圖圖媽媽的生活&廚房日記: 1月 2012

2012年1月31日星期二

賀年曲奇

昨晚和前晚為左今日既曲奇，媽媽都搞到好夜先瞓，因為琴晚焗完晒已經3點，媽媽實在太攰頂唔順，加上d曲奇要凍晒，走晒d水氣先入盒至會好食。

唂咕果仁合桃曲奇、雙料朱古力粗砂糖曲奇、杏仁攻瑰曲奇

所以媽媽今朝唯有晨咁早起身packing，pack好晒又係時間啱啱好。今次做左杏仁玫瑰曲奇、唂咕合桃提子曲奇同粗砂糖雙料朱古力曲奇，希望收到既人會鍾恴食啦!

2012年1月30日星期一

早排媽媽見到travelzoo既local deal有好抵既日式便當課程，係去一間日本餐廳上課，教整媽媽勁鍾意既日式甜蛋，仲要係做一個超可愛既便當，所以媽媽就即刻買左張coupon，仲即時email約埋時間上課。

今日就係上課既日子，上課時由2位老師分別教授，首先係廚師先教做日式甜蛋，之後就由老闆娘親授點做日式便當，老闆娘係日本人，所以全程都由一位職員幫手做翻譯，全程大家都係落手落腳做自己既便當，原來要做一個可愛既便當都可以好簡單。

媽媽喜愛上呢類型既課程，遲d應該都會再join，希望第一圖圖返學時，都可以帶一個超可愛既便當返學。

2012年1月26日星期四

初四啟市 - 唐老鴨蛋糕

其實本身媽媽無諗過會咁快開工做生日蛋糕，不過訂蛋糕既媽媽話年初四好難搵到人做，因為好多蛋糕舖一年淨係休過年果幾日，所以都會休耐d，但係美心果d大舖又唔肯做Donald蛋糕。反正過年幾間媽媽都只係一個閒人，而且CREAM CAKE不需太用神，所以就做左呢個蛋糕。

其實呢個係媽媽第一次做既唧CREAM 2D CAKE，吉吉媽媽睇到呢到希望你唔會嚇到一額汗，不過媽媽知道程序應該係點，而且唧CREAM點都唔會難過吊線，結果果然順利，2層蛋糕好快就搞掂，希望吉吉鍾意!

祝吉吉快高長大，身體健康!

2012年1月23日星期一

大年初一 - 新年開爐

過去果個星期媽媽超級霹靂無敵勁忙，忙住整角仔(今年整左成2百隻呀!!!!)，忙住整羅白糕，忙住OT，幸好有姨婆同表姨媽打救，整左年糕同馬蹄糕，如果唔係真係唔駛瞓~~~~~

年廿八因為唔係公眾假期，圖圖依然要上游泳班、小一面試班同畫班，所以又無左一日，幸好果日夜晚都叫去左維園快行左一個圈，都叫行過年宵市場。

年廿九去左海洋公園，所以又係無左一日，仲要係超攰~~~~~，由十二點去到玩到七點睇完表演先走，一上車圖圖已經即時瞓著左......

雖然媽媽都好攰，但第二日就係年初一，要拜年，所以媽媽都要開工，年廿九夜晚快快手手做左幾條迷你鯉魚年糕同無糖桂花糕比姨婆。

今日雖然係年初一，但都要開爐，因為點都要做D野去拜年做賀禮，媽媽唔想買野，因為平既唔好食，貴既媽媽又真係覺得貴，仲要唔見得好味過自己做，加上311日本地震後，因為媽媽怕死，所以極少買日本既食物，選擇變得更少。

好在初一朝早食既係盤菜，唔駛自己煮，所以好快媽媽可以開工，今日一共做四條彩繪蛋糕卷，其中一條係無糖既，不過時間既關係，個樣唔多靚呀，最大敗筆係我搵唔到我枝超幼寫字筆，搞到我要用大枝毛筆去寫蛋糕卷上既祝福語，D字好樣衰，不過雖然係咁，媽媽係真心祝福大家，希望大家可以過順順利利既一年。

2012年1月15日星期日

團年飯 - 秘製羊腩煲、發菜蠔鼓炆冬菇

雖然仲有一個星期先到過年，但係因為下個星期日媽媽計劃左同圖圖去海洋公園，所以決定提早做節。

今日既餸菜媽媽唔駛點做，原因係今次既餸一係係買既、一係就係由爸爸或者嫲嫲教路，所以媽媽只係負責炒菜，且洗米煮飯，真係超舒服，不過今次爸爸同嫲嫲教既都係超好味，所以要分享食譜呀。

秘製羊腩煲

羊腩　　　　　２　　　ｃａｔｔ
東菇　　　　　１５　　ｐｃｓ　　　（浸軟）
炸支竹　　　　２　　　ｐａｃｋ　　（過熱水，沖走啲油）
冬筍　　　　　１　　　ｃａｎ　　　（切片）
馬蹄　　　　　１　　　ｐａｃｋ
竹庶　　　　　１　　　ｐａｃｋ
大蒜　　　　　ｆｅｗ　ｓｌｉｃｅｓ（白色切斜片留白灼用，綠色原條留用）
南彊　　　　　１　　　ｐｃ　　　　（切四五件）
五味醬　　　　　　　　　　　　　　（雜貨店買，配2斤羊份量）
花椒　　　　　ａ　ｌｉｔｔｔｌｅ　ｂｉｔ
八角　　　　　３－４　ｐｃｓ
彊　　　　　　ｆｅｗ　ｓｌｉｃｅｓ（幾片）
冰糖　　　　　１　　　ｐｃ　　　　（一件）

