蛋糕日~~~~~婆婆今日嚇死媽媽

今日係五姨婆手術後既第一個星期日，婆婆趁媽媽有時間睇住展圖豬，去左四姨婆屋企探五姨婆。而爸爸就由三點幾開始要出去做野，所以得媽媽同展圖豬留守屋企。

媽媽趁展圖豬瞓晏覺時開始做蛋糕，今次係大工程呀~~~~~

事關半年前左右媽媽買左本蛋糕書，早幾日媽媽左揭右揭，心血來潮既媽媽想做其中一個蛋糕，由於媽媽近年都係好懶咁做D Mousse Cake、忌廉蛋糕、粟子蛋糕、Muffin咁，所以呢個蛋糕算係大工程啦！

因為淨係溶朱古力都要兩次，又要煮忌廉~~~~~又要用分蛋法~~~~，個朱古力蛋糕底要用real chocolate做，唔可以用cocoa powder，好在今日展圖豬瞓在好耐，媽媽除左做呢個蛋糕，仲做左兩盒早排買既mini cupcake~~~~~~

不過個蛋糕因為用朱古力淋面，所以要聽日先有得食~~~~希望好食啦！

至於婆婆點嚇死媽媽？事緣到左夜晚9點幾，四姨婆打電話俾媽媽，問婆婆返到屋企未，婆婆當然係未返到屋企啦~~~~咁四姨婆就話婆婆己經走左成個鐘，佢早十幾分鐘又打過電話黎話唔見左銀包~~~~~~之後打極電話都無人聽，媽媽一路打電話就一路驚，足足嚇足成十幾二十分鐘，婆婆先返到屋企，原來婆婆既電話較到好細聲，所以聽唔到，好在人無事，嚇到媽媽一額汗~~~~~~~

蘇浙 Interview巧遇同學仔

今日因為下午四點要去蘇浙in nursery，所以響Kinderu請左一日假。媽媽放工後，同展圖豬瞓左一陣，三點鐘媽媽、婆婆同展圖(爸爸今日要做野呀！)就出發去蘇浙，之前由於報名都只係郵遞，所以從來都未去過校舍~~~~~聽人講話學校係響斜路上面，所以決定響北角站搭的士上去~~~~，遇著一位好好人既的士司機，幫我地放車仔入尾箱，其實原來都好近(不過斜路真係又長又斜~~~~~)

響斜路遇上Kinderu同學仔熙熙，原來大家都係四點面試~~~~~~

一去到已經四點鐘，所以登記先(見到有波波池同沙池都無玩~~~~~)，然後飲奶奶~~~~~，之後就開始玩一陣玩具，過一陣就叫名集合，然後帶小朋友去一個室內遊樂場玩~~~~展圖豬玩得好開心！

過一陣就interview，老師響枱面放左蘋果、橙和香蕉，首見叫展圖攞蘋果，呢個完全無難度，因為展圖豬鐘意紅色(不過其實我懷疑展圖豬唔知咩叫蘋果，因為我地不嬲淨係俾果蓉佢食~~~~~佢都唔知見個蘋果未！)，之後叫展圖豬攞橙，呢個都無難度，又係colorful既顏色(但其實我諗展圖豬都係唔識~~~~ :p)，就係咁展圖豬一手攞蘋果，一手攞橙既情況下，當老師叫佢攞香蕉時，係咩都唔理，淨係顧住玩蘋果橙~~~~~~~~！之後老師比一盒仔crayon展圖，叫佢畫下，展圖豬又係唔理佢淨係要響個盒度攞晒d臘筆出黎~~~~~~，比架車仔佢玩，展圖豬又係淨係玩個轆~~~~~，比本書展圖豬，佢又淨係玩中間張借書紙~~~~~~~之後老師係咁二問下媽媽野就比我地走~~~~我諗今次OK機會都係~~~~~麻麻地~~~~~，不過無所謂啦~~~~~，咪當練習囉！

