展圖豬食米糊進度

今日餵展圖豬米糊，喊得好利害，媽媽見到真係肉都赤埋，但係唔餵又唔得，之後真係喊得好犀利，唯有停手，媽媽試食過，其實味道同佢d奶一樣，因為d米糊要用佢d奶開，咁即係唔關味道問題，究竟要點樣佢先可以食得開心d呢？

展圖豬6個月大啦~~~~第一次食糊仔！

今日係展圖豬6個月大，亦都係佢第一日食米糊，響兩個星期之前媽媽已經超期待，仲一早已經買定幾盒唔同味，唔同牌子既米糊俾佢。

今日一早同展圖豬返playgroup，落堂之後，媽媽等登去citisuper買件食飯衫俾佢，因為之前響citisuper見到已經覺得幾好，諗住睇下其他地方仲有無得賣得平d，結果都未見過，所以唯有返去買，大家可以響段片度睇到件衫，除左佢可以拆左變短袖之外，仲係長身，下底可以加兩個吸盤吸落highchair個餐盤度，等可以兜住跌落黎既野食，等佢大小小自己學食飯就超有用。

到夜晚開糊仔俾佢食，結果係大失敗，唔知展圖豬係唔鍾意D味定支匙，定係個testure，總之好唔鍾意(汗！)媽媽仲一心諗住展圖豬平時飲奶咁快一定好為食，好鍾意食新野添~~~~~

媽媽去左教育展

因為敏兒之前話俾我知呢幾日HKCEC會有一個兒童教育展，雖然媽媽呢排忙到死死下，而好多人又話無野睇，但係都要去一次，話說我下午3點出發去會展，好好彩一等就有車，唔駛幾個字就到左，買門券果度又無人。

入左場媽媽即時search下有咩playgroup啱展圖豬，真係唔多，行勻成個場都係得果3間，其中一間仲要係kindu，媽媽係咁意攞d課程資料就行其他野，逗留時間最耐係一間賣蒙特梭利教具既公司，佢地有一套教具係for 6個月bb可以開始玩，媽媽睇到心郁郁好想買，不過要成萬三蚊~~~~~~~唉！又係萬萬聲，今次媽媽真係要諗下啦！

媽媽今日響個場買左first teeth牙膏2支(送矽膠手指牙刷)、smart fist6包、兩個搖鈴(之前響kinderu玩過，我覺得又好聽又易拎)，仲有一套rainbow bell(媽媽好鍾意覺得好聽又靚，仲可以教音階同顏色。

行左兩個鐘(無咩行都行左兩個鐘，8月果個expo睇黎要行足一日)，媽媽即刻搭車落銅鑼灣，去Venture攞相，攞完相又去左華麗園買年糕(因為華麗園d年糕低糖，諗住買俾老爺)同去左么鳳八下，見到有婆婆鍾意既日本軟糖又買左一磅，跟住就大包小包咁番屋企，好左又係一去到車站就有車，媽媽7點幾已經返到屋企啦!

今日係爺爺生日

今日係展圖豬既爺爺生日，原本諗住過爺爺屋企附近食，但係因為姑媽病左，又凍又落雨，所以嫲嫲建議不如改去我地樓下既酒樓食飯，費事我地帶住展圖走到咁遠咁辛苦。

今日媽媽叮囑爸爸記住返黎時要攞左蛋糕先，因為媽媽之前醒起爺爺有糖尿病，所以呢幾年都無咩食過甜野，蛋糕當然不在話下，所以之前問定人，原來太子果間「貴族蛋糕」有代糖蛋糕，所以尋日特登出去訂左一個番黎。

食完晚飯(今次晚飯婆婆唔食啦，因為婆婆感冒病左幾日，媽媽之前煲定粥俾婆婆肚餓可以食)之後爺爺、嫲嫲同二叔上黎切蛋糕，爺爺食得好開心，食左兩大件，本來媽媽都擔心訂2磅蛋糕得5個人食會食剩，結果可能太好食，所以二叔同爸爸同包辦晒淨番果d。

不過美中不足係原來佢地唔係用代糖忌廉，同d糖衣都唔係代糖做，所以下次唔係咁忙既話媽媽打算都係自己造番，咁爺爺就可以成個蛋糕都食得。

展圖豬上報紙呀

展圖豬今日真係上左報紙呀！今日婆婆一早去游水，就順便買份「明報」睇下有無展圖豬張相，佢見到展圖豬有兩張相，仲係好大張添，跟手就買多份，諗住一份keep好係記念，一份就show俾d friend睇。

婆婆一番到屋企，就抄醒仲係睡夢中既媽媽，好開心咁話俾媽媽知，之後媽媽又話俾爺爺知，之前唔敢講呀，因為唔知展圖豬張相會唔會太細張/無相，唔想爺爺失望。跟住爺爺就叫嫲嫲去買，之後仲講話要過膠添呀！

媽媽今日仲有幾個fd買左，打黎話我知添~~~~~展圖豬竟然有蕃薯(fans)？

無買既朋友都可以去下面條link睇下明報個網頁

http://happypama.mingpao.com/cfm/parenting3.cfm?File=20080106/newa/oda3.txt

http://happypama.mingpao.com/cfm/parenting3.cfm?File=20080106/newa/oda1.txt