輕盈麥皮麵包 Light Oat Bread

輕盈麥皮麵包 Light Oat Bread

水　　　　　２９５　ｍｌ
牛油　　　　２５　　ｇ
鹽　　　　　１／２　ｔｓｐ
高粉　　　　３７５　ｇ
麥皮　　　　４０　　ｇ
黃糖　　　　２　　　ｔｂｓｐ
速發酵母　　１／　　ｔｓｐ

1. 將所有材料依次序放入麵包機中
2. 用白麵包程序，750g，中度烘焙
3. 待所有程序完成後，取出麵包放置一小時，切片即成

原本呢個食譜入面既牛油係植物油，因為反式脂肪既問題，我將佢轉左做牛油。而鹽亦由原來食譜既1 tsp減至1/2 tsp。

雖然睇到d麥皮，但係食唔出~~~~~

落有d似麥包

因為呢排整既包包都係有味既，婆婆查唔到野，所以今次整隻無味既(食落都好似麥包)，而且白麵包加左d麥都好似健康d(雖然得果少少~~~~)

講番個包先，呢個包唔知係咪因為無加奶同蛋，仲要加左少少麥皮，所以唔會太軟熟，不過一出爐時個外皮都幾脆，後來我地發覺用佢呢做多士一流，好香脆，但係就咁食就差少少啦~~~~~~！下次再做既話我會將佢切厚d，做厚切多士應該會唔錯。

肉桂卷 Clone of a Cinnamon

肉桂卷 Clone of a Cinnamon

麵糰
奶　　　　１２０　　　ｍｌ
蛋　　　　１　　　　　ｐｃ
牛油　　　３５　　　　ｇ
高粉　　　３１０　　　ｇ
鹽　　　　１／２　　　ｔｓｐ
糖　　　　５０　　　　ｇ
速發酵母　１－１／４　ｔｓｐ

餡料
紅糖／黃糖１１０　　　ｇ
肉桂粉　　１－１／２　ｔｂｓｐ
軟牛油　　４０　　　　ｇ

糖霜面
忌廉芝士　４０　　　　ｇ
軟牛油　　３０　　　　ｇ
糖霜　　　９５　　　　ｇ
雲呢拿油　２　　　　　ｔｓｐ
鹽　　　　１／８　　　ｔｓｐ

1. 將麵糰材料依次序放入麵包機中
2. 用麵糰程序
3. 在麵包機制作麵糰時，我們將所有肉桂餡料及糖霜面料分別攪拌至均勻
4. 麵糰制成後將它擀平至8吋 x 12吋大小
5. 將肉桂餡料放入微波爐以高熱叮10秒，取出均勻塗上麵糰
6. 麵糰卷起成8吋長之肉桂麵糰，並切成12塊
7. 將焗爐放入水盤，預熱至200C後熄火，放入肉桂卷
8. 等待50分鐘，肉桂卷發酵至兩倍大
9. 取出肉桂麵糰將焗爐預熱至175C，預熱後放入肉桂卷，焗20分鐘
10. 將糖霜面料放入微波爐以高熱叮10秒，以匙更淋上已焗好之肉桂卷上

• 我自己、婆婆及爸爸覺得這肉桂卷很香，但稍甜，下次再做應該會減少一半黃糖及牛油的餡料份量。
• 如果覺得麻煩的話飾面糖霜這個程序去掉也可以。

迷迭香麵包

今日因為婆婆已經食完上次既湯種奶油麵包，所以媽媽今日整左rosemary bread，呢個食譜係響allreceipes.com果度搵番黎，黎緊我應該會試多幾隻果度搵到既包包食譜。

迷迭香麵包

水　　　　　２３５　　　ｍｌ
橄欖油　　　４５　　　　ｍｌ
糖　　　　　６　　　　　ｇ
鹽　　　　　６　　　　　ｇ
意大利香草　１／４　　　ｔｓｐ
五色胡椒　　１／４　　　ｔｓｐ
迷迭香　　　１　　　　　ｔｓｐ
高粉　　　　３４０　　　ｇ
速發酵母　　１－１／４　ｔｓｐ