之後我俾展圖同同學仔熙熙響學校個波波池玩左一陣，就同婆婆去吉之島10蚊店買左DD野~~~~~，途中展圖豬已經攰到暈左~~~~~，之後我地就番屋企啦！

媽媽帶左展圖去樓下公園

一路以來，媽媽都甚少帶展圖豬去樓下公園，因為展圖豬一來未行得好好，二來係媽媽覺得展圖豬仲未識去公園玩~~~~~因為都無咩啱佢玩~~~~~

不過近呢一兩個星期，婆婆同爸爸都分別帶過展圖豬去公園，都話展圖豬就算淨係見到其他小朋友玩都已經好開心~~~~~

所以媽媽諗識唔識玩唔再係問題，重要既係展圖豬開心~~~~所以今日放左後，媽媽就帶展圖豬落樓下公園~~~~~展圖豬淨係響公園行已經開心到叫~~~~~期間仲有一位大佢少少既姐姐同佢玩，見到展圖豬咁開心，媽媽都好開心，所以決定以後多D帶展圖豬去公園~~~~~等佢唔好成日屈響屋企~~~~~~

預備聖誕PARTY

早兩日打左電話俾四姨媽同表姐們，打算今年響我地屋企搞聖誕PARTY~~~~~因為舊年係響姨媽屋企搞，今年我諗不如大家逐年響每家搞，咁樣唔駛做死一個~~~~~

咁啱早兩個星期收到JUSCO既CHRISTMAS PARTY PROMOTION，所以今日特登去訂左一盤壽司，諗住PARTY果日大家食~~~~~

仲因為之前D人講話北角果間JUSCO十蚊店超大間，所以去果度買左D紙盒諗住PARTY果日做起D CUPCAKE同COOKIES & GINGER BREAD MAN俾大家攞走做聖誕禮物~~~~~另外仲買左少少整蛋糕既工具。

不過北角呢間真係好鬼死大，我求其咁行(都未行晒)都行左成個鐘~~~~~~要認真行，我諗我都要行半日~~~~~

媽媽既虛榮~~~~

自從媽媽整左曲奇之後，每日都會俾展圖豬食半塊~~~~~(一塊怕太多，因為用左好多牛油做)

今日當媽媽攞個曲奇盒出黎時，展圖豬竟然搶左~~~~~，當媽媽攞返時，仲要大喊，媽媽諗~~~~唔通佢想食曲奇？結果媽媽攞左一塊出黎，俾展圖豬食，竟然係即時收聲止喊，仲要大大啖咁食~~~~~唔通展圖豬真係咁鍾意食？

一路以來展圖豬對食物都好似無咩特別喜好，依家竟然俾媽媽發現到一樣佢鍾意食既野，仲要係由媽媽親手做既，媽媽真係覺得超開心呀~~~~~！

任何人話好食鍾意食，都比唔上展圖豬一個鍾意食呢~~~~~！

媽媽又做曲奇啦~~~~爺爺嫲嫲同大姑媽黎探展圖豬

由於上個星期既曲奇餅食左唔夠4日已經食晒，所以今日媽媽又整曲奇，不過今次整多好多，因為諗住做多DD俾爸爸既朋友~~~~~

傍晚爺爺嫲嫲同大姑媽都先後黎睇展圖豬，之後仲一整食晚飯，大姑媽又買左幾件衫仔俾展圖豬呢~~~~~

鼻敏感？

因為見展圖豬既少少咳，已經持續左一個星期，媽媽驚佢係氣管敏感(因為氣管敏感有機會導致哮喘)，所以婆婆今日同展圖豬去睇高醫生~~~~點知高醫生因為孫仔出世(恭喜晒~~~~！)，去左探孫仔，不在香港！由楊霸成醫生代診~~~~！

