無敵海南雞飯（附食譜）

海南雞飯其實整過好幾次，次次都試唔同食譜，但係都唔滿意，最唔滿意係個油飯，永遠都唔及街外既咁香咁好味。今日我終於唔再跟人地食譜，自創新食譜，同改左做法，炒緊D米時已經勁香，煲完煲飯都覺得幾正，但係仲係爭咁D。終於我加左樣野，撈落D飯，就好味到令我大叫出黎，超開心呀~~~~~！

呢個海南雞飯既雞固然勁滑，而且好易整。但個油飯先至係重點，爸爸、圖圖同婆婆一致讚好。圖圖食得勁快，爸爸重要添飯添！真係十級開心呀！

大家真係要試下整呢個，真係好味到震，我好少咁hard sell~~~~~(笑)

海南雞飯


雞　　　　１　　　隻
麻油　　　適量

醃雞料
薑蓉　　　３　　　湯匙
花雕酒　　２　　　湯匙
鹽　　　　１　　　湯匙

1. 雞身用雞腔內塗上醃料，醃半天
2. 用微波爐保鮮紙將雞包幾層
3. 隔水蒸約25分鐘至熟
4. 剪開保鮮紙，在雞上塗上麻油
5. 再蓋上原來剪開的保鮮紙
6. 放20分鐘至雞涼後斬開

油飯
米　　　　３　　　杯
香茅　　　２　　　條
薑蓉　　　１　　　湯匙
乾蔥　　　２　　　粒
芫茜　　　３　　　棵
蒜頭　　　４　　　粒
油　　　　２　　　湯匙
雞油　　　適量
斑蘭葉　　２　　　塊
水　　　　２５０　ｍｌ（打斑蘭葉用）
雞湯　　　２５０　ｍｌ
水　　　　適量　　　　（煮飯用）

1. 香茅切下根部約3吋留用
2. 芫芫切下根部留用
3. 打斑蘭葉的水與斑蘭葉同煮至滾
4. 放入調埋機打成斑蘭水後過篩待用
5. 香茅、薑蓉、乾蔥、蒜頭、芫茜根及油，放入調理機打至成泥狀
6. 將以上材料加入雞油，炒至5分鐘左右香
7. 加入已洗的米略炒
8. 加入斑蘭水略炒
9. 以上材料放入飯煲內，加入雞湯及水
10. 以一般程序煮飯
11. 飯熟後加入蒸雞後剩下的雞汁撈勻

* 斑蘭水應該有半杯左右，所以煮飯時，雞湯+水的總水量要扣減約半杯水，不然飯會太濕
* 如果買唔到斑蘭葉，唔要都可以，不過我覺得會無咁香

如果大家想知多d，add我facebook專頁啦 ^^，歡迎大家入黎傾計
https://www.facebook.com/#!/SkylarMum

花鵰煀雞（玻璃朱食譜）

一向有上個FACEBOOK既MIELE X LC GROUP，尋日見到Blogger玻璃朱出左呢個食譜，八掛睇下！嘩~~~~乖乖不得，原來係米之得獎名菜既食譜，仲要材料簡單，做法又唔算複雜，今日就就野試下整！呢個餸有d似鼓油雞，不過爸爸話好味好多，婆婆就最鍾意食d冬菇~~~~

花鵰煀雞

雞　　　　１　　　隻
蔥　　　　２　　　條
薑　　　　４　　　片（厚）
鮮冬菇　　４　　　両

醃雞料
生抽　　　２　　　湯匙
老抽　　　１　　　湯匙

汁料
花雕　　　１００　ｍｌ
清雞湯　　２５０　ｍｌ
水　　　　３００　ｍｌ

汁料調味
冰糖　　　１　　　塊（中）
老抽　　　１　　　湯匙
蠔油　　　１　　　湯匙
花雕　　　８０　　ｍｌ

1. 生抽及老抽醃雞最少半小時
2. 爆香薑蔥，再加入冬菇炒一下
3. 加入雞煎至外皮金黃
4. 加入汁料，先較大火至滾，再較最小火
5. 先煑雞背10分鐘，再煮雞胸15分鐘最出雞
6. 取出雞，放入雪櫃15分鐘
7. 汁大火將汁料煮至濃，約收一半汁料，過篩後加入冰糖、老抽及蠔油再略煮
8. 斬雞後回鍋，面上放上鮮冬菇
9. 加入汁料，以小火煮數分鐘，期間不斷淋上面
10. 加入花雕再煮1分鐘

