無返學

可能因為早幾日病緊既關係，媽媽今日個頭成日暈暈地~~~~~所以今日無帶展圖豬番學呀~~~~~~~！

今朝婆婆話展圖豬唔知係咪掛住個波波池既關係，琴晚瞓瞓下都有幾次想要爬落床(平時無咁既……)，原來波波池既魔力係咁大既！

Boxing Day

今日係boxing day，今朝一起身媽媽已經同展圖豬拆禮物啦！豬仔超開心呀~~~~~~~

由其係個波波池，當爸爸吹完氣(好在媽媽早幾日帶左個電泵返黎！倒晒d波入個池，展圖豬好快就爬左入去，仲要全日都要keep住響個波波池入面，包括要響入面瞓著覺！一瞓完晏覺，醒左就自己落床走出黎，又爬番入波波池，真係好可愛！

繼續病倒<---媽媽

媽媽瞓左一晚，精神好左小小，不過成日都係好易攰，而且上晝仲成把聲沙晒~~~~~~，唉好好地既假期就係病倒中渡過，仲因為怕傳染展圖豬，所以唔敢接近佢~~~~~超衰！

平安夜‧病倒夜

今日平安夜，本來公司早收可以早d返屋企陪展圖豬，應該係超開心，而且今日本來約左去face影相，不過可惜將近臨放工，媽媽已經有d病倒發燒既跡象，所以唯有打電話去face改期，並且一放工去睇醫生，醫生竟然叫媽媽四個鐘頭後先再番去睇~~~~~吓咩平安夜咁多人病咩~~~~~~？

返到屋企媽媽已經因為太病，無晒電，所以一路瞓到睇醫生既時間，醫生話係感冒菌入喉嚨~~~~~~~~比左d 抗生素~~~~~~

Christmas Party

由於之前幾年既聖誕節，都響表姨媽屋企搞~~~~~~

所以媽媽今日打算響我地屋企搞~~~~~，等大家輪流做唔駛咁辛苦。之前媽媽幾日已經開始預備食物，不過仲未夠呀，因為媽媽想買citisuper果個好味既pizza，所以今朝一早出左去買，買完即刻返屋企，咁啱嫲嫲黎左，所以一齊飲茶~~~~~~

之後就番屋企，媽媽做最後既工作，整沙律、焗薯皮、開始將所有食物焗熟，打算之後翻熱~~~~~搞搞搞，三點幾May姨同進培表哥首先黎到，然後係四姨婆、四姨公、五姨婆、表姨媽同嘉熙表哥一齊黎到~~~~~~

進培表哥同嘉熙表哥仲幫媽媽拮波蘿腸仔~~~~~~媽媽就響廚房忙個不停，展圖豬就充當知客~~~~~~招呼各位！

到六點左右偉姨丈終於到，咁我地開始交換禮物，當媽媽比自己做既聖誕蛋糕曲盒禮盒比大家，大家都好高興(不枉媽媽早幾日做到死左)，然後開餐~~~~~~(媽媽果陣已經攰到腳仔軟)！

食到中間，聖誕老人終於黎到啦！送禮物俾小朋友！而我地開始影相，不過展圖豬最初好怕聖誕老人呢！聖誕老人想抱一下展圖豬，點知展圖豬即時嚇到大喊~~~~~到後來差不多聖誕老人臨走時，先至開始唔怕仲摸聖誕老人既鬍鬚~~~~~~

大家都食得好高興，不過媽媽好似準備得太多，所以淨左都幾多，不過好在大家都話好味，尤其是焗薯皮，一早已經掃晒，樣樣大家都話好味，壽司同其地仲淨低半盆(下次媽媽唔訂lu)，之後大家仲幫手拎dd走(感謝大家~~~~我唔想食足一個星期呀！)

食完晒之後兩個小朋友同展圖豬響屋企走黎走去玩得好開心~~~~，展圖豬開心到不停大叫呀~~~~~~！媽媽見到展圖豬咁開心都好高興呀！

到十點左右都係拜拜時間，婆婆送大家落街，媽媽原本入到廚房諗住洗埋d碗碟，點知一入到去望住d野，都係攰到出番黎，殘局都係婆婆番黎收搭~~~~~辛苦晒你啦婆婆！唔該晒！

總結~~~~今日大家都好開心，所以辛苦d都值得~~~~~~不過咁辛苦法，一年都只可以一兩次咋！

迷迭香雞翼‧大蝦濃湯 (Party預備篇)

