋俾小朋友添呀!之後我地就返屋企，夜晚爺爺黎左我地屋企，仲有二叔，雖然已經過左中秋節，但係我地都當係做節，叫左一個盤菜，大家都食得好高興。不過唔知係咪果日小朋友出得太耐街，夜晚又係好扭計，喊得好厲害，搞到媽媽好心痛，但係爸爸仲要搶左小朋友，本來媽媽以為佢幫手「tum」下佢，結果爸爸竟然「tum」唔掂發老脾，彈小朋友腳板，媽媽即時發火啦！

小朋友今日學抬頭呀！

今日我同爸爸試過將小朋友趴轉左，諗住俾小朋友練下抬頭，唔試尤自可，一試之下小朋友竟然可以抬到個頭小小，雖然只係維持十秒左右，但係我地已經覺得小朋友好叻啦！

爸爸第一次同小朋友沖涼呀！

尋日係爸爸第一次同小朋友沖涼呀！爸爸覺得好好玩咁，小朋友一路沖，一路撐手撑腳，媽媽仲用電話同小朋友拍左一小段沖涼video添呀！

小朋友早兩日去左打針

小朋友早兩日上晝同爸爸去左健康院打針，打左針之後去聯合醫院覆診，結果原來係媽媽記錯左日期，之後我地就同小朋友去左高醫生度睇醫生，同小朋友檢查下身體。

高醫生話小朋友眉毛上面好似甩皮咁同埋面上既疹仔，原來係一種叫脂漏性皮膚炎，係初生bb好常見，而且原因不明，高醫生俾左d藥膏我地，只要同小朋友搽左之後用紗布捽番甩佢就ok，一捽之後小朋友即時靚仔晒。

下晝果陣我同小朋友番屋企先，而爸爸去左油麻地入境處同小朋友攞出世紙，爸爸話晒足成大半個鐘同小朋友排隊，終於同小朋友攞左出世紙，仲足足攞左3張添，小朋友終於做個有身份既大仕啦！話俾大家知佢個名叫黎展圖，好多朋友問我地小朋友個名係咪等於大展鴻圖，以為爸爸想發達想到short左其實個名只係因為李丞責俾果d字終於有兩個字夾埋係有意思，媽媽果時係想佢個名等於「一展所長，萬事可圖」希望佢做樣樣野都可以順順利利。不過改左之後媽媽先諗到，佢個名又同「賤兔」同音，咁小朋友就有個花名，小朋友希望你大個唔好嬲媽媽咁唔小心啦！

不過唔知係打左針定係去街多既問題，結果晚超扭計，喊到拆天，我地仲要擔心小朋友唔知係咪因為打針有反應既關係而唔舒服。

發緊燒既展圖豬好可憐，塊退熱貼原來係貼唔實既，成日跌落黎要媽媽黏番上去！

小朋友滿月啦！

睇下小朋友幾懶訓，訓到成個人變左S字！

呢張超搞笑，話說爸爸餵小朋友飲奶，小朋友扶住左個奶樽，小朋友飲下飲下就訓著左，然後爸爸攞走左個奶樽發覺小朋友隻手境然定左形！

o岩o岩過左果個星期六我同爸爸既家人同婆婆去左旺角金龍船食飯，大家買左好多禮物俾小朋友，嫲嫲買左一個金壽桃、姑媽買左金鈪仔、goldie姨就現金、二叔同佢朋友就買左件evisu衫仔俾小朋友，為小朋友慶祝滿月，果日小朋友超級乖，一去到淨係要食奶，食完奶之後就一直訓訓訓，不過返到屋企就大鑊啦！

果晚論返爸爸同媽媽夜晚照顧小朋友，唔知係咪出左街或者係打亂左生理時鐘，所以夜晚超扭計，扭到第二日下午兩點幾先叫肯訓下，最最最大鑊係婆婆星期日去街街，所以爸爸同媽媽就唯有變身大熊貓，小朋友唔通你真係生出黎蝦爸爸同媽媽既？

寶貝豬變左小魔怪

我好眼訓呀！

呢張好難影架，小朋友次次笑都係一兩秒架咋！

婆婆琴晚同前晚因為見我地夜晚睇小朋友睇得太辛苦，所以自告奮勇幫我地睇下佢。

第一晚小朋友好乖，訓得都唔錯，係換下片，去下大大咁。但琴晚就黎料啦！做番佢平時既一貫作風，每隔兩個鐘要飲奶，跟住又嘔奶，又小便，又大便，仲要搞到背脊都有尿尿，又要斟茶比婆婆。一擺落床就扭計，要抱，郁手郁腳，總之搞到今朝成8點先肯訓，婆婆都話佢係一個小魔怪。我都同婆婆講笑話，你依家先感受到我同爸爸夜晚幾大鑊！