楊醫生個展圖豬係鼻敏感，有鼻水倒流入喉嚨，所以有咳！不過好奇怪，之後展圖其實一D鼻水都未流過，所以我地都唔知！原來所有鼻水都流晒入喉嚨呢！

濕疹、鼻敏感呢兩樣展圖豬都中左~~~~，媽媽要小心展圖豬既氣管(哮喘)，因為呢三種敏感病常都好易一齊有~~~~

(大家要小心小朋友半夜咳嗽，原來小朋友於半夜十二時至凌晨五時咳嗽，好大機會都係哮喘/哮喘既先兆~~~~~！)

超鬆化曲奇

今日媽媽造左少少曲奇餅，超鬆化好味呀~~~~~

婆婆同爸爸都話鬆化過jenny bakery同樂宮既曲奇餅~~~~，爸爸仲問我有無諗過整出黎賣~~~~~媽媽好有滿足感呢~~~~~~

牛油曲奇

牛油  200g
麵粉  150g
糖霜  50g
粟粉  50g

1. 牛油與糖霜打至奶黃色
2. 篩入麵粉及粟粉
3. 拌勻
4. 用唧袋唧花
5. 180C焗12分鐘

• 牛油要用金桶/三角嘜~~~~

不停係咁行呀~~~~~~

唔知係咪展圖豬啱啱開始學行覺得超新奇，所以呢幾日成日不停咁係咁行，一攰/唔夠力或者平衡唔到就會「mou」底~~~~~然後又會起番身繼續行~~~~~

爺爺嫲嫲黎探展圖豬~~~~行路突飛猛進

因為展圖豬出左院，今日爺爺同嫲嫲都特登黎探展圖豬同食晚飯~~~~~~

可能因為展圖豬見爺爺嫲嫲黎探佢所以好開心(事實上次次爺爺&嫲嫲&大姑媽黎探親展圖豬佢都好開心)，所以夜晚食完飯之後我地同展圖豬玩，佢不停係咁行，仲可以一次過行成8呎~~~~~之前都只係兩呎左右咋！

而且都幾穩陣，原來bb遲d學行真係可以一行就行，跌少d嫁！

另外今日下午婆婆發現展圖竟然吼婆婆入廚房時偷偷地爬上梳化，再沿住梳化爬左上媽媽既電腦枱上面，嚇死人~~~~~~好危險~~~~~！不過好在既係我地響展圖豬未識爬上梳化同床時，已經教識左佢用雙腳落床同梳化，咁都無咁危險，不過係怕佢有時貪玩唔記得~~~~~所以都係小心為上啦！

所以今日媽媽同爸爸趁爺爺嫲嫲走左之後又要玩搬傢俬，將梳化同電視櫃既位置調轉，黎展圖豬唔可以爬得咁高~~~~~~

而且我地好肯定係展圖豬依家係知道「NO」既含意，因為每一次佢想做/做緊一D野而我地唔俾佢做，同佢講NO時，佢個樣係即時唔開心，同埋我地再同佢講時係會喊嫁~~~~~~所以我同爸爸都話，如果唔係太必要時，淨係講道理好啦!如果係重要野，先至同佢講NO啦~~~~因為對於展圖豬黎講，「NO」已經係好重語氣嫁啦！

有nursery收展圖啦~~~~

話說早兩個星期，媽媽帶左展圖去幼兒園Ineterview，雖然展圖表現未如理想，但係媽媽計下數覺得個個Interview可能都係造勢居多，果然尋日收到幼兒園既收生信件~~~~叫我地下個星期去交留位費~~~~~千幾蚊！

雖然呢間幼稚園唔係媽媽既第一選擇，不過留位費都要交~~~~~~怕展圖入唔到更好既nursery無書讀呀~~~~~~

所以呢千幾蚊都係要俾啦~~~~~~~雖然係咁媽媽都叫鬆一口氣！

另外上個星期響永安度買既高速煲同焗爐今日收到啦~~~~~高速煲今日試下，聽日等媽媽試理個焗爐先！

另外展圖今日退晒燒啦~~~~~呢樣先係令媽媽最開心既！