聽日就係聖誕party，所以今日好多預備工夫要做呀，今日媽媽煎左蘋果果豬扒、迷迭香雞翼，仲有焗起左早兩日醃既ribs(媽媽偷食左甩出黎既dd肉，好好味呀)，做左個朱古力淋面蛋糕 (呢個人為爸爸而設嫁，因為佢唔食tiramisu)，煲左個大蝦濃湯(既一半)，串左同醃左d雞軟骨(拮到我手指痛呀~~~~~！)，搣左個金柚，終於搞搞搞，搞到零凌四點幾先有得瞓！

迷迭香焗雞

春雞/雞/雞翼/雞扒
迷迭香　　　　　　適量
黑胡椒　　　　　　適量
海鹽　　　　　　　適量

1. 用醃料醃雞半小時
2. 入焗爐200C焗20mins

爸爸帶返學

今日因為媽媽要準備明日Christmas Party既食物，所以難得由爸爸帶展圖豬返學(其實係第一次呢~~~~~笑！)。爸爸話學校對面Lee Garden今年整得好靚呀~~~~所以趁未夠鐘返學前同展圖豬影左幾張相呀！~~~~~~真係好靚呀！

Tiramisu‧朱古力Cupcake (聖誕Party預備篇)

今次媽媽係用二德惠既tiramisu粉做，因為實在太方便&好味，至於點解會早一日做呢？原因係媽媽發覺呢隻tiramisu做出黎要隔兩日先至最好味，所以就可以再早少少做。

至於個朱古力Cupcake，其實係媽媽改左之前一日做既Vanilla Cupcake既食譜做既，因為之前既食譜已經唔太甜，加上可可粉果然好香朱古力味但又不太甜。

朱古力杯子蛋糕 (9個直徑4cm蛋糕)

cupcake
牛油　　　８０　　ｇ
糖粉　　　５０　　ｇ
低筋粉　　８０　　ｇ
泡打粉　　３／４　ｔｓｐ
蛋　　　　１　　　ｐｃ
唂古粉　　２０　　ｇ
牛奶　　　２　　　ｔｂｓｐ

toppings
蛋白　　　１　　　ｐｃ
粟膠　　　２　　　ｔｓｐ
糖　　　　４　　　ｔｓｐ
白醋　　　１　　　ｄｒｏｐ
他他粉　　１／４　ｔｓｐ
雲尼拿油　１　　　ｔｓｐ

1. 先將牛油及糖粉打勻至輕身後，加蛋及雲呢拿油打勻
2. 將已篩之低筋粉、泡打粉及牛奶分數次加入攪勻
3. 倒入蛋糕模中用160C焗20分鐘左右
4. 蛋白坐於熱水中，加入粟膠、白醋同打至起泡，加入砂糖再打至結實
5. 離開熱水，加入雲尼拿香精再打2-4分鐘至蛋白完全冷卻
6. 用抆刀或唧袋放上蛋糕面

Vanilla Cupcake‧Roast Baby Ribs (聖誕Party預備篇)

今日媽媽上網見到一個cupcake食譜，版主講明話係唔甜既，所以媽媽即時做左18個出黎，果然真係好香又唔甜，呢個係我近日來試整既好味cupcake食譜呀！

媽媽仲用做左好可愛既裝飾呀~~~~~！

另外媽媽將尋日雪起既薑餅吸模同焗起，可能始終因為個食譜有好多蜜糖，所以都係立立地，至於味道就~~~~唔可以話好食，又唔可以話唔好食，唔知係食譜問題定係薑餅本身係麻麻地好味既問題~~~~~？

今次d薑餅係媽媽第一次試用Royal Icing做裝飾，原來比起唧cream同曲奇用力好多，今次唧得麻麻地，要做多d練習先。

另外因為聖誕Party既Roast Baby Ribs要早d醃先好味，由於媽媽打算星期六焗起佢先，所以今日開始醃定。

Vanilla Cupcake (6個直徑5cm蛋糕)

cupcake
牛油　　　８０　　ｇ
糖粉　　　５０　　ｇ
低筋粉　　１００　ｇ
泡打粉　　３／４　ｔｓｐ
蛋　　　　１　　　ｐｃ
雲呢拿油　１／２　ｔｓｐ
牛奶　　　２　　　ｔｓｐ

toppings
蛋白　　　１　　　ｐｃ
粟膠　　　２　　　ｔｓｐ
糖　　　　４　　　ｔｓｐ
白醋　　　１　　　ｄｒｏｐ
他他粉　　１／４　ｔｓｐ
雲尼拿油　１　　　ｔｓｐ