仲有一樣星期日果日因為婆婆放假，所以果日就由我同爸爸接收晒照顧小朋友既所有工作，我終於第一次同小朋友沖涼，原來都唔係好難咋！

小朋友日日都俾到驚喜我地

今日純粹係做一下小朋友既行動報告。

小朋友前日俾食奶果時，學識左如果唔想食既話會用條利頂番個奶咀出黎，我地如果堅持要佢食既話，佢就會「令」開塊面，真係......都唔知講咩好。

另外係今日爸爸諗住同小朋友試下玩「捉住」遊戲，就係將自己隻手放響小朋友面前，叫佢捉住，我地發覺小朋友雖然控制唔係太好，但係試多幾次，佢真係可以捉到隻手，之後佢會好開心咁踢下對腳。婆婆話好少18日人仔可以咁樣，小朋友，你真係好叻仔呀！

最後一樣係最好笑既，今日小朋友喊肚餓要食奶，因為未夠時間，所以要等一下，而爸爸就抱住佢「tum」下佢，爸爸果時上身無著衫，小朋友竟然啜爸爸，仲要有聲，當堂笑到爸爸死下死下。

小朋友退左黃啦！

尋日同小朋友上晝去健康院覆診，醫生話小朋友退左黃啦!

媽媽尋晚同前晚發燒呀！

前晚發覺右胸好以塞左，一掂就好痛，不過又唔可以唔理，上網睇過d人話要超熱既熱敷，加用力按鬆佢。因為自己會就力，所以唯有搵爸爸幫手，痛到想死。

晏d唔知點解發冷發熱，所以以為自已感冒，所以唯有係早d訓，訓醒左都仲有有燒，所以去樓下睇醫生，結果醫生話我患左乳腺炎，要食幾日藥之後仲要覆診。

因為好唔舒服，所以呢兩日都係俾奶粉小朋友食咋。

救命！我就黎頂唔順啦！

小朋友呢兩日好大食，都唔知點解會咁，日頭仲好少少，一到左夜晚次次飲奶大約要30min至45min，每次飲奶後期佢有時好似訓著咁，見佢訓著，就比佢訓，但係佢訓唔夠半個鐘又扭計要飲。

好似今晚咁我先俾左佢飲左1個鐘，過左大約45min佢又扭計，我就俾2安媽媽奶佢，之後佢仲扭，我比埋佢飲多25mins，見佢收工以為佢夠食，但係未夠10mins佢又喊肚餓，終於要補1oz奶粉比佢，佢先至肯收聲。

小朋友你玩死媽媽啦！

小朋友實在太有禮貌啦！

尋晚婆婆同小朋友換片片時，我同爸爸都響度幫手，忽然間，小朋友就斟茶比婆婆，真係搞到好混亂。晏d佢又斟茶比爸爸，真係超好笑！

原來政府醫院都有好野

小朋友出浴




小朋友最鍾意趴轉沖涼




小朋友既皮膚幾薄~~~~

尋晚小朋友又玩到今朝7點幾，跟住因為媽咪起左身，所以我地俾左小朋友佢睇住，咁我同肥仔都終於可以訓番陣，我地同媽咪講話，佢已經食完奶、小左便同尋晚都有大大。跟住我地話小朋友既大大唔知係咪因為食多左媽媽奶既關係所以軟左好多，無平時咁硬，跟住媽咪話：「係呀佢d屎靚左好多。」我同肥仔聽到，當堂笑到look左響樹，入到房響床訓緊都仲要笑緊，媽咪有時d形容詞真係好奇怪！

晏d肥仔佢去左bb展幫我買奶泵，所以我同媽咪兩個人下晝去聯合醫院同小朋友覆診有關黃疸，同另外我同小朋友睇母乳哺飼科 (呢科專係睇餵媽媽奶，幫我地解決有關既問題)，上次睇果位姑娘已經好有心機，好好人，過晒放工時間都好有耐心咁幫我解決問題。

今日同小朋友先去睇母乳餵哺，姑娘教左好多野，我終於可以好快咁餵到小朋友，響30分鐘內餵飽佢食媽媽奶而唔駛搞一大餐，而且重解決左我一大堆問題，醫生同護士都好好人，好有耐性同愛心，跟住醫生仲問我駛唔駛搵一位護士上黎我地屋企，幫下睇下餵母乳既姿勢同再教我地同小朋友洗肚臍，原來政府有d咁好既服務，真係超超超~~~~~~~正！

我地返到屋企時肥仔都返到屋企，佢話俾我聽join左venture既package諗住我地同小朋友一齊影相，估唔到咁佢會咁捨得，500蚊join一個淨係得一張8 x 10既相既package。佢仲話如果鍾意既話加多一張相既package都係加多千幾蚊之嘛，肥仔今次真係好慷慨~~~~~~小朋友爸爸真係算唔話得啦！

妟d我試過個新泵，嘩比起nuk果個真係正好多，泵得又快，而且唔痛，我諗佢至少解決左小朋友夜奶既問題lu！

終於成功餵到媽媽奶啦！

小朋友仲未訓醒呀！




究竟咩事要鄒眉頭？




婆婆話小朋友呢張相有D似媽媽細個喎！




我條臍帶




O岩O岩甩左臍帶既肚臍

我今日終於成功餵到媽媽奶啦！尋日因為姑娘佢講過話我夠奶，所以真係俾到信心我餵媽媽奶俾佢。雖然今日都有補兩次奶粉俾佢，一次15ml，一次45ml左右，不過其餘幾餐我都係淨係俾人奶佢食，而且無補奶粉，雖然每次食45分鐘，真係好攰，但係成功左個感覺真係好正好開心，希望我可以慢慢唔駛俾奶粉佢食啦！

