展圖豬正日生日呀！

今日係星期三，返playgroup既日子，亦都係展圖豬既正日生日，由於今日miss haley有dd唔舒服，所以由miss angie代課，不過唔緊要，因為miss angie都好有愛心，佢知道展圖豬今日生日，仲同佢唱生日歌添！

因為媽媽講過話以後展圖豬生日都一定會做蛋糕比佢，所以之後放左學，媽媽就去左citisuper買stawberry，預備展圖豬既生日蛋糕~~~~~

番左屋企之後，等展圖豬訓午覺時，媽媽就好快手咁開始做蛋糕啦~~~~

整左一半，發覺d cream唔知係咪雪得太耐(因為之前用都係幾個月前既事~~~~)所以變左油水分離打唔起，好在媽媽醒起外國好多蛋糕都係用果醬代替cream，所以就用左jam代替，慶幸係今次媽媽做蛋糕既裝飾唔係打算用cream，而係foudant，所以一d都唔會影響蛋糕既外觀，而且屋企一向用既jam都係sugar free既，所以反而仲啱bb仔食~~~~比起用cream健康！

蛋糕終於整起，不過由於今日爸爸約左朋友食飯，所以媽媽餵左展圖豬晚飯先，再帶展圖豬出去食飯，諗住返到屋企再切蛋糕~~~~~~

不過可能展圖豬太攰，食飯中途已經扭眼訓，然後訓著左，不過好在返到屋企又醒番，可以切蛋糕~~~~~

唔知係咪訓左一陣，切蛋糕時超精靈~~~~

呢個就係媽媽第一次完全用foudant做裝飾既蛋糕~~~~

由於上次生日會個蛋糕展圖食左一啖就唔肯食，媽媽諗究竟係展圖豬唔鍾意食蛋糕、定係唔啱口味又或者係不在狀態，不過今次展圖豬食都好肯食，終於仲食左八分一個蛋糕添！

至於我地大人覺得用果jam代替cream既蛋糕味道係點呢，如果係鍾意食開忌廉蛋糕既，可能會覺得無咁好味(爸爸評語)，不過如果一向覺得忌廉蛋糕太漏既話，就覺得唔錯，個感覺好似食生果咁(婆婆評語)！

展圖豬一歲生日會

今日係黎展圖第一個生日會，媽媽同爸爸今朝大約八點幾起身食完早餐就出左舖頭，首先爸爸同個助手執今日要用既野~~~~~

而媽媽一返到舖頭就接到蛋糕舖既電話話蛋糕已經送到地鐵站可以攞得，所以即時九秒九去地鐵站攞蛋糕，見到個蛋糕即時有驚喜~~~~因為之前訂果時我要五磅，而佢個版係三磅既，所以見到個蛋糕時個樣係有d唔同，不過係靚左，所以媽媽覺得好開心~~~~~~而且佢仲做大左，變左做一個六磅蛋糕添！

之後媽媽去左吉之島買壽司，原因係知道好多朋友都鐘意食壽司，而生日會場地又無，不過徵詢之下佢俾我地自己帶，所以媽媽之前已經諗左要去買，不過去到吉之島原本打算買兩盆大既，貪佢多d選擇又靚d，不過可能真係太早去到，淨係得一d中型size，無選擇之下都唯有買啦，最多咪買double~~~~~

之後媽媽就一手蛋糕，一手壽司番舖頭，繼續完成昨日未完成既dd佈置物品，大約十一點半我地就出發去生日會場地。十二點左右去到，媽媽額頭即時有幾條黑線，點解我話十二點到但仲未開門？即時打電話俾cafe既負責人，佢問我唔係兩點先開始party咩~~~~~~唔係掛我一早講定話十二點黎到開始set場，一點會有客人黎喎~~~~~佢把聲仲要係未起身未開聲果隻，不過好在佢話大約二十分鐘黎到，之後媽媽、爸爸、同佢一位朋友jay(佢係特登早d黎幫手既)就去樓下飲杯野等一下~~~~