(食譜改自玻璃朱)

如果大家想知多d，add我facebook專頁啦 ^^，歡迎大家入黎傾計
https://www.facebook.com/#!/SkylarMum

法式薄餅(附食譜 )

其實今日原本諗住出個香茅蒜香骨既食譜，之但係婆婆響不知情既情況之下煮左，原本我諗住用焗熟，但婆婆用左煎炆既方法，雖然都好味，但係個賣相變到一patpat真係勁肉酸，完全唔出得街。而另外一個食譜泡椒雞翼都勁正，之但係太好味，整好左拎出黎時唔記得影相就已經清碟，所以今日唯有出呢個法式薄餅食譜。

呢個薄餅其實唔難做，反而最緊要係快手，同埋用塊刮板將D粉漿刮薄D，如果唔係太厚既話就無咁好食。

法式薄餅（５塊）


蛋　　　　４　　　ｐｃｓ
鹽　　　　１／４　ｔｓｐ
低粉　　　１３０　ｇ
奶　　　　２４０　ｍｌ
牛油溶液　５　　　ｔｓｐ

1. 拌勻所有材料
2. 放入雪櫃雪1小時以上
3. 用平底鑊煎

*因材料內已有牛油成份，所以煎時不需再下油/牛油
*薄餅可以平放，中間隔保鮮紙，於冰格可存放1個月左右

辣京醬炒黑豚肉（附食譜）

今日紅雨，公司放左半日假，原本無諗無煮飯，見有時間，就放左工去買餸煮番餐。點知返到屋企無人，後來先知原來老公、圖圖同奶奶去左沙灘游水，圖圖當然開心。但好彩我唔知，亦都無事發生，如果唔係我會擔心危險，其實我唔係好明只係玩啫點解要揀呢d時間......

其實原本我係諗住煮回鍋肉，搵左幾個食譜，都唔係好相同，於是求其揀是但一個張相靚D既去煮。不過煮出黎雖然都幾惹味，但係我覺得唔似回鍋肉，所以我唔想叫佢做回鍋肉，反而佢個味有少少似京醬肉絲，但又有少少辣，所以俾過第2個名佢。

辣京醬炒黑豚肉

黑豚肉片　　１　　　包
青椒　　　　１　　　個
椰菜　　　　１／２　個
甜麵醬　　　２　　　湯匙
辣豆板醬　　１　　　湯匙
老抽　　　　１　　　湯匙
糖　　　　　２　　　茶匙
蒜頭　　　　５　　　瓣
指天椒　　　２　　　隻

1. 蒜頭切薄片，指天椒切細
2. 黑豚肉片洗淨，用廚房紙印乾
3. 青椒洗淨切丁，椰菜洗淨切塊
4. 甜麵醬、辣豆板醬、老抽及糖撈勻
5. 蒜頭及指天椒爆香，加入肉片煎至金黃
6. 加入青椒及椰菜炒至熟
7. 所有餸菜撥至一面，另一面下醬料略炒
8. 所有材料少勻


如果大家想知多d，add我facebook專頁啦 ^^，歡迎大家入黎傾計
https://www.facebook.com/#!/SkylarMum

腐乳無水蒸雞翼（附食譜）

用LC無水蒸餸，聽就聽左好耐，但係整就只係第2次。頭1次我就只係無水煮芽菜，太簡單，唔算數。今次雖然都係簡單，但整肉類感覺似真係整一碟餸出黎，無咁HEA~~~~~

食左真係好滑，下次可以整蒸雞件，一定好鬼正！最正係原汁原味，同埋好慳柴火，原來用LC都可以環保 :P

腐乳無水蒸雞翼(附食譜)