1. 將所有材料依次序放入麵包機中
2. 用白麵包程序，750g，中度烘焙
3. 待所有程序完成後，取出麵包放置一小時，切片即成

原本呢個食譜入面既五色胡椒原本係黑胡椒，但係因為我屋企得五色胡椒，所以轉左用五色胡椒。另外因為我怕麵包焗出黎d rosemary會太大塊，所以我預先將佢整碎左少少。

個樣都ok嫁，不過無湯種包包發得咁高！

見到入面都有好多香草，呢個包包配醋油應該好好味！

個包因為有胡椒，所以有好少好少辣味，如果比小朋友食可以考慮用少d胡椒/唔用。另外因為我本食都係鍾意清淡d，所以下次鹽量應該要試下減半！

婆婆話呢個包包好味d，有風味d，因為平時街賣果d香草包包多數一係好貴，一係無香草味，所以呢個抵整呀！

展圖豬依家已經可以好快咁中俯臥轉做仰臥啦！仲識巢一d周圍擺既野~~~~同媽媽散檔。

湯種奶油麵包

湯種奶油麵包

湯種
高粉　　　　９０　　　　ｇ
水　　　　　６５　　　　ｇ
含鹽奶油　　３５　　　　ｇ
糖　　　　　５　　　　　ｇ

1. 將高筋麵粉放在大碗內
2. 取另一小鍋置入水、糖及奶油，小火加熱煮到小滾之後立即沖入麵粉中
3. 邊沖邊用筷子攪拌，再捏塑成麵糰
4. 待涼後蓋上保鮮模放入冰箱冷藏24小時
5. 使用前需放室溫至回軟

主麵糰
全脂牛奶　　１６０　　　ｇ
糖　　　　　３５　　　　ｇ
鹽　　　　　１　　　　　ｔｓｐ
蛋黃　　　　１　　　　　ｐｃ
無鹽奶油　　１０　　　　ｇ
高粉　　　　２６０　　　ｇ
速發酵母　　１－１／８　ｔｓｐ
湯種麵糰　　１　　　　　份

1. 將以上材料依序放入麵包機
2. 用Program 1設定、750g、中間金黃既程式去烘個麵包，等麵糰開始攪拌之後將湯種麵糰撕成小塊狀加入

今次個包既size似番出街果d，而且鬆軟d，爸爸話上次果個黏口d，我就覺得呢個包牛油味無上次果個咁濃，無咁漏，啱我口味d，不過我會繼續造新包包，等造出一個啱自己口味既。

呢個就係我用緊既麵包機

手工烏冬

早一排婆婆話俾我知原來屋企有一盒麵粉未開，仲要就到期，咁啱我上網睇到呢個食譜，就試下整！

手工烏冬

麵粉　４００　ｇ
水　　１８０　ｍｌ
鹽　　１８　　ｇ

1. 將鹽加落水中攪至溶
2. 逐小加入麵粉，搓成糰(我覺得水唔夠加多左10ml左右)吸飽水既麵糰係光滑既!
3. 用保鮮紙包起麵糰放置1.5-3小時，待麵糰吸飽水粉
4. 將麵糰擀薄，摺3摺，重覆4次
5. 放置麵糰10分鐘，待麵糰鬆弛
6. 在工作台上洒上麵粉，將麵糰置放上面擀至3-4mm厚，摺3摺，切條
7. 將麵條拉開，並放入煑滾之水中
8. 煑4-6分鐘，待烏冬發大浮起後過冷河
9. 可放湯/放涼凍食

自己做既烏冬可能麵粉無漂白，所以黃黃地，而且因為加左鹽，有d鹹鹹地，下次如果有麵粉多再做既話我會試下唔加鹽睇下o唔ok！

另外上個禮拜我教過展圖豬兩日由趴低反返轉仰臥，之後都唔記得教佢，結果今日放佢落地，爸爸發現佢自己可以反到啦，一路look look look向同一個方look，好搞笑！

仲有就係今晚係有史以來最成功餵糊仔，展圖豬15分鐘搞掂左由兩湯匙米粉開既糊仔，期間竟然係無喊過~~~~~~~！重要間唔中係自己張大個口，唔駛「橋」開佢~~~~謝天謝地！希望佢餐餐都係咁就好羅！