不過今日小朋友個肚臍仔，有少少流血同好似有d膿既物體，所以我同肥仔帶左佢去睇醫生，去到醫生度佢仲o岩o岩甩左臍帶，結果醫生睇過話佢有少少紅，俾左d藥水同藥糕我地，我諗應該無事掛！

仲有今日我睇到小朋友對我笑呀，婆婆同爸爸之前都見到，係爭我咋，好開心呀！

虛驚一場

好眼訓呀！



腳仔




手仔




睇下小朋友既腳趾幾長~~~

尋晚又無得訓啦！不過果個係肥仔，事關尋晚佢成晚都照顧小朋友！尋晚11點幾，小朋友沖完涼，飲完奶訓覺，點知到左2點半小朋友又醒左，又飲奶又換片，再加上原因不明咁喊(結果佢吐左啖奶，我地先知佢有風響肚仔)，如事者搞到5點幾，肥仔都頂唔順話：「小朋友我唔做你爸爸得唔得呀！」當然佢係講笑，因為佢仲一路抱住小朋友一路轉一路行「暗」佢訓，如事者小朋友到5點3度先訓，而肥仔先有得休息下。而因為肥仔佢照顧小朋友，所以可以休息到第二朝9點。

所以小朋友你大個要錫多D爸爸呀！

跟住就開始到我餵奶，同小朋友換片，泵奶，叮番熱D午餐(媽咪整定既)，因為今日佢要去上個有關小朋友既營養學講座！小朋友你睇下幾多人錫你！

食完飯餵小朋友飲番今朝泵既媽媽奶，大約一點幾執好晒野，諗住同小朋友去健康院(因為約左2點鐘)，點知臨出門前發覺小朋友要換片，咁就換片啦！佢又突然嘔左啖奶，咁就換衫啦，諗住抱得出去，佢又再嘔多啖奶，好左今次眼明手快，無整濕件衫，咁就搞到二點三啦！搭的士去到健康院已經係二點半！

去到健康院磅完重再去見醫生，醫生話佢又黃多D，仲話要即刻轉介去聯合醫院兒科要抽血，小朋友要睇報告，如果黃疸指數太高可能要住院。咁我地就即刻搭的士去聯合，搭緊車果時我忍唔住喊，因為好擔心小朋友要住院，同埋響QE住院時，隔離床果位太太係護士，佢小朋友又係黃要住院，我問過佢如果D BB黃會點，佢話好麻煩要換血，D單張又話嚴重既話會弱智/生命危險，所以越諗越驚。

去到聯合，小朋友抽左血，我同肥就等報告&見醫生，醫生一睇就話，小朋友都唔係好黃O者，過多兩日會仲黃D，即時鬆左一口氣，跟住護士再幫我解決有關餵奶既問題，佢話我應該夠奶餵小朋友唔駛太過擔心，而且都應該唔駛補奶粉添。本來護士想睇下我餵小朋友既情況，不過小朋友實在唔想食，所以我地唯有約星期一覆診時順便睇埋，跟住我地就番屋企啦！

返到屋企試下埋身餵小朋友，可能真係上左奶所以真係俾到小朋友食，但係唔知係咪小朋友太無耐性，食下兩就收工，足之我地搏鬥左成兩個鐘，但係小朋友都係未飽，但係佢又唔肯再食，不停咁喊，我地本來諗住抱下佢，希望佢可以收聲，等晏D再餵，但係見佢喊到聲都沙晒，真係好肉赤，無奈之下唯有補2OZ奶粉俾佢，佢先收聲訓覺。

到十一點幾媽咪就同小朋友沖涼，然後小朋友就訓覺啦！唔知今晚小朋友會唔會玩野呢？

我地無得訓

第一晚只可以話係無得訓！

其實唔係話小朋友曳，但係因為夜晚小朋友不停咁先飲奶，跟住大便，跟住又到BB(我隻狗仔)去廁所，過左一陣又到小朋友再飲奶，跟住我地又check佢有無大便，結果係小朋友響我地張床度小便，然後又到BB大小便，如是者呢個CYCLE再黎多次，到5點左右小朋友先至訓著，而我地都先有得訓，但係我地都要8點起身因為要同小朋友去健康院！

去到健康院之後，我先同小朋友俾護士睇下餵人奶既方法，出到黎之後竟然見到肥仔訓著左，健康院咁多小朋友玩緊大合唱，佢都可以訓著，証明真係好攰好眼訓，其實都好難為佢，因為尋晚我傷口未埋同肥仔體諒我太攰，大部份時間都係肥仔照顧小朋友，成晚咁真係好辛苦！

後來見醫生時醫生話小朋友有D黃，所以聽日我地要再同小朋友番健康院檢查，如果真係再黃既話就要小朋友去醫院照燈，有D擔心呀！不過人地話其實都唔係咩大問題，希望聽日番去CHECK小朋友無事啦！

我地出院啦！

哈哈！今日醫生話我同小朋友可以出院啦！我可以唔駛響醫院過生日啦！今日下晝響醫院上完沖涼堂之後，就執野番屋企啦！肥仔、媽咪同阿明一齊過黎幫手出院。

夜晚碧鳳同五姨媽都黎左探小朋友!我地夜晚叫pizza hut食，五姨媽仲帶左蛋糕過黎！大家都食得好開心。

跟住夜晚小朋友跟我同肥仔訓。

生產後第二天

睇下我幾細粒?