雞翼　　１５　　隻
腐乳　　４　　　件
蒜蓉　　１　　　茶匙
糖　　　１　　　茶匙
酒　　　１　　　湯匙
豆板醬　１／２　茶匙

1. 所有調味放入保鮮袋渣爛
2. 雞翼放入保鮮袋內和調味料混和，要確保每隻雞翼都沾勻調味料，醃最少半小時
3. 將雞翼舖平LC內，加入1湯匙水，蓋上蓋
4. 中火煮4分鐘，小火煮5分鐘，焗7分鐘

(食譜改自鬼嫁)

* 因圖圖不能吃辣，所以我用原味的腐乳及只下1/2茶匙豆板醬，想惹味D可以用辣腐乳，及加1茶匙豆皮醬，再加少少椒絲。
* 我喜好甜D，下次會多加1茶匙糖，即總共2茶匙。
* 我用既係27 OVAL，大家煮既時間要就反自己個煲去加減時間
* 用果唔用LC，可以唔駛加最後果匙水，就咁蒸15分鐘

如果大家想知多d，add我facebook專頁啦 ^^，歡迎大家入黎傾計
https://www.facebook.com/#!/SkylarMum

圖圖繪本

今日執執下野，發現圖圖響一本平時畫公仔既簿仔入面畫&寫左一個小故事 ^-^，雖然文法同字都錯晒，但比起上年同時期已經進步好多(果時佢係一個文盲)，好安慰！希望下年升小一可以KEEP住進步！


The Robot


One day the robot coming at the school.


And then the other day have a new robot but it is in the box. But who open it the box ?


It's our robot! "It's ours!" said the boy.


And then the other day mum and dad took the boy to the playground t!o play. And then the home have a lot of fire "Oh! No!" said the boy. "Help! Why my home have big fire? Oh! No!"


Finally they lost the home.


如果大家想知多d，add我facebook專頁啦 ^^，歡迎大家入黎傾計
https://www.facebook.com/#!/SkylarMum

超簡單的藍莓乳酪雪芭（附食譜）

早排得閒上網睇到Jamie Oliver整呢個雪芭既方法，覺得又簡單又快，而且健康，今日打開雪櫃，發覺罐原味乳酸原來爭幾日就到期，所以就諗住整呢個，順便清埋雪櫃入面既急凍藍莓同香蕉。

簡簡單單10分鐘搞掂，係之後隔1個鐘左右拎佢出黎刮鬆佢，刮2次就搞掂，雪多陣可以食得。

呢個夏天勁啱酸酸甜甜又唔太肥，鍾意可以落脫脂乳酪添！可惜圖圖有哮喘唔佷得，如果唔係佢一定鍾意呢！

藍莓乳酪雪芭


原味乳酪　　２５０　ｇ
急凍藍莓　　２００　ｇ
急凍香蕉　　５０　　ｇ
蜜糖　　　　２　　　ｔｂｓｐ

1. 乳酪、藍苺、香蕉及蜜糖用攪拌機打勻
2. 試味，如果覺得不夠甜加多一點蜜糖
3. 放入冰格
4. 隔1個鐘左右拎佢出黎刮鬆佢，刮2次後再雪一下

* 原食譜只係用mixed berry

如果大家想知多d，add我facebook專頁啦 ^^，歡迎大家入黎傾計
https://www.facebook.com/#!/SkylarMum

好味台灣牛肉麵（附食譜）

之前上網見到有個台灣牛肉麵食譜，好易整，材料都容易買，所以今日襯圖圖學校家長日，請左半日假，返屋企煮定個湯底做晚餐，然後帶埋圖圖返學校見家長攞成績表。

今次既家長日比之前兩次有少少唔同，班主任Mrs. Stock有一個folder俾圖圖，要圖圖揀番一個最鍾意既topic present俾我聽，同埋要講下個topic入面既資料係點搵返黎。之後老師又會講下圖圖上堂既情形。