無牛奶既牛奶麵包

13號晚即係啱啱整好左一磅牛奶包包，其實媽媽早響坐緊月果陣已經買左個麵包機，不過一路都未同佢剪綵，因為日頭去左灣仔二德惠果樹買齊野(其實買左好多野)，三百幾蚊都唔知點解會拎到手都斷咁滯！~~~~~~講遠左添！因為終於有高筋粉，所以開始第一次整包包。整包之前一兩日媽媽已經上網做晒資料搜集，睇左好多食譜，終於決定做最易既牛奶麵包。

頭一次整緊係超興奮，將所有材料倒晒入麵包機，因為太心急掉入去d次序亂晒，不過我諗都係會攪勻佢無所謂啦，因為頭一次整好緊張，所以成日check住部機，點知過左成個鐘一d動靜都無，咁唯有即刻睇說明書，睇睇睇睇睇~~~~~點知俾我發現到，原來我未將枝攪棒放入部機，所以根本攪唔到面糰。咁唯有再黎過，今次好乖睇清楚先落料，次序份量跟足晒，所以終於成功啦!

不過焗起都要等一個鐘先可以食，所以等到依家先啱啱切起，食左最細果塊，好香牛油味，有dd鹹鹹地，不過好鬆軟，暖暖地~~~~好味!不過下次我會試下減少d牛油同鹽，因為都有d漏漏地，同埋想食得健康d，自己整麵包既價錢同出街買差不多，不過可以食少d化學野~~~~~~:p

無牛奶既牛奶麵包

牛油　　　４０　　ｇ
鹽　　　　１　　　ｔｓｐ
糖　　　　２　　　ｔｂｓｐ
水　　　　２００　ｍｌ
面粉　　　３１０　ｇ
速發酵母　１　　　ｔｓｐ

1. 將己上所有材料依次放入麵包機內
2. 待所有程序完成後，取出麵包放置一小時，切片即成

原本呢個食譜入面既水係牛奶，不過我見人地話用水無咁漏，所以轉左用水。

今次我整左500g麵包、用最唔金黃既setting去烘個包，結果係個包面係白色，下次可以較中度試一試，今次個包包整左出黎好香牛油味，我覺得有少少漏，都鬆軟，不過有d黏口。

第一次切麵包都算切得唔錯啦~~~~~人地話好難切嫁！

同場加映坐到側晒既展圖豬，呢期佢唔知搞咩，將佢擺正佢又坐側，擺正又坐側，有時側到條頸好似斷左咁，搞到我有d擔心佢條腰骨會唔會因為咁生歪左！

尋晚媽媽作病+今日展圖豬自行停課

尋日晏晝舊同事Chris Dai來訪，探展圖豬~~~~~~尋日因為係婆婆既打牌日，媽媽見爸爸既病都好得七七八八，所以本來打算整海南雞飯，點知唔知搞咩鬼，Chris黎到之後無耐開始頭痛，走左之後仲要作嘔，唯有同爸爸講話唔煮得飯，唔知係咪作病既關係由傍晚六點左右訓到成十一點幾，期間仲要訓極都唔暖咁，不過訓左一覺，食番dd野，飲番杯寶礦力，頭痛好似好少少，無再作嘔，之後到點幾再訓過，今朝好番晒。

由於最近流感太利害(有小朋友因為流感病逝)，加上展圖豬返playgroup既時間係上晝d人返工既rush hr，所以爸爸同婆婆叫媽媽暫時唔好帶佢返學住，為左展圖豬既健康，媽媽亦都不得不同意啦！

今晚媽媽整返尋日既海南雞飯，都ok喎，雞ok，黑色果個醬好味，飯ok係油少少，下次我會試下早排響超市買果包海南雞飯醬煮飯試下，係個酸辣汁差d lor，唔知點先可以整到好似街果d咁又辣又好味呢？

海南雞飯(3-4人份)