1. 先將牛油及糖粉打勻至輕身後，加蛋及雲呢拿油打勻
2. 將已篩之低筋粉、泡打粉及牛奶分數次加入攪勻
3. 倒入蛋糕模中用160C焗20分鐘左右
4. 蛋白坐於熱水中，加入粟膠、白醋同打至起泡，加入砂糖再打至結實
5. 離開熱水，加入雲尼拿香精再打2-4分鐘至蛋白完全冷卻，即可用抆刀或唧袋放上蛋糕面

醬燒豬仔骨

急凍豬肋骨(2排) 2½ lbs
BBQ醬 100 ml
茄汁     50 ml
糖    3 tbsp
喼汁 2 tbsp

1. 豬肋骨洗淨，用BBQ 醬、茄汁、糖及急汁醃2日
2. 焗盤用錫紙包好，將豬肋骨及剩餘醃料放入，再用錫紙封面
3. 180度焗30mins  
4. 打開錫紙焗30mins至表面有少許燶

唧花曲奇‧Super Moist Cupcake (聖誕Party預備篇)

今日媽媽開始要預備聖誕Party既小禮物俾大家，所以開始超忙碌呀！今日媽媽焗左175塊曲奇~~~~~~~~好多呀！至於個Super Moist Cupcake其實只係Betty Crocks果d一盒開既粉，但係焗左出黎我覺得甜左d，真係濕左d~~~~~~，所以呢個cupcake我唔會放入小禮物度，唯有自己食左佢~~~~~媽媽做野食俾人試不嬲既宗旨係要超好味，好似街/好味過街先俾人食呢~~~~~！

法國油鴨脾

響幾個月之前媽媽睇到一本雜誌話，上環有一間法國雜貨店有罐頭既法國油鴨脾賣，當時媽媽已經想買番黎試下，不過因為要照顧展圖豬，唔方便去一d交通唔太方便既地方，所以唯有一路諗諗諗，但係始終無去到。

點知今日同展圖豬返KinderU見到Lee Garden樓下咁啱有法國食品節，紅酒媽媽就唔係太啱~~~~~鵝肝醬又好似太大罐，不過咁啱見到呢隻罐頭，就諗住買番黎試下~~~~~！

不過仲未諗到做聖誕大餐，定除夕大餐好~~~~~！

試鏡大失敗之種族歧視

早兩日媽媽響網上見到有人搵1-5歲既男女童拍硬照廣告，媽媽哽係唔執輸，第一時間同展圖豬報名，仲約埋今日試鏡。

所以今日同展圖豬去完KinderU之後，就去鰂魚涌試鏡啦！

一去到一個姐姐叫我地填好報名表，然後等一陣，就入去試鏡~~~~~點知一入到去展圖豬即時大喊~~~~~眼淚大大滴，超級可憐，因為喊得太厲害，所以根本唔可以影到相，唯有出去等其他人小朋友試完鏡先，等展圖豬冷靜下。

等緊期間，展圖豬既情緒終於穩定番，到後期見到d 靚女Model仲要猛咁對人笑，等d姐姐讚佢可愛，終於又到展圖豬再次試鏡，點知一入到去，見到果位攝影師又即時狂喊，咁媽媽同婆婆都知道係展圖豬唔鐘意位攝影師 原因係個攝影師皮膚太黑~~~~~~~oh~~~~！見到展圖豬咁可憐，媽媽同婆婆都唔忍心迫佢，所以唯有離開啦！

Cookies Cutter & Fondant Smoother

早幾日上網睇到有Lufuma開倉，見爸爸件Gore-tex外套已經舊舊地，所以約爸爸今日去中環睇下有無啱既。因為媽媽比爸爸遲收工，去到既時候，爸爸已經睇完左，話唔鍾意d款wor~~~~

既然黎到中環，又未到七點媽媽哽係要去Complete Deelite買想買左好想買既Wilton Cookies Cutter (因為唔鍾意街果d個型唔靚，又一係太大又一係太細！)仲買到想買好耐既Fondant Smoother~~~~

跟住再去灣仔二德惠買Double Cream，再去波士頓食埋野就返屋企lu！

展圖豬既第一次飛吻

今日婆婆去左四姨婆屋企，因為聰表叔今日請四姨婆同四姨公去澳門，所以婆婆一早去左四姨婆屋企TAKE CARE五姨婆。

今日夜晚媽媽爸爸同展圖豬食完飯返屋企時見到樓下管理員，展圖豬例牌又超HIGH，叫拍手有拍手，叫請請有請請，叫BYEBYE有BYEBYE，點知管理員叫展圖豬飛吻，我地話佢未識，話口未完，管理員姨姨做一次俾展圖豬睇，展圖豬就做一次，就係咁樣第一次既飛吻就俾左管理員姨姨啦！