今次圖圖成績都唔錯，英文老師既評語唔錯，數學話佢係全班最好，PE都非常好，係中文同音樂差少少，美術反而一般。

攞完成績表後就帶圖圖上公民數，然後返屋企煮好埋淨返果D，等圖圖上完堂就可以即刻食。原來今次係媽媽第一次煮關廟麵俾圖圖食，圖圖話好好味呢！

好味台灣牛肉麵（５碗）


牛肋骨　　　１。５　磅
蕃茄　　　　３　　　個（中）
洋蔥　　　　２　　　個（中）
蔥　　　　　數條
薑　　　　　３　　　片
蒜頭　　　　６　　　瓣
芽菜　　　　半　　　斤
生抽　　　　１８０　毫升
酒　　　　　２　　　湯匙
五香粉　　　１　　　茶匙
蕃茄醬　　　２　　　湯匙
豆板醬　　　１　　　湯匙
卥包　　　　１　　　包
水　　　　　１。５　公升
冰糖　　　　１　　　粒（大）
酸菜　　　　１　　　件
芫茜　　　　１　　　把

1. 牛肋骨洗淨出水
2. 蔥分蔥白及青蔥，蔥白切條，青蔥切碎，薑及蒜頭拍扁
3. 蕃茄切件，洋蔥切片
4. 爆香蔥白、薑片及蒜頭，加入牛肋骨略炒，再加入蕃茄及洋蔥略炒
5. 加入鼓油、酒、五香枌、蕃茄醬、豆板醬及卥包，再加入水煮滾。
6. 收細火炆1.5至2小時，至牛肋骨焾。
7. 酸菜洗淨，浸半小時，切條。
8. 用另一個煲煮麵，烚芽菜。
9. 碗中放麵、芽菜、酸菜、牛肋骨、芫茜及青蔥，加入牛肋骨湯。

(食譜改自baby kingdom - robin017)

* 我自己果碗仲要加多一茶匙麻辣醬，超正！
* 美國牛肋骨、卥包同麻辣醬我都係響吉之島買。

如果大家想知多d，add我facebook專頁啦 ^^，歡迎大家入黎傾計
https://www.facebook.com/#!/SkylarMum

盆栽甜品 - 朱古力慕絲（附食譜）

今日父親節，整左餐都算係豐富既晚餐一家人食，但都係簡單野煎牛扒、牛油蒜蓉焗虎蝦、芝士焗蠔、藍青口，仲有阿囝指定既刁草薯仔沙律，再加老公親自下廚既薑蔥炒蟹蚶。

係甜品得意D，可以同大家分享下，其實都係簡單野，只不過係朱古力慕斯撒上OREO，再加塊小小既薄荷葉。呢個造型係之前響台灣既一個BLOGGER度睇到，不過已經唔記得係邊個，但覺得幾得意，所以一路記到依家。

朱古力慕絲（４杯）


黑朱古力７０％　１００　ｇ
淡忌廉１　　　　３０　　ｇ
淡忌廉２　　　　２００　ｇ

1. 黑朱古力坐溶
2. 淡忌廉1加熱至80C，倒入熱溶朱古力內攪勻
3. 淡忌廉2加至有紋，加入熱溶朱古力用發發攪勻
4. 放入容器中冷藏

*薄荷葉要上枱前才插上，否則冷藏後會枯萎
*OREO要刮去夾心，再用麵棍弄碎，才可以造出大小不同泥土既感覺
*底層可用TIRAMISU/蛋糕/木糠布甸都可以

如果大家想知多d，add我facebook專頁啦 ^^，歡迎大家入黎傾計
https://www.facebook.com/#!/SkylarMum

非一般甘口咖哩（附食譜）

見到蘋果、朱古力同咖啡會諗起D咩？多數應該係Snack time掛~~~~~

我一向都鍾意食泰國咖哩，鍾意果噚辛香味。日本咖哩一向麻麻地，覺得就算係激辛，都唔多覺辣。

但之前見過另一位居於日本既BLOGGER也加子做甘口咖哩，唔係好似香港人求其落幾舊咖哩磚就算，落多左幾鍾香料，仲要加埋蘋果、咖啡同朱古力，好似我響電視睇到D日本人認認真真咁煮，所以諗唔通真係正好多？今日終於試左，真係好味好多。