黑醬油
老抽　　適量
沙糖　　適量

1. 將老抽及沙糖放入鑊中略煮

油飯
雞油
蒜頭　　數瓣
米　　　２。５　杯
雞湯　　適量

1. 將雞油放落鑊炸出油
2. 加入蒜頭爆香、挑出雞油棄掉
3. 將己洗好之米加入鑊中略炒
4. 將米及蒜頭放入飯煲中、加入適量煮雞之雞湯煮飯

海南雞
雞　　　1　　　　隻

1. 將雞放入已煮滾之水中，水需要蓋過整隻雞，轉小火(蝦眼水)
2. 將雞抽離水面，再放入水中3-4次
3. 等待12分鐘，重覆步驟 2
4. 驗試雞是否熟透，可以將筷子插入雞脾中，如果透出來的水是清的不是血水則表示已熟 (不過我發覺這個做法測試出來的雞中間仍會有些紅，所以最好熄火將雞再於熱水中多浸15分鐘)
5. 取出雞啤水或放大盆中用冰蓋起10分鐘

辣醬方面我覺得唔好味，整得好味再後補食譜啦！

呢次係我咁大個女第二次將成隻雞分屍咋~~~~~肉酸唔好笑我........

展圖豬拆利是啦

農曆正月都過晒，今日媽媽終於的起心肝拆左展圖豬d利是！

呢個就係展圖豬既拜年背囊，同佢今年既戰績！

今年展圖豬一共收左$3240--整利是~~~~~~~~多過媽媽好多好多!媽媽得果幾百蚊咋~~~~陰公！

今日爸爸精神好左好多啦！所以我同爸爸去左APM睇左BC10000既早場！套戲OK啦，不過我覺得有DD唔合理羅~~~~~

另外媽媽呢兩日教展圖豬轉身轉反轉頭(即係由趴響度轉番做瞓響樹)，尋日係頭一日，要幫下手先轉到，今日第二日進展良好，淨係用玩具引下佢就轉到lu~~~~~

婆婆生日+展圖打針+爸爸繼續病+媽媽煮大餐

今日朝早諗住同展圖去高醫生度打針，順便同爸爸睇醫生，點知媽媽擺左大烏龍，原來高醫生果度係裝修到4月7號，唔係3月7號，好在臨出發前我再打多次電話，去聽高醫生既留言，如果唔係就摸門釘。

所以我地唯有去屋企附近既醫務所睇醫生+打針。個醫生唔知係好少同小朋友打針，我覺得打手勢麻麻地，打到展圖兩邊大脾都有針孔，而且打頭一枝展圖豬已經少少喊，好可憐~~~~~~

因為醫務所太多病人，所以婆婆買左個BB口罩俾展圖豬！

打完針我地就返屋企，展圖唔知係咪一來因為今日太早起身，二來今日打完針，成日響度大昏迷，咁媽媽就有時間整今晚既野大餐，同婆婆既蛋糕。

本來媽媽睇左電視學左海南雞飯，諗住今日試下，不過婆婆話爸爸病得咁犀利，唔好煮太油膩，如果唔係爸爸D感冒會好難好，所以雖然媽媽尋晚買左材料同雞，都唯有放入冰格。

所以今日煮香煎豬扒蘋果汁、茄汁蝦、日式凍豆腐、烚菜、梅菜肉餅(呢個專係FOR爸爸既)。

香煎豬扒蘋果汁

豬扒　　　　４　　　件
橄欖油　　　２　　　湯匙
牛油　　　　２　　　湯匙
切片啡磨菇　８０　　克
蘋果拔蘭地　２　　　湯匙
蔥頭碎　　　１　　　茶匙
Apple cider　 １／２　杯
上湯　　　　１／４　杯
忌廉　　　　１／４　杯

1. 豬扒以鹽及胡椒粉調味。燒熱一半橄欖油及牛油，炒香白菌後盛起。
2. 再以原鍋下餘下一半油份，蒜豬扒至金黃。
3. 反轉豬扒後再稍煎一會，灒蘋果拔蘭地，再加蔥頭碎炒香。
4. 加蘋果西打及上湯，慢火煮5分鐘至豬扒熟。盛起豬扒保暖。
5. 加入忌廉及白菌回鍋，慢火煮至稠，伴豬扒同食。