先煲滾一煲水，燙後先放一半竹庶在底，放入綠色大蒜、南彊及花豉八角，再放入羊腩
大火滾一會，再細火煲一小時
之後只要回羊腩，並且啤水約十分鐘
大火爆彊片，再爆東菰，東筍，馬蹄，再放羊加五味醬，炒至香
加水及冰糖和支竹，最後放另一半竹庶，大火，滾一會再細火蓋煲一小時
之後熄火，不動半小時
再開火炆一小時
竹庶不要，轉邊爐煲即可

醬汁：
腐乳
雙蒸酒
沙糖
椒絲

腐乳加雙蒸酒壓溶，加入沙糖椒絲即可。

髮菜蠔鼓燜冬菇

薑　　　　　ｆｅｗ　　ｓｌｉｃｅｓ
瑤柱　　　　６－７　　ｐｃｓ
冬菇　　　　２０　　　ｐｃｓ
蠔鼓　　　　２　　　　ｃｕｐｓ
髮菜　　　　１　　　　ｃｕｐ

起鑊爆薑，加入蠔鼓炒香，加入酒，再炒一會盛起
不用洗鑊，放入瑤柱、冬菇、酒，炒一會，再加入冬菇水燜半小時至焾
加入蠔鼓及髮菜、蠔油、糖、生抽再燜一會

外賣鮑魚

今晚仲有鮑魚，不過係買既，呢樣用太多時間，我諗我有排先會學整，最搞笑係圖圖，因為鮑魚中間比較硬，小朋友比較難咬開，所以切左２隻既邊比佢食，一食圖圖就問，呢樣係咩黎嫁？媽媽答係鮑魚。佢又問點解會有鮑魚食嫁。媽媽答話因為食團年飯羅。問佢好唔好味，仲話好好味，仲即時自己用筷子夾左一大舊放入口（呢個囝平時係唔會自己夾餸，今次認真識食！）

蒜片炒豆苗

2012年1月13日星期五

小朋友學整包 - 麵包布甸

今日小行5個小友黎左媽媽屋企學整包，原本媽媽以為時間好充裕，原來當每個步驟都要俾每個小朋友輪住試下同睇下，都只係係啱啱好。

媽媽一早問陳老師需唔需收埋d玩具，陳老師話唔駛，想睇下小朋友既定力。

結果係都ok既，不過d小朋友就對眼仔不時會瞄過去d玩具度羅!

麵包布甸（６ｘ１０吋模）　

麵包
蛋　　　　　３　　　ｐｃｓ
奶　　　　　１５０　ｇ
淡忌廉　　　１５０　ｇ
糖　　　　　４０　　ｇ
冧酒提子乾
雲呢拿油
玉桂粉
黃糖

麵包切小塊放入焗盤中
奶略為加熱，加入糖攪勻，再加入淡忌廉及雲呢拿油
蛋漿倒入焗盤中，用叉略壓麵包至浸透蛋液
撒上適量肉桂粉及提子乾
２００Ｃ隔水焗３０分鐘
布甸上撒上黃糖，再焗１０分鐘（不需隔水）

今日因為時間關係，所以無影相，老師好似影左Ｄ，如果有既遲Ｄ補返。

2012年1月12日星期四

為小朋友茶點作預備 - 楓糖麵包

聽日圖圖學校既中文project班會黎媽媽屋企學做麵包，一班小朋友包括圖圖一共5個小朋友，小朋友們會由大約下午1時半至3時45分，期間會有茶點時間，所以媽媽要準備茶點。

原本媽媽考慮過焗戚風蛋糕，貪佢好味又食得乾淨，後來諗下佢地今次黎學習既主題係麵包，茶點既主題不如就做返麵包，但一般麵包小朋友都成日食，唔會有咩驚喜，所以後來就決定左做面包布甸，貪佢暖暖地，甜甜地，小朋友一定食得開心。

今次麵包布甸既包包用左超鬆軟包既食譜，但就用左楓糖代替蜜糖，貪焗出黎時會香D。

楓糖麵包

2012年1月11日星期三

AIRFRYER肉鬆角仔 - 牛油皮版

尋日做左酥皮版，但覺得仲未夠鬆化，其中可能係改左用生油，同埋包餡包得太多，今日皮料改左用另一個食譜，亦都包少左DD餡，整完後效果好好，但係咀刁既爸爸仍然覺得因為全部餡料都係肉鬆，所以好似好乾咁，下次我會試下改食傳統角仔餡料再做，如果真係好味，會做多少少俾姨婆試下。

焗牛油皮角仔

2012年1月10日星期二

AIRFRYER肉鬆角仔 - 酥皮版

買左AIRFRYER哽係想試下一D平時唔會整既炸野，平時我好炒開油鑊炸野食，一來怕有油煙，二來又怕D油有排用，仲有就係怕唔健康。

今次試左一個網上找到用水皮油皮，即中式既酥皮做既角仔，由於我怕皮式脂方，所以改左只用生油搓皮。

酥皮角仔皮料（約２０隻）

水皮
高粉　　　４０　　　ｇ
中粉　　　８０　　　ｇ
生油　　　２　　　　ｔｂｓｐ
鹽　　　　１／３　　ｔｓｐ
水　　　　４　　　　ｔｂｓｐ

油皮
低粉　　　７０　　　ｇ
生油　　　３５　　　ｇ