甘口咖哩（５－６人份量）


西蘭花　　　　　２　　　個
甘荀　　　　　　２　　　條
薯仔　　　　　　２　　　個
洋蔥　　　　　　２　　　個
大蔥　　　　　　１　　　條
豬扒　　　　　　５　　　塊
蘋果　　　　　　１　　　個
白酒　　　　　　１　　　杯
日本濃口醬油　　２　　　湯匙
濃湯寶（牛）　　１　　　盒
茄汁　　　　　　２　　　湯匙
喼汁　　　　　　１　　　湯匙
蛋黃醬　　　　　３　　　湯匙
甘口咖哩磚　　　３種牌子，每種用１／４盒（大盒）
即溶咖啡粉　　　１　　　茶匙
牛奶朱古力　　　４　　　小粒
香葉　　　　　　２　　　片
芫茜籽　　　　　１／４　茶匙
小茴香籽　　　　１／４　茶匙
雜香草　　　　　１　　　茶匙
黑胡椒　　　　　１／２　茶匙
糖　　　　　　　１　　　湯匙
意大利蕃茜　　　適量

1. 西蘭花、甘荀、薯仔先淨切件，洋蔥及大蔥切片
2. 蘋果刨蓉
3. 豬扒拍鬆煎至金黃
4. 牛油下鍋炒香洋蔥及大蔥後，加入蘋果蓉及白酒
5. 加入濃口醬油、濃湯寶及水後煮滾
6. 加入甘荀、薯仔及豬扒中小火煮25分鐘
7. 加入西蘭花煮至半熟後，加入茄汁、喼汁、蛋黃醬、咖哩磚、咖啡粉及牛奶朱古力後
8. 再加入已切碎的芫茜籽、小茴香籽、雜香草、黑胡椒及糖攪勻後熄火
9. 放過夜後翻熱，撒上意大利蕃茜。

（食譜改自也加子）

*因為原食譜中有D材料比較難買，所以我用左其他野代替
*食譜中既份量係我自己調較，大家鍾意可以隨自己口味增減

如果大家想知多d，add我facebook專頁啦 ^^，歡迎大家入黎傾計
https://www.facebook.com/#!/SkylarMum

煎豬扒配啡磨菇蘋果汁（附食譜）

好耐都未煮過呢個餸，今日行過樓下超市見到啡磨菇做緊特價，而屋企琴日因為整洋蔥湯仲淨返半枝cider，所以就決定整呢個餸。呢個餸d汁好好味，拌意粉食係勁正架！

煎豬扒配啡磨菇蘋果汁


豬扒　　　　　　　　　　５　　　ｐｃｓ
橄欖油　　　　　　　　　２　　　ｔｂｓｐ
牛油　　　　　　　　　　２　　　ｔｂｓｐ
白菌切片　　　　　　　　１　　　ｐａｃｋ
拔蘭地　　　　　　　　　２　　　ｔｂｓｐ
紅蔥頭碎　　　　　　　　１　　　ｔｓｐ
Ａｐｐｌｅ　Ｃｉｄｅｒ　２５０　ｍｌ
清雞湯　　　　　　　　　１２５　ｍｌ
淡忌廉　　　　　　　　　１２５　ｍｌ

1. 豬扒以鹽及胡椒粉調味。燒熱一半橄欖油及牛油，炒香白菌後盛起。
2. 再以原鍋下餘下一半油份，蒜豬扒至金黃。
3. 反轉豬扒後再稍煎一會，灒蘋果拔蘭地，再加蔥頭碎炒香。
4. 加蘋果西打及上湯，慢火煮5分鐘至豬扒熟。盛起豬扒保暖。
5. 加入忌廉及白菌回鍋，慢火煮至稠，伴豬扒同食。