婆婆話呢個好食，最好拌意粉(因為係忌廉汁)。

茄汁蝦好一般，等我整到好味時再俾食譜大家。


日式凍豆腐

百福硬豆腐　　１　　盒
芝麻醬　　　　適量
蘋果醋
紅糖
生抽
麻油

1. 所有調味料拌勻(味道自己試味調教)
2. 倒上豆腐上就OK!(超簡單)

至於蛋糕方面，因為婆婆一向鍾意食粟子蛋糕，所以就做粟子蛋糕，不過又因為婆婆怕甜所以粟子餡唔落太多忌廉去打(所以超難打滑，你地仲可以見到果D一粒粒啡色係粟子肉，而且好難忟D粟子餡上去)，不過因為上網睇到有人教整脆脆餅底，咁響去蛋糕材料舖又見到有就買黎試整！


粟子脆脆蛋糕

清蛋糕(7吋)

蛋　　　　　　４　　隻
糖　　　　　　８０　ｇ
低粉　　　　　８０　ｇ
蛋糕乳化劑　　１０　ｇ
菜油　　　　　２０　ｇ
水　　　　　　１５　ｇ

1. 先將蛋柔糖以高速打發，加入蛋糕乳化劑打至企身。
2. 加入麵粉以最慢速打至厚身。
3. 加入菜油及手，順同一方向拌勻10秒。
4. 放入已預熱200度之焗爐焗20分鐘，待涼切片。

脆脆底

脆脆　　　　半包
朱古力　　　２００ｇ

1. 將朱古力隔力蒸溶(鑊蓋不要蓋上)。
2.  將朱古力及半脆脆拌勻，舖平成約7吋之圓形在臘紙上，放入雪櫃待涼。

粟子餡

無糖粟子茸　１罐
甜忌廉　　　５００　ｇ

1. 先將甜忌廉打發。
2. 加入粟子茸，再用攪拌機將它們打勻。
3. 如想粟子餡幼滑一點或甜一點可加入更多甜忌廉。

將以上之材料如以下舖好即成

粟子餡
蛋　糕
粟子餡
蛋　糕
粟子餡
脆脆底
蛋　糕

爸爸又再次病倒左啦

尋晚爸爸成晚都訓唔著，今朝本來要出去做少少野，但係出左去都係頂唔順返左黎，攞埋上次食剩果d藥去睇醫生，不過因為展圖今日要返playgroup，所以唯有都係帶展圖出去爸爸take care自己。

爸爸睇完醫生就打電話同我報告，原來燒到101度，之後佢話會返屋企訓覺。

今日展圖上既playgroup多左一位新朋友仔，叫Boris六個月大，不過佢睇落好大個仔，同展圖& Ian(展圖既另一個同學仔七個半月大，大展圖半個月)差不多大，而且佢好鍾意彈，成常係咁要姐姐抱住佢彈好搞笑。

落堂之後因為媽媽去左Citisuper，今次發現左一樣好得意既野，就係雞蛋變型器，只要將隻蛋烚熱，趁佢仲熱果陣mok殼放入個盒度十分鐘就ok！我諗如小朋友大小小咁樣整俾佢食/帶飯返學一定好開心啫！

而且我諗應該可以用黎做硬身啫喱/大菜糕/小飯團俾小朋友~~~~~一物二用！

20蚊有兩個，仲有另一pack款式係兔仔同熊仔!

雞蛋成品，食落同一般蛋無分別嫁！

焗豬扒飯+banana muffin

今日婆婆去左朋友屋企打牌，所以全日都係由媽媽take care展圖，可能因為今日屋企淨係得媽媽一個人，所以展圖豬勁痴身呀！行開一陣出左佢既視線范圍就會喊啦，仲要大大滴眼淚，好可憐果隻，連放佢入jumperoo都唔ok，所以今日媽媽響廚房做野時都係放佢落highchair，推響廚房門口，一路同佢傾計一路整野。

由於婆婆出去打麻雀既話多數要成傍晚六七點先返，所以通常呢個時候我地會落街食/叫外賣/食飯盒，不過媽媽早幾日見到一個焗豬扒飯既食譜想試下，所以下晝就同展圖去左超級市場買材料，諗住試下~~~~~~

焗豬扒飯 (3-4人份量)