小朋友訓覺既樣可愛嗎?



我好眼訓，唔好搞我!




小朋友既腳仔幾細?



我好怕羞，你唔好影我!



今朝一早七點左右姑娘就推左小朋友出黎俾我地呢班新進媽媽餵奶，同開始俾我地照顧番小朋友，不過我個小朋友真係好懶訓嫁，佢真係連食奶都懶，再加上我係餵媽媽奶，可能真係未有奶既關係，小朋友真係無咩飲奶既意慾，到左下晝都一路係咁，小朋友淨係識得訓訓訓.....

上晝10點幾時響醫院上媽媽奶堂，姑娘都話小朋友真係好懶訓呀！

下晝5點幾肥仔、媽咪同奶奶仲有肥仔既朋友都黎左探我，大家都好有心呢！

過左一陣因為小朋友真係全日都無咩飲過奶，加上我都知自己無咩媽媽奶可以俾到佢，所以都有D擔心，我問過姑娘，如果佢咁既情況，其實補下奶粉會好少少，因為佢出左世就黎一日，淨係去左一次小便，結果姑娘就教我點補奶粉，補奶粉原來係用杯仔嫁！

可能小朋友真係肚仔餓，飲得好快，但係佢真係好好笑，食完奶之後個嘴仔仲會啜啜聲，姑娘見到都笑左出黎，小朋友你真係失禮死人啦

晏少少媽咪同奶奶走左，肥仔就留響度陪多我同小朋友一陣，肥仔佢好好，仲問我攰唔攰，駛唔駛同我按摩小腿，因為佢話我尋日生小朋友果時好多似要用好多力好攰！跟住佢抱下小朋友同佢玩下，直至姑娘話探病時間到啦先走！

到左夜晚姑娘因為見我都無咩媽媽奶可以俾到小朋友，所以就建議夜晚幫我睇住等我可以休息多D，小朋友臨走前俾我錫左佢一啖。

後補7月30日

小朋友既第一張相



小朋友仲未著好衫




小朋友既腳印




第一張全家福




小朋友第一眼既世界究竟係點既呢?




睇下佢一出世就識單眼啦!




一睇就知佢係懶訓豬

大家好呀!我7月30日果日零晨1點15分開始肚痛，果時都唔肯定係個肚唔舒服定係小朋友要出世，不過覺得係怪怪地咁，所以自已開始計時，之後一路咁痛，到左朝早六點幾左右叫醒左老公，但係都唔肯定係咪生得，到7點左右諗住出街之前去洗手間發覺見紅，之後同老公出去茶餐廳食完早餐，再搭的士去QE。

大約10點之後陣痛開始密D，五分鐘左右一次，到左下午5點半左右開始大痛，姑娘果時同我CHECK過宮頸開始軟，但係一度都未開，6點20分開左半度左右，6點40分左右開左4-5度左右，但係果時產房都未有位，7點左右入左產房，之後我REQUEST做無痛，但係果時姑娘仲未得閒，晏D再REQUEST果時，佢地已經話你已經開到9度，唔駛止痛啦喎！跟住先俾笑氣我聞。到7點50分左右就生左小朋友出黎啦！

因為我生果時無帶眼鏡，所以好多野睇唔到，不過我老公有入產房，佢話好得意，BB因為我之前無用無痛同止痛針，所以好精靈，一出左黎姑娘吸完痰就已經自己喊！仲有小朋友一出世果時原來成身會紫色，跟住晏D會變番正常！生完小朋友我同肥仔話，好痛呀，雖然我都想要多個囡囡，但係唔得啦，我有小朋友一個就夠啦！

生完小朋友雖然好痛，但係好開心，如果大家諗住順產，姑娘有一句說話好有用，大家要記住，就係小朋友生左出黎就係最好既止痛方法！呢句說話真係好有用。

生完小朋友之後推番入病房已經係10點幾啦!果時超肚餓，好在媽咪一早煲定D粥比我，QE比番10分鐘我地傾下計，同小朋友影下相！之後肥仔同我媽媽就要走啦！然後QE既嬸嬸同姑娘幫我照顧小朋友，我訓左一陣，到3點幾左右推番D小朋友出黎餵奶，果陣我已經好掛住小朋友啦！4點幾又推番佢入去，到第二朝7點幾又係餵奶時間，先又見到小朋友！