如果大家想知多d，add我facebook專頁啦 ^^，歡迎大家入黎傾計
https://www.facebook.com/#!/SkylarMum

洋蔥湯（附食譜）

好耐都無整洋蔥湯，早排上網睇master chef既食譜，見到又手痕，所以襯今日瑞午節放假，得得地閒，又唔駛煑飯(因為叫外賣pizza)，就整呢個湯。不過炒洋蔥真係好么攰，炒足成個鐘，真係可以減拜拜肉。

洋蔥湯


橄油　　　　　　１　　　　ｔｂｓｐ
牛油　　　　　　５０　　　ｇ
洋蔥　　　　　　２　　　　ｋｇ
香葉　　　　　　２　　　　ｐｃｓ
百里香　　　　　１／２　　ｔｓｐ
迷迭香　　　　　１／２　　ｔｓｐ
牛骨湯　　　　　１５００　ｍｌ
ｃｉｄｅｒ　　　２００　　ｍｌ
法包　　　　　　ｆｅｗ　　ｐｃｓ
ｇｒｕｙｅｒｅ　２５０　　ｇ（芝士既一種，超市入面既芝士專櫃應該會有
巴馬臣芝士　　　１００　　ｇ

1. 洋蔥切片
2. 熱牛油及橄欖油，加入洋蔥略炒
3. 加蓋中小火煮20分鐘，期間不時攪動
3. 開蓋炒至啡黃色
4. 加牛骨湯及cider煮至滾，再小火煲10-15分鐘
5. 法包上撒上芝士，250C焗3-5分鐘至金黃
5. 湯放入湯盅再加上烘脆法包

(食譜改自master chef)

*gruyere係芝士既一種，超市入面既芝士專櫃應該會有，無既話唔加都ok
*原食譜係法包放入湯再加芝士焗至金黃，我唔鍾意個包焾晒同吸晒d湯，所以分開2個步驟


如果大家想知多d，add我facebook專頁啦 ^^，歡迎大家入黎傾計
https://www.facebook.com/#!/SkylarMum

皮蛋酥

第一次做皮蛋酥己經是差不多20年前，當年是婆婆教我的，而婆婆的師傅則是一位酒樓大師傅。由於當年婆婆的食譜已丟失，所以唯有找網上的食譜試做，中途再隨自己的回味略位加減材料。美中不足是皮料食譜有一點問題，所以很難包餡，導致收口較厚，下次要再試另一個皮料食譜，希望有較佳效果。