HK Preschool Interview勁多人呀

今日展圖豬又要去幼稚園Interview，今日既學校係樂基~~~~聽聞呢間學校教得非常好(其實都唔多知點好，係人地講~~~~~)，本來今日上晝仲要去埋迦南，不過由於Think已經收左展圖，而我唔想展圖豬一日Interview兩間學校咁辛苦，所以就Skip左迦南。

下晝三點媽媽同婆婆等展圖豬瞓完晏晝覺就帶佢去搭車，一去到學校真係嚇左一大跳~~~~~~勁勁勁多人呀~~~~~！真係插針都插唔入！去到先要排隊攞報籌同報名表(排隊都要分幾條龍，分別係唔同interview時間既!)。之後同展圖豬響遊樂場玩左一陣，展圖豬仲係唔係好肯行，有時仲會響屋企咁周圍爬，媽媽因為唔想佢響地下爬，捉佢起身，點知佢又坐返落地下~~~~真係勁狼狽~~~~！

玩左一陣聽到叫number，要抱起展圖豬排隊入去Interview，點知可能因為佢未玩夠，竟然大喊反身，用雙手雙腳撐，嘩~~~~差d抱唔住跌左展圖豬落地，不過好在見老師前收左聲~~~~~~

見老師時，老師簡單咁問下放假時會帶展圖豬去邊，平日邊個照顧佢，本來要考說話，但係我對老師講展圖未學講野，所以老師淨係俾d圖畫同公仔展圖豬睇，睇下佢反應~~~~~今次interview都ok，不過競爭激烈~~~~~千幾人爭果百幾個位，唔知展圖豬考唔考到呢~~~~~？

去買聖誕禮物呀~~~~~

今日爸爸又要做野，返唔到黎食晚飯，所以媽媽趁機約埋婆婆響於工後出去食飯，順便去玩具反斗城買聖誕禮物，預備21號既Christmas Party。

今次我地決定去未過既將軍澳反斗城，順便響新都城食飯，原本我地去到新都城諗住求其響food court食少少野，不過因為展圖未食飯，媽媽又諗住近來好少出街食飯，所以當見到香辣屋有bb椅，就決定左食無食一排既泰國菜。好耐無食香辣屋，我地叫左兩個餐，嘩黎到都幾大份，而且好味又唔多人，兩個人都係$250左右，仲要食唔晒，下次可以再考慮。

跟住我地就去反斗城買玩具，今次媽媽又係買科學具玩俾其他小朋友，而展圖豬就係Thomas 波波池。期間我地見到有D識郁會叫既玩具動物，媽媽個左隻狗仔俾展圖豬，見佢幾開心，婆婆就開聲話佢買呢個俾展圖做聖誕禮物，之後媽媽行開左要買猜猜畫畫俾D小朋友響PARTY玩，婆婆見無野做，咁啱果個位又有幾隻識郁會叫既玩具動物，就開俾展圖豬睇下，一開之下不得了~~~~~

婆婆開左隻豬仔，展圖豬一聽到隻豬仔叫，就笑到停唔到，仲笑到標晒眼水，有個行經既男人仲叫佢個老婆過黎睇，點解個B會笑得咁勁~~~~~~！

到九點幾已經買左一堆野，見展圖開始不耐煩，所以就返屋企LU！

發燒~~~~~

尋晚展圖豬成夜都有DD扭計，到夜晚早早瞓左一陣，十點左右醒左，媽媽諗住同展圖豬搽Cream換片餵奶，點知搽Cream時發覺展圖豬個身好熱，即刻同同探熱，竟然102C，所以即係同豬仔除淨一件衫，等佢散熱，之後餵完奶等一陣，喂展圖豬食退燒藥，過左一陣展圖豬喊得好可憐(唔係大喊，係細細聲咁~~~~)，然後過過一陣就嘔左一大啖奶~~~~~媽媽好肉痛！之後，媽媽抱住展圖豬響梳化瞓，等佢瞓得好D~~~~之後好左都退左燒好多！

今日婆婆同展圖又睇楊醫生，醫生話展圖有少少喉嚨發炎~~~~~~媽媽諗展圖一歲後多左病唔知關唔關奶粉問題~~~~~？因為展圖一歲前飲羊奶好少病，係一歲後轉左雪印就病多左~~~~~(雖然可能都係去多左街/抗體少左)不過媽媽都係同展圖轉番奶粉先，睇下會唔會病少D~~~~~