係啦我唔記得講添呀！小朋友佢同我係同一日農曆生日嫁！

唉~~~~小朋友唔知係咪真係要催生呢？

尋日返QE檢查，醫生同我講，話如果下次3/8既產檢日子，如果仲未生既話，就唔駛返去檢查啦，直接入院催生啦！

~~~~~呀......我唔想呀，人地話催生痛好多，同痛好耐架，大鑊啦！今日已經係政府既預產期，小朋友幾時先捨得出黎呀......

琴日肥仔先同我講話佢有d朋友搵李丞責改名(我本身都諗住搵佢)，佢話雖然多名揀，但係好多都好老土，話其實可以自己改定，再比李師父揀，但係我覺得自己改既唔會咁夾羅~~~~~~跟住肥仔就開始諗名啦！佢都唔係路既，諗d名真係好求其，例如：黎嘉誠、黎張人、黎堅翹(天穚？)、之前仲話黎得好添......哎~~~~如果我係小朋友既話一定嬲死，佢仲話駛咩驚啫！佢大個可以自己改名家嘛！我話但係個名就已經跟足佢18年，俾人笑足18年呢，爸爸真係唔係路！

好感動呀！肥仔今日主動幫我去買野！

我個十字繡就完成啦！不過之前因為我太大懵所以買少左一隻色既十字繡線。今日同肥仔講開話聽日我去QE覆完診後順便去買，佢竟然話我個肚咁大仲走黎走去買線，問我響邊樹買，話佢晏D幫我出去買喎！~~~嘩！勁感動呀！因為不嬲都係佢點我去做野，好少好少咁體貼，原來有咁大個肚做老婆既福利係好好多！

不過呢....另一方面聽日如果計政府既預產期既話就係39WEEKS6DAYS，小朋友真係好似無咩動靜，唔通我要催生?之前聽人地講就無咩野，但係依家有機會到自己就真係好驚~~~~~~諗起面都青埋，聽人地講好痛。小朋友唔該你生生性性快D出黎啦！

唔知小朋友幾時捨得出黎呢?

呢兩日開始，唔知係咪小朋友又大左，個肚成日都好頂，搞到個人要坐直都好難，條腰成日超級攰。唔知係咪因為近預產期既關係，宮縮多左好多，但係我又覺得小朋友好似響入面玩得好開心，唔捨得出黎咁，有d擔心佢話要過期居留。

琴日下晝終於去睇左harry potter，不過唔係mega box係響apm睇，好多人，要坐第一行，仲係睇2個幾鐘，辛苦到爆，大肚後期真係唔好去街，行幾步已經覺得好攰啦！

跟住睇完戲，去左starbucks坐左一陣，再去pizza hut食晚飯，晚飯中發生一件小意外，pizza hut入面個staff唔小心將成杯凍飲倒左落坐我隔離既二叔樹，搞到佢成個背脊濕晒，不過好在我就無事，但係就笑到我同肥仔死死下！

之前我響ebay買左個peter rabbit既十字繡圖到今日為止繡左大半啦！繡起既話影張相放落黎俾大家睇啦！

終於可以休息啦

13-15/7又搞完會展，雖然今次d sales好ok但係都去足左3日/坐足3日，隻腳都腫晒啦！原來大肚真係唔可以坐太多

星期一 16號，就返左studio執番好d野，再同肥仔d fd食飯！

琴日17號，終於真係可以開始放假，本來下晝肥仔佢諗住同我去imax睇harry potter，因為我好想睇，人地話終後20mins係立體電影，+上我係harry迷，點知去到買戲飛，個票務員竟然話：「無晒飛啦！除非係單丁位，或者8月既預售啦！」嘩！ 有無咁變態！ 所以終於我地都無睇到！

不過好在響megabox都有d收獲，首先我響spotlight終於搵到支acid free膠水，for我整小朋友本簿仔用，之後原來發覺果度都開左間DG，佢返左個新既macbook套，又平個樣又ok，肥仔佢就買左一件我都唔知叫咩既野話for剪片用。

今晚我就約左bk班媽咪一齊食飯，順便俾番輯相敏兒，不過呢排唔知係咪開始近預產期既關係，個肚開始成日痛痛地，我諗完左今日既gathering之後，除左檢查都係唔好走黎走去，如果唔係去街時行行下話要生，就真係好樣衰！

到我影大肚相啦

尋日終於倫到我影大肚相啦，影左一陣已經好攰啦！不過要影多一次，無他，男主角肥仔無出過鏡，一路淨係佢影我，影完之後我提佢，話爸爸你未影喎，佢先話佢喎！仲問係咪一定佢都要影，我笑肥仔話如果你唔影既話，咁我d大肚相咪好似單親媽媽咁羅！

另外，唔知係咪真係越黎越近預產期既日子，開始有d壓力啦，尋晚仲發夢自己響房個洗手間見紅穿水，仲要係好厲害果隻，即刻大叫同肥仔求救，好在都係發夢o者！希望生bb果時一切順順利利啦！

煲薑醋