梅頭豬扒　３－４塊
米　　　　２。５杯(約5碗飯)
洋蔥　　　１　　個
細蕃茄　　５　　個
蘑菇　　　４　　粒
蕃茄濃湯　１　　罐

1. 豬扒用生抽，喼汁，美極、糖、鹽、胡椒粉醃過夜(時間唔夠、醃左一陣)。
2. 洋蔥切絲、細蕃茄切角和蘑菇4粒(因為d蘑菇唔靚所以無用到)切片備用。
3. 冷飯用蛋和生抽炒好盛於焗盤內。
4. 豬扒撲上一層薄薄生粉煎熟，切成濶條排在炒飯上。
5. 將(2)之洋蔥、蕃茄和蘑菇炒軟，加入三色、蕃茄濃湯、少量清水和醃豬扒汁液。
6. 待汁煮滾後試味，均勻地淋在豬扒上。
7. 放入已預熱10分鐘焗爐內(220C上下火)焗約15分鐘即成。

婆婆同爸爸食完後都話ok好味，同大快活大家樂有得fight喎~~~~~~~嘻！

跟住因為既然開左焗爐就再焗多個banana muffin，因為媽媽懶，所以多數都係用番muffin mix，貪佢又方便又好味

Banana Nut Muffin (6cm 6個)

Banana nut muffin mix   １　　盒
蛋　　　　　　　　　２　　隻
奶　　　　　　　　　３／４杯
植物油　　　　　　　１／４杯

1. 所有材料倒晒落個兜撈勻佢。
2. 將粉漿放入muffin cup(我用可以入爐既紙杯貪佢夠方便，食完掉左佢就ok，又唔駛洗焗盆)，放半杯好啦，因為會發起嫁。
3. 放入已預熱10分鐘焗爐內(200C、上下火)焗約20分鐘即成(最低果層)。

Betty crocker同white wings既muffin mix都好好食(呢個banana nut既味同starbucks既差不多嫁咋)，又好易整，又平廿幾蚊整到6個，而且多數supermarket都有得賣，所以有焗爐既不防試下。有時我有香蕉會切一條入去，另外佢既blueberry都好好味，個packing入面係有一罐藍莓嫁!如果我冰格有空位既話我一次可能會整幾盒，因為可以放入冰格3個月，要食果陣攞一個落微波爐灯番熱佢，就有熱辣辣既muffin食啦~~~~~~~！

因為搬左屋之後都無整過muffin，所以今次係婆婆第一次食新鮮出爐既muffin，本來媽媽話食飯已經食到好飽，但係又想試下，所以諗住試四分一，點知~~~~~~食晒成個！

展圖豬覆診日+VENTURE相

今日同展圖返黃醫生度覆診，今次黃醫生開左隻mild好多既藥膏俾展圖，黃醫生話展圖好左好多，不過今次轉左藥膏之後因為藥性輕好多，所以皮膚可能會紅番dd，不過唔駛擔心，不過真係呢，展圖今朝睇到醫生即刻搽藥膏，今晚塊面仔已經紅紅地，好在醫生講左先，如果唔係我又要擔心啦！下次覆診日期係黎緊星期六！

睇完醫生，就帶埋展圖豬同婆婆去蓮香樓飲茶啦~~~~！原來婆婆雖然未嫁前都係住港島區，但係係未黎過蓮香飲茶嫁!我地去到蓮香果陣大約十一點，好在仲有少少位，坐低之後就沖番兩盅龍井，等點心出現同餵左展圖豬食奶先~~~~！今次我地叫左咸魚肉片飯、鳳爪(我既至愛)、豬肚燒賣(婆婆話豬肚好香)、蒸蘿蔔糕(都好味)，到我地食完果陣已經十二點幾啦，都有d人等緊位，我地唔好意思啦啦臨埋單走人，盛惠93蚊，我覺得扺食過屋企樓附近d酒樓~~~~~~

食到一半先記得影~~~~~~~唔好意思=^^=

我最鐘意佢一盅盅既茶，夠晒懷舊！

飲完茶食飽飽緊係行番一陣運動下，我地去左陳意齋買左聞名已久既蝦子扎蹄(我覺得普通)同杏仁霜(未飲唔知)，仲買左媽媽鐘意既蠔油豆(未食呀)，同婆婆鍾意既甘草黃皮(婆婆話好食)。