媽媽響生日會前訂左d氫氣球做佈置，順便打算俾d小朋友走時可以拎番個~~

呢d就係媽媽親手為展圖豬做既佈置，其實仲有少少其他野，不過因為唔夠時間set場而放棄左

二十分鐘後番上去，感謝主~~~~~已經開左門，而野食都開始準備緊，而且唔知係咪因為佢地知道係小朋友生日會既關係，仲有一個波波池添!之後我地即刻set 場，不過可能因為我地遲左set場既關係，所以都陸續有d親戚朋友出現~~~~~

之後搞掂晒，婆婆同帶埋展圖豬出現，點解展圖豬會咁遲一點先黎?其實因為媽媽叫婆婆唔好太早黎，擔心展圖豬唔夠訓太攰會扭計，情願佢朝早訓多一覺。

再之後係大家差不多黎到，生日會開始，而媽媽就忙著招呼客人，同要keep住睇d食物(因為可能始終佢地遲左開始做，所以d野出得好慢~~~~~)，間唔中同展圖豬玩下，而爸爸就為左d game而忙個不停~~~~~~

食到差不多d遊戲正式上場，第一個係估展圖豬於早前既爬行大賽爬第幾，大家都可以估下架

呢段就係爸爸為展圖準備既片段

之後我地仲有兩個朋友同親戚分別表演風笛同璜管，然後就係切蛋糕，切蛋糕前，就係播montage既時間

呢個就係展圖豬既第一個生日蛋糕啦~~~~~！！！

因為我地預先準備左一d小道具俾大家做一d造型，而現場我地有攝影師幫手影相同即時print out d相，所以我地投票選出扮野大賽既得主，同埋頒獎~~~~~

我地同婆婆都有參加扮野大賽架~~~~~！

另外中間媽媽都派左guest book俾大家寫番少少祝福俾展圖豬，不過個guest book要再貼dd 相加工，呢幾日整好我會俾大家睇~~~~~~

至於更多今日生日會既相我會響爸爸呢兩日整理後再加上一d朋友影既相放上黎俾大家欣賞。

展圖豬生日會籌備工作 - 佈置及遊戲準備篇

尋日媽媽為左展圖個montage做到天光先訓，不過因為今日媽媽既工作係要準備展圖生日會既場地佈置，所以十一點就自動彈起身。

而爸爸今日就不停咁剪接，為左展圖豬聽日既生日會遊戲作準備。

今日十一點幾起身媽媽同婆婆落左街食飯之後就返左舖頭，執拾展圖豬聽日生日會要用既野，因為實左太多野，所以好多都係放左響舖頭，打算到時一車車過去。另外媽媽就準備場地佈置，至於佈置左d咩，大家過兩日黎睇相啦！

咖啡慕絲蛋糕...挑戰foudant

因為過幾日展圖豬就生日啦！今次媽媽想試下用foudant做蛋糕裝飾~~~~由於之前未學過又未接觸過，所以上網睇左一d資料！

咁展圖豬既第一個蛋糕媽媽哽係唔會用黎較飛，所以今日媽媽試下用foudant做個咖啡慕絲蛋糕上既玫瑰花裝飾~~~~~至於個蛋糕，就俾爸爸攞去請朋友食！

今次個蛋糕用左新既食譜，因為想試下有無方法可以令個蛋糕鬆軟d~~~~

7吋蛋糕 (170C焗23分鐘)
蛋3隻、糖60克、麵粉60克、蛋糕乳化劑1茶匙、油15克

結果出黎個蛋糕係略甜少少，至於鬆軟程度，就同平時差不多，唔知媽媽幾時先可以整到貴族蛋糕果D蛋糕咁鬆軟~~~~~如果有朋友知道，請高抬貴手話我知！

展圖豬生日會籌備工作 - montage準備篇

因為展圖豬既生日會場有有lcd電視，所以媽媽打算會播一段montage，由於展圖豬由出世到依家一歲拍落唔少相及video，要揀番出黎做都要相當時間，所以呢幾日媽媽就埋頭苦幹，做佢既一歲montage。