琴日返到屋企，發覺媽咪買左好多薑同3大樽八珍醋，好多呀，媽咪仲要一日內刮晒所有薑，話要吹一日，成屋都係薑同薑皮，好壯觀呀！今晚返到屋企發覺媽咪已經將d薑煲緊薑醋，成屋都係薑醋味，好在我唔怕呢浸味，我諗隔離左右聞到浸薑醋味都知都附近有人就生bb呢！

另外今日約左bk既媽媽敏兒同佢老公阿駒影大肚相:p，我地又傾左好多計，雞啄唔斷，好開心！不過唔知佢地鍾唔鍾意肥仔影既相呢？佢地影完之後本來肥仔話同我影，但係我就話聽日先影，因為我都無準備，又無化粧又無帶衫，所以我聽日先影呀！

終於進入直路啦

早兩日28號去左政府做檢查(政府既預產期係27/7)，即係仲有四個星期小朋友就要出世啦！咁因為我一路都想肥仔陪我入產房，所以佢果日要同我聽個講座，落雨落到顛左咁滯。好在搭的士，但係都係成身淋到濕晒。

到聽講座時，肥仔竟然瞓著左，好在佢無鼻鼾聲，如果唔係就失禮死人啦！

跟住聽完講座之後就去左做檢查，今我我終於記得問醫生小朋友掉左頭未，佢摸下之後話掉左啦，不過小朋友既頭低左d，佢又自己口upup話我未到38週，我又呆左唔識得問小朋友個頭低左d即係點，雖然走之前佢又話小朋友位罝正常，但係我覺得都係個醫生安慰我。返到屋企我問人，人地話我知小朋友個頭低即係話小朋友可能會隨時生得，咁咪可能小朋友會早產？唔制呀！唔通就係因為我成日怕難生，所以成日行黎行走所以搞成咁？

好感激大家

好耐無上黎寫野呢！因為太忙啦，肥仔笑我話我日日做咁多野，忙到反艇，好似想要生之前做晒所有野咁 ！不過我唔敢好似上次咁唔瞓啦！但係就好遲瞓，有時可能做野做到4-5點，不過好左大多數日子都可以響第二日補眠，咁加埋都有6個鐘瞓到!仲有下個月有擺expo，好煩呀！

響呢幾個星期我去左政府覆左兩次診，都係係咁2睇下就掟反出黎、同bk既媽媽gather左1次、整左好多d客既野，買左一大批影prewedding果邊d婚紗同晚裝，影樓d野搞到7788，忙到一頭煙，成日都好攰！影樓d野應該黎緊呢個星期會到齊，到時我一定要肥仔同我影大肚相唔知會影成點呢？希望小朋友唔好太快出世，最好同預產期差不多，因為我仲有好多野未做呀！

不過好在生之前，即係今日都抽到時間同嫲嫲飲番餐茶，但係都係拖左成個月先去，因為之前我應承左5月入去架！

呢個星期不約而同有好多新戚、朋友、同埋舊同事約食飯同打電話黎關心我，有d仲好有心攞左/買左d bb野俾我，真係好多謝大家咁有心，咁關心我！

另外之前有3個朋友話俾我知佢地都有左bb，分別有左2、3、4個月，好「鄧」大家開心，希望大家都生個肥肥白白既bb，仲有就係懷孕期間唔好太辛苦，順利生產！

因為捱夜搞到對脚好腫

尋日因為有野要急住比客，所以瞓得果兩個鐘，即係朝早七點瞓，九點又要起身，攞去比個客，不過唔知係咪坐左一晚既關係，對脚長期處於低位，諗住瞓果陣已經覺得對腳唔舒服，望下佢，嘩！好腫呀！腫到連側邊腳眼舊骨都見唔到，仲要小腿都腫埋，我對腳從來都未試過咁肥咁粗，真係嚇左一跳，不過好在「long」高左對腳瞓左兩個鐘後d腫退左好多，但係之後又因為不停做野，又腫番，今晚唯有早少少瞓，等佢退腫啦！

小朋友踢得好勁

呢幾日唔知咩事，唔知係咪小朋友大個左，我覺得佢踢得好勁，有時仲覺得佢響個肚入面轉身，真係好得意，不過背脊同腰骨都攰左好多，而且隻腳開始有d腫，所以要開始long高對腳坐。頭先我度過個肚成41吋半，小朋友又肥左啦，不過我今朝磅過又無咩點重都，到依家為止都係重左12磅左右，d人話我重得少喎！不過我想要小朋友重番dd，去番正常size啦！

補祝母親節@小肥羊

尋日因為攝到肥仔既空閒日子，所以終於可以同媽咪補祝母親節，地點係TST既小肥羊，好鍾意！因為TST果邊既小肥羊開始左$108任點任食，所以覺得比平時抵好多，不過當然火煱料小過大陸好多，至少無左我最鍾意既芫茜，但其實食小肥羊，只要有牛/羊肉+肥羊粉俾我已經好滿足，所以都無咩所謂，再加上唔駛下下搭咁耐車，所以都ok架！大家都食得好飽，食到最後小朋友又郁黎郁去，唔知係咪話佢都食得好開心呢！

不過尋日發生左一件大不幸事件，事關我尋日上晝出街果時唔小心響街邊click左一下，踢爆左隻腳趾，我果時仲係著緊行山鞋，都唔知點解咁都可以踢爆，好鬼成痛，番到屋企除鞋先知隻腳趾流左血。不過好在當時o岩o岩有個好乾淨既垃圾桶o岩前面俾我禁住，如果唔係真係成個趴響街lu.......

今日去左照4D啦

今日終於去左一位BK網友介紹既曾祥風果度照4D，究竟小朋友係咩樣我都唔係好知。