皮蛋酥


每顆皮蛋酥用的餡料如下：

皮蛋　　　１／２　個
紅薑　　　４　　　克
低榶蓮蓉　３０　　克

皮餡後，面掃上蛋黃，180C焗20分鐘

皮料食譜暫不公開，因為覺得今次做的不算太好。

*皮蛋先去殼蒸10分鐘待涼才切開

如果大家想知多d，add我facebook專頁啦 ^^，歡迎大家入黎傾計
https://www.facebook.com/#!/SkylarMum

日式煲仔飯 - 鯖魚釜飯（附食譜）

抽到好學校，搞埋註冊，一身都鬆晒，又有心情煑飯。

早排見到FACEBOOK 既LC GROUP友整過鬼嫁呢個食譜，話超好味喎~~~~~，搞到我即刻好想煮，仲要咁啱屋企有鯖魚響度，正呀可以幫手清下個冰格！

之但係點知屋企既味淋同冷麵汁都用鬼晒，所以要買左先整到！圖圖話好味，仲用行動証明左，今日食多左！

用LC煮煲仔飯之前聽唔少人整都話好容易，今次係自己第一次用佢黎煮煲仔飯，估唔到都幾快，飯焦唔算多，而且比用瓦煲容易洗，所以下次煮煲仔飯都會用LC呢！

鯖魚釜飯（４人份量）


鯖魚　　３　　　片
薑蓉　　適量
鹽　　　３／４　茶匙

米　　　３　　　杯
味醂　　３　　　湯匙
酒　　　３　　　湯匙
冷麵汁　２　　　湯匙
淡口　　１　　　湯匙

1. 米洗淨，加入味醂、酒、冷麵汁、淡口及3杯水於LC內浸半小時
2. 鯖魚先淨，抺上鹽
3. 中火加熱至水滾，約3 分鐘，期間不段用筷子攪動米，避免黏底
4. 蓋上蓋再煮至鍋邊有蒸汽冒出，約2分鐘30秒
5. 轉小火煮3分鐘
6. 放上鯖魚及薑蓉，蓋上蓋，中火煮30秒
7. 開蓋轉小火煮12分鐘，至收乾水
8. 熄火蓋上蓋焗10分鐘

*可用2茶匙日本鼓油代替1湯匙淡口


如果大家想知多d，add我facebook專頁啦 ^^，歡迎大家入黎傾計
https://www.facebook.com/#!/SkylarMum

心情反覆

呢期無出食譜，其中之一個原因係俾BK BLOCK左個ACCOUNT，本來我好有心機，想做個LIST俾BK既SIS睇，諗住方便佢地睇返D舊食譜。之佰我我已經好小心咁CHECK入面既相，張張都CLICK過係無LINK過黎YAHOO BLOG，以免佢封POST，但都比板主話有喎，仲要封埋戶，禁止訪問。激到我死死下~~~~~事關果個POST我整足2日，摷播晒D舊食譜舊相出黎~~~~~~

除左以上既事件外，仲有一件人生大事。就係小一中央分配學位既大日子(俗稱大抽獎)，識我既朋友都知我勁緊張圖圖小一入咩學校。

由4個月大開始帶佢上PLAYGROUP，之後歲幾時為豬流感事件怕出面多菌，就搵左個姐姐黎屋企教佢。到2歲時怕佢入唔到好既NURSERY，亦係語言黃金期，情願比多少少入一間無學券既小班教學既國際幼稚園。K2時見佢英文追唔上同學程度就暑假時搵NET同佢1星期5日補足2個月。

到今年入左國際YEAR 1(即K3)，但想適應返本地教育諗住讀返傳統學校，所以要考/抽小一，之但係圖圖始終講野唔算叻，份人又藤雞，所以見左19間，淨係1間後補。

仲要自行派位時媽媽揀返自己舊校，因為都係熱門學校，所以20分都衰左。

但我又唔覺得圖圖咁差，英文依家READING已經係全班頭2名(佢讀緊國際學校)，作文老師話佢都唔錯，ORAL同老師傾計睇西片無問題。數學已可做雙位加數，乘數都OK，我估計暑期結束前可以搞掂埋除數，同埋操練下理解題。中文係認字差D，但佢學校勝在係普教中，所以唔會太差。另外畫畫攞過D獎，最叻係公開賽第3名。運動都OK。如果咁俾佢入左間好差既學校我一定勁唔開心。

但抽獎始終係抽獎，所以今個星期就預備定叩門資料同文件，以備不時之需。因為我好相信一句名言：「機會係留俾有準備既人！」

1/6星期六放榜應謝主，雖然圖圖唔可以誇區入到我母校，但抽到本區既德田李兆強，真係勁開心，全日處於勁HIGH既狀態。

填表果時無特別去仔細研究呢間學校，只係知本區2間李兆強係最勁，而德田係千禧校舍，環境好D，所以就揀左！本來我諗過乙部第一志願填呢間學校，因為都擔心難抽，後來諗反正都係運氣，就搏一舖！

結果係得左，得到結果後呢2日上網不停睇有關學校既資料同評語，發覺原來都係我鍾意既學校，會谷學生，但功課不算多，有適合圖圖參加既課外活動，好似小二開始有4班係普教中。唯一覺得唔夠係學校唔夠NET(只得1位)，同埋除英文外所有科目用中文教......

ANYWAY正常應該下年會讀呢間，但可能都會叩下門，睇下運氣！


如果大家想知多d，add我facebook專頁啦 ^^，歡迎大家入黎傾計
https://www.facebook.com/#!/SkylarMum