媽媽淨係capture佢既video都已經用左一日，仲要加多兩日做剪接，睇下人地既1st birthday montage有無咩好既idea用咩歌仔~~~~~~因為唔想要太悶，又或者太普通既歌，終於揀左一首，咁又搞左半日，之又要揀呢一年入面影既相。

總之媽媽今晚決定無論如何都一定要做好呢個montage先可以訓，因為之後仲有一d生日會既準備工作~~~~~~如果唔係之後就會唔夠時間做啦！

不過好在婆婆見媽媽咁多野做，所以主動話呢兩日全力幫手take care展圖豬，真係唔該晒婆婆~~~~~

今日搬傢俬呀！

因為展圖豬依家越黎越活潑，有時自己坐坐下都會因為玩玩具/攞玩具搞到失平衡跌低左，日日都差不多有中向後既機會，媽媽見到真係好肉赤。

所以諗左一排應該點將d傢俬重新擺放，等所有展圖豬既活動空間都可以舖上地墊，至少跌都無咁甘~~~~~！而且媽媽發現屋企仲有唔少既家居陷阱，為左呢隻寶貝豬既安全，所有既野都要整過晒！早上個星期爸爸已經將兩個鞋櫃鑽左上牆，因為怕展圖豬會手多多搞個櫃，怕個櫃會跌落黎責到佢！另外再買多d地墊，等可以足夠舖晒成個廳連走廊~~~~~~

終於今日爸爸有心情，媽媽又有時間去搬過d傢俬！我地夜晚六點開始執，搞到成夜晚十一點，先至放好晒，清潔晒d地方~~~~~不過好多野都仲係堆響書枱上面咋，要買番d tray先可以整理好d雜物~~~~~

雖然執左大半日好攰，不過個廳既活動空間真係大左好多，我都好開心佢多d地方爬，而又安全唔驚佢跌親！

今日媽媽再次去spotlight啦！

因為早兩日響kiddle party supplies訂一幅winnie the pooh既birthday party背景，所以今日要去攞，順便去攞尋日晒既invitation card。

之後媽媽就去左sportlight，今次主要係要買d汽球，諗住當日做少少汽球佈置 (因為媽媽上星期買左本汽球佈置既書，所以諗住試下！)

去到sportlight發覺原來汽球款式無想像中咁多，而且都唔齊色，不過都唯有買住先。

因為之前媽媽睇過幾間舖頭d guest book都唔係好啱心水，雖然本來諗住再去papryus睇下先，不過因為媽媽懶，所以順便買左一d材料diy做當日既guest book，諗住可以俾當日黎既朋友寫番少少說話，同貼下相。

就係咁行下行下，就行左成3個鐘，成個人虛脫咁滯~~~~~

另外要報告一下，展圖豬依家已經開始學企啦！成日響屋企爬黎爬去，有時又會自己禁住d梳化、木箱、層板企起身，而且仲企得幾耐添~~~~~上個星期佢仲未學企嫁，前幾日都未得，不過呢兩日就企得好快~~~~~

今日訂左蛋糕同print invitation啦~~~~

Invitation Card 1st Version，媽媽覺得展圖豬呢張笑得好可愛，不過婆婆同爸爸都話第二個version張相得意d，所以要改！

Invitation Card Final Version，呢個就係展圖豬成人扮既「貓樣」啦！

今日媽媽終於拎左之前做好稿既invitation去晒相舖度print out，因為唔係請好多人，所以都係print 20張咁大把！

另外媽媽終於contact到峨嵋cake shop既人啦！所以今日終於訂左展圖個生日蛋糕~~~~媽媽對呢個蛋糕好有期望嫁，因為見佢d相好靚，而且我知容祖兒最近一次生日會都係搵佢地整蛋糕，所以雖然媽媽覺得個蛋糕好貴，都訂左5lbs~~~~~~呢個蛋糕差不多用左生日會既1/5 budget~~~~~~

不過有一樣可惜既係，因為我訂果個係3D Cake，而佢係用軟糖做既，所以要早一日做定，雖然網上睇到d人話都好食，但係都覺得有dd唔夠完美~~~~~