因為頭一次照呀小朋友都唔知係咪太怕醜，摭住左自己個樣唔俾我睇，跟住醫生叫我出去行左晏D再照過，再照過既結果係小朋友都係用手摭住自己塊面，唔俾我睇清楚佢個樣。醫生話都無法子啦，咁都叫睇到少少，PRINT左幾張相同燒左隻DVD俾我，盛惠900大元。小朋友你係男仔黎家嘛，做咩唔俾媽媽睇清楚你個樣，媽媽D $$就咁就俾左醫生啦！

講番小朋友先，醫生話小朋友細左1週，今日我係28Weeks1Day，但係醫生話小朋友平均只係27Weeks1Day，而且仲係比較輕，得2lbs4oz，點解會咁架！？我同肥仔都咁大隻，點解小朋友會細細粒？？？？？唔怪得知我個肚唔大咁啦！唔通我要小朋友大隻d要食多d野？但係我唔想肥呀 >-<，平時果個醫生又話叫我keep住體重，但係keep住既話小朋友又咁瘦，咁點好呀？

小朋友你乖d吸收多d啦，如果唔係媽媽真係唔知點好啦！

以下係小朋友其中一段4D既VIDEO，希望未睇過4D既朋友會睇得明啦！因為我最初睇都係一舊雲咋！

今日我做左曵媽媽

今日我做左曵媽媽，因為我食左一樣人人都唔俾我食既野，就係榴槤啦!不過我買果陣時見媽咪都無咩反對，所以就照買照食啦，想食左好耐啦，小朋友媽媽應承你你出世前都唔食啦！如果唔係你可能會變左熱氣仔啦！

另外今朝早未起身我係摸下個肚，今次小朋友都有踢我，仲踢得好高添，響肋骨對下位置，原來小朋友不經不覺已經咁大隻啦!究竟佢會唔會係大碼B呢？

BK八月媽媽@COVA

今日約左7個BK既媽媽去COVA食TEA，呢次係我地既第一次聚會，一去到TST站好容易就搵到佢地啦(哽係啦幾個大肚婆企埋一齊，場面幾咁壯觀)!等左一陣齊人就浩浩蕩蕩咁行去COVA，因為今次COVA唔俾我地BOOK位，所以唯有早少少去(14:30)等左一陣終於都入左去，叫杯果汁，大家就去攞野食啦!其實我都無食過COVA既TEA BUFFET，之前都只係食TEA SET，發覺BUFFET真係超抵$298+10%(2位)包果汁同野飲一杯，蛋糕有大約10款，食完一隻又會換款，另外仲有咸點，包括我最喜歡既鵝肝醬包包，食得好開心，不過我就錯過左我鐘意既blueberry cheese cake，但係都食左tiramisu好過無啦!野飲我汁飲左西柚汁同decaf既cappuccino。

唔好淨係講食，好開心呀，今次第一次同各位媽媽見面，傾左超級多野，多到我都唔知講左d咩，8個媽媽(當然計埋我)由20幾到30幾，大家都係第一胎，咩都唔識，係其中一位既媽媽係陪月員，知識好名顯比我地豐富(睇黎我地會有位萬事通，只不過希望唔好太煩到佢)!我地由坐低3點鐘傾到7點先走，好彩今次係約響cova，如果酒店tea buffet都坐唔到咁耐!我地當中得一個媽媽既係囡囡，真係好岒貴呢，估唔到咁多囝囝，咁第二時我個囝要搵女朋友咪要同人爭崩頭?至於預產期，最早都係我啊，月頭麻當然係最快啦!不過講真都唔擔保小朋友係最快出世既一個。仲有89日咋，小朋友你究竟幾時出黎見媽媽啊?

另外之前我fax左去李丞責度諗住同小朋友約時間改名，今日佢地打番黎話要等小朋友出世先可以預約喎，咁唯有到時再搞啦!搞到我個to do list唔可以delete多一樣野

走佬袋

BB野終於買得7788，係爭BB床、BB車、奶樽果D濕碎野，所以趁呢幾日執個走佬袋，費事真係要生果時都唔知點搞，執完後睇下其他BK既媽媽人地7月預產期都仲未開始買，似乎我係特別緊張 ，呢個星期六約左幾個BK既媽媽出黎食TEA，唔知邊個個肚大D呢?

今日終於上到網

今日終於裝番個寛頻，可以響屋企上網，實在.......太幸福啦!

不過唔知係咪呢排時冷時熱，我又病左啦，先失聲，之後咳，再之後係大傷風，睇左兩次醫生，第二次轉左藥，不過唔知係咪隻藥太勁，食左d藥成佪人散晒，我見都好左7成，淨番dd咳同傷風，所以唔咁再食，怕影響小朋友，情願休息多d，等佢慢慢好......

上唔到網....慘無人道

早兩日屋企俾和記斷左線，原因係因為份約到左期而我之前fax左份中止form俾佢地，雖然之後佢地有staff聯絡我同我傾好左續約，但係因為個staff唔記得左通知我fax番份文件話要取消份中上授權書，所以早兩日開始就無端端俾人斷左線。