陳意齋既野食~~~~~~~

跟住我地又行過H&M順便又入去睇下童裝，媽媽睇中左一頂鴨舌帽，俾錢果陣婆婆又要爭住俾錢，話要送D野俾展圖豬WOR

呢副太陽眼鏡係試帶咋~~~~~無買，展圖個鼻太扁都托唔起！

嘻~~~~~~石堅係我老友~~~~~

我諗~~~~~~~我咩都諗唔到！

之後我地轉戰threesixty，今次無咩買野，係買左幾樽organic baby food，因為佢呢隻平過citisuper果d，同埋多d款揀~~~~~~

係呢幾樽咋~~~~~不過提下大家如果都有俾bb食樽裝baby food食完唔好掉左d樽，有時可以拎出街開糊仔，食完掉左佢！

另外好多朋友問我VENTURE張相點，我今日終於得間SCAN好POST上黎俾大家睇

一家三口都笑得好開心，所以我地揀左呢張！(拍攝於2007年12月24日)

昏迷日

今日爸爸好似好D啦！但仲係無咩精神，所以我地一家三口都係留響屋企。點解係一家三口？因為婆婆今日同五姨婆去左街街，順便幫我攞手信(媽媽既亮表哥由美國帶返黎既，因為公司咁啱派佢返香港做野)。

究竟係咩手信呢？咪又係展圖豬既野羅，當中有幾件夾衣，仲要係尺碼好大既，最大既可以比四歲既小朋友著，婆婆以為我唔鍾意，其實我好鍾意(璇表姐多謝你，你揀得好靚呀！)，因為小朋友著夾衣夜晚唔駛COOL住條腰可以瞓得舒服D，另外仲有一支尿疹膏，係FOR BB搽PATPAT用，因為佢地話美國果邊唔興搽凡士林，婆婆諗住果邊D野應該好D，可以託亮表哥帶返黎，一睇之下，原來我地屋企都有一支\呢，因為之前展圖豬二個月果陣，試過皮膚敏感所以PATPAT好紅，而且爛爛地，所以當時媽媽去下萬寧買番黎俾佢搽，用黎急救佢個PATPAT，不過ANYWAY多謝你帶俾我地，至少我知道自己無買錯野。

跟住成個下晝媽媽做野所有野之後，終於頂唔順(尋日瞓左四個鐘咋)，要瞓覺，由於爸爸之前已經無精神一早瞓左，媽媽唯有捉埋展圖豬一齊瞓，足知我同展圖豬由下晝三點一路瞓到六點半先醒~~~~~~嘩！真係精神晒呀！

跟住爸爸媽媽同展圖豬落街食飯，撞啱婆婆返屋企，佢話附近有間鞋舖做緊大減價，話要買俾展圖豬，叫媽媽去睇，終於買左兩對。

另外尋晚由於媽媽通宵，所以發覺展圖豬夜晚無半夜大喊(以前晚晚都有幾次)，問過婆婆，婆婆話可能係因為D濕疹退左(係真係退左九成咁滯)，所以瞓得好喎！

就係呢兩對鞋仔啦！

爸爸病倒左

琴日唔知係咪爸爸出去做野食錯左野，今朝一起身已經肚瀉啦~~~~~~不過因為仲要做野，唯有依然出街，不過好在今日都係出去半日，下午返到屋企，已經見佢死死下，又作嘔又肚疴(佢話疴足七次喎)，並且即時大昏迷，到左傍晚媽媽見佢發冷發熱，同佢探熱時接近發燒既臨介點，就捉佢起身去睇醫生，醫生話佢係腸胃炎(都估到啦，因為爸爸次次病唔係腸胃炎就係熱氣得滯)，開左兩日藥俾佢。

幸好展圖豬今日超級乖，係有時大叫下(呢排日日都間唔中會係咁，媽媽成日話佢係做發聲練習，不過通常佢大叫時殊下佢，佢就會收聲嫁啦！)，所以都無咩問題。

由於爸爸今日病倒左，所以今晚展圖豬由婆婆take care，展圖豬你要乖乖呀，唔好累倒婆婆。