禍不單行既係我嬲嬲地即刻落樓下簽左香港寛頻，簽之前我已經同個sales confirm問佢有無coverage，佢拍晒心口話有，點之過一日佢話俾我聽無喎......搞到我無得上網...就死......咁滯.....

其實我到今日仲未上到網，今次都係借朋友果度上黎check下EMAIL依家好似斷在隻手咁好慘~~~~~

今日去左照結構啦！

今日上晝去左美麗華翹康果度照左結構，so far 小朋友一切都好ok，而且好合作，一照就得，不過用左1300蚊，而原來個醫生只係會照2d，所以好失望 >-<

病左啦~~~~~

o岩o岩公司擺完幾日展覽，多左個大肚腩，只可乆講一句好辛苦，仲要熱氣之餘再食泰國菜，再加一日据扒......結果就係exop第二日就病左，喉嚨痛+咳+再加流鼻水，終於訓左一晚之後雖然好左dd，但終於都係要睇醫生，今日食第二日藥，好左少少，但係都係好「支力」。

小朋友好似開始郁啦^-^

呢幾日覺得個肚怪怪地咁，有時好似有D野響個肚入面篤下篤下個肚咁，本來我都未肯定係小朋友郁，不過問過媽咪佢話初期係咁嫁，而且今日起身之前我摸下個肚(我成日都會掂住，不過唔會捽黎捽去)，發覺左手邊好明顯漲起左，跟左過左半分鐘左右又平番，唔知係咪小朋友響個肚入面LOOK黎LOOK去呢?

不過肥仔佢好衰，我話俾佢知小朋友好似郁，佢仲要笑我人就哽係會郁啦，除非你生舊石頭或者叉燒o者.....激死我啦!

仲有今日我打左去book照結構，都係肥仔唔好啦，之前聽我平時產檢個醫生話唔駛照，跟住依家又聽佢d friend話要照，所以結論都係要照，但係己經太遲啦，因為龔羽一已經fully booked，話要5月幾先有期，到時我都過晒23週，所有唯有搵過第二個醫生，呢個醫生都係承襲我一貫要方便既宗旨，就係好近舖頭，bk d媽媽話佢都ok架，到時唔知會唔會照到4d既呢，希望小朋友合作d啦，因為有d媽媽慘到要分3日照，我想要快d搞掂呀!

有左BB都要捱夜.....好可憐AH~~~~

因為仲有D積存既工作仲未做晒，今日已經係第2日捱夜啦，尋日仲要天光先訓，仲要訓得5個幾鐘，仲有D野未做晒，星期六日一又要擺EXPO，真係好「支力」，因為唔夠訓條腰痛得好厲害，天呀救下我呢個可憐既大肚婆......>-<

產前檢查私家篇 - 第3 TAKE

我今日頂唔順去左媽媽世界買左托腹帶，個sales姐姐好有心機教我點用，佢話原來有腰痛同坐骨痛既帶法都唔一樣，而個肚再大又唔同帶法，雖然未試真，但係俾我個感覺好似幾ok，希望用左條腰唔駛成日咁痛啦。

今日媽咪陪左我去左私家醫生度覆診，睇到BB個下巴生得好似我老公，好尖呀，覺得好開心。唔知BB其他邊個部份似我呢?

仲有一樣野要記低既係，醫生叫我唔好好似街D大肚婆咁成日搓個肚，佢話雖然好多大肚媽媽都好鍾意咁做，但係原來係會造成子宮收縮，唔係一件好事，所以各位媽媽要注意下啦。

拜年 - 嫲嫲篇

今次記呢件事其實係上個星期發生，因為我好布望藉住呢篇網誌去提醒自己要好好關心身邊既人。

事緣上個星期我去搵嫲嫲飲茶兼拜年，其實我已經有成差不多三年無去過探嫲嫲。原因不外乎自己懶，又可能心中對爸爸果邊始終有d介蒂，但係我始終都係有時好掛住嫲嫲。

不過今次探完嫲嫲之後我發覺自己真係唔可以再懶，我自己成日俾唔同藉口自己一拖再拖，但係老人家原來係唔可以等。今次番到去嫲嫲精神真係差左好多，而且可能因為姑姐佢地唔好意思講比我地知，所以嫲嫲早兩年中風，我都係到左果日先知。見到嫲嫲果陣我真係差d喊左出黎。而大姑姐佢早兩年亦都因為cancer而請左一年病假，我諗果陣鯭仔佢一定係好辛苦，但係我一d都無幫到佢地。

所以我真係要提醒自己，要多d去探佢。

第一篇

自從有左*小朋友之後一路都好想寫blog，記低所有有關既事，今日終於的起心肝，希望以後可以keep住寫。 :p

小朋友 - 點解我會叫肚入面既bb做小朋友?

其實我都諗左幾日，因為我屋企有隻狗仔，佢個名叫bb，我擔心會搞亂左佢地兩個既稱呼，所以就改左佢個名做小朋友啦!

展圖豬轉身啦！

今日因為舖頭有野做，所以爸爸媽媽都出左去，由婆婆睇住，平日有時間，我地一定有一個人睇實展圖豬，基本上佢唔會走出我地既視線範圍。

之不過今日因為我地出左去，婆婆又要掉垃圾，所以唯有放展圖豬一個響地墊上面自己玩，出左去唔夠一分鐘，返到黎婆婆竟然見到展圖豬轉左身~~~~~~呀~~~~~~第一次轉身竟然無人見到呀~~~~~~~~真係唔知講咩好啦！