救命！展圖對眼腫到好似雞蛋咁！

今朝展圖豬起身，雙眼腫要好似雞蛋咁大，對眼得番一條線，成個羅茲威爾咁~~~~嚇到我地唔敢俾佢食藥，媽媽打電話去鄧醫生中環既診所，想問下展圖會唔會係藥物敏感，中環診所既護士答覆係叫我地先停藥，下午再打去嘉賓既診所問，因為展圖豬既病曆響果邊，下午打去嘉賓既診所，姑娘話醫生未返，叫我留電話。

到下午4點，診所終於覆電話，問我展圖眼白有無黃同紅筋，如果無就應該唔係藥物敏感，不過婆婆諗下諗下都有D擔心，所以都帶左展圖再去醫生度睇下。

鄧醫生睇完展圖對眼話應該唔係藥物敏感，因為如果係既話對眼腫唔會褪得咁快(當時褪左一半左右，但係對眼都係超腫~~~~~)

但係為左安全起見，都係停藥，另外開左1枝抗敏感藥水俾展圖~~~~~~~，今次好在無收診金，但係枝藥水都收$440~~~~~所以婆婆話覺得呢個醫生唔係咁好！

上學‧釣魚

今日媽媽收到陳老師既每日電話，老師話今日展圖豬臨放學前訓著左，仲要係超級「lum」，流晒口水要等老師同佢抺口水，老師話見就放學，所以就好好人咁將展圖豬抱比嬸嬸，等嬸嬸交展圖比婆婆，等佢可以返去瞓休息下~~~~~~！媽媽心諗，因為尋日開始展圖豬返學要返3個鐘呀嘛，尋日係生日會緊係頂到，但係今日係正式上課，以豬仔平日既schedule，呢個係瞓覺時間，所以最初頂唔順都係正常。

學校生日會

今日係學校生日會，展圖豬難得要著便服返學，所以媽媽尋日特登去買左件stitch既造型衣俾展圖著返學~~~~~唔知展圖豬佢地既生日會係點既呢？媽媽真係好想知呀！

第一次下水禮@清水灣 & 「的士」

早2日姑媽已經打左電話黎約今日下晝同展圖豬去游水，2點幾Ingrid姐姐已經渣車黎接我地，我地再出發去join埋姑媽，坐車途中，展圖豬突然指住的士叫的士，呢次係展圖第一次叫的士呢~~~~~

去到清水灣，嘩停車場超多車等位呀~~~~~！睇黎淨等位都有排，好在我地一落車，就有一位男仕走過黎，問我地係係咪泊車，因為佢咁啱要走，見我地幾個女人同一個BB，所以打算叫我地泊佢個位，仲要好醒咁叫我地一齊傾一陣計扮係Friend，咁我地泊佢個位時，d人就唔會鼓噪~~~~~~

泊好位落到沙難大家就分別換好泳衣，期間展圖豬不停係咁玩沙 (因為已經一早換左游水片片)，仲要自己想衝落個海，好在姑媽捉佢返黎。搞掂晒落海呀，展圖豬都唔係好驚，勁開心~~~~~玩足個幾鐘！之後5點幾我地就返屋企，因為爺爺同嫲嫲今晚黎食飯~~~~~坐車返屋企途中展圖豬太攰，瞓著在啦！

第八天上學‧終於開聲啦

今日展圖豬既返學時間終於加到2小時，媽媽一直都好擔心展圖豬會太攰。

今日下午Miss Chan話俾媽媽知今日展圖豬返學時終於開聲講野，媽媽問係幾時，老師話係下午食茶點果陣~~~~~~講BB話！(係呢今日因為返學時間長左，終於有茶點時間!)媽媽擔心展圖豬食野太論盡，所以問下老師，老師話少少啦，小朋友實有D既。

放學時老師話對展圖豬講BYEBYE展圖豬都有細細聲用BB話回應呢~~~~老師話見到展圖豬講野都好開心所以抱住展圖豬錫錫呢~~~~~

今日展圖豬臨瞓時又係要呵媽媽、爸爸同婆婆既兩邊面，要加上錫咀咀一啖，但係今日展圖豬係咬我個咀一啖(當然係唔痛)，不過媽媽真係覺得好搞笑~~~~~

第七天上學

今日陳老師來電，講番展圖豬返學既情形，學校又係再次吹泡泡，展圖玩得好開心，而且會好乖咁幫手推車執玩具，點名都學會舉手啦，老師話佢玩完俾水佢會自己飲。

聽日開始返學時間會加到2個鐘，而且茶點時間。

第六天上學

尋日咁啱買完吹吹泡泡，今日咁啱又要學校玩吹泡泡(陳老師講既)，話展圖玩得好開心呢！

反斗城&吹泡泡

今日媽媽同爸爸見比較得閒，又無咩地方特別想去，所以就帶展圖豬去玩具反斗城買吹泡泡，雖然我地屋企有泡泡機同泡泡槍，但係媽媽想要吹泡泡比展圖睇，等佢學下吹泡泡。

展圖去到反斗城，呢度摸下，果度摸下，都玩左成個鐘，不過好在佢唔會扭計話要買野(定係未識扭計？)。

夜晚媽媽同爸爸帶展圖落樓下公園吹泡泡，展圖同其他小朋友玩得好開心，呢枝泡泡唔錯，有6個孔，好容易吹到好多泡出黎，而且好香水果味，不過好苦(媽媽唔小心掂到)。

後來唔知係咪因為媽媽太比心機吹，吹到好似有D缺氧頭暈添！

第五天上學

今晚食完飯後，爸爸見無咩特別野要做，就帶左展圖豬落街散步。

返到黎後爸爸話一落到街，展圖得就帶爸爸一路行一路行，行到去平時搭車返學既小巴站，然後指D車叫巴士 (展圖無輪小巴同巴士都係叫巴士)，好似想要返學咁。之後爸爸拖佢走仲扭計添~~~~~！

希望展圖豬大個都鍾意返學啦！

第四天上學‧爸爸接放學

今日因為爸爸比預計時間早左收工，所以可以接到展圖豬放學。本來都無咩特別，不過由於放學時大家要排隊先可以離開，而展圖豬又係排得較後既一個，所以當佢見到爸爸又出唔到黎時，即時眼濕濕想喊~~~~~！

第三天上學

今日開始直到9月開始搭校車放學為止，每日多數都係由婆婆帶展圖返學。

之前期待既事件終於發生，就係學校老師Miss Chan打黎講番展圖豬每日返學既進展。

一早之前媽媽已經打聽過學校初期係學日日打電話俾家長講番小朋友返學返成點，不過可能早幾日每日都有我或者爸爸接放學，老師已經大約講左展圖當日既情況，所以就無接過老師電話。

今日下午放學後老師打黎講番展圖豬話展圖豬今日返學好開心，不過有時會坐唔定走黎走去~~~~

申請回鄉咭+第二天上學

爸爸放假上午帶展圖豬去中旅社，下午因為爸爸約左一位攝影師食飯，所以由婆婆帶展圖豬返學，返學就爸爸同婆婆一齊接放學。

展圖豬睇黎真係好鍾意返學，到放學時唔肯走添！

第一天正式返學

今日係展圖第一日正式返學，媽媽今日放假陪展圖豬，返學前我地先去影証件相先，因為媽媽同展圖豬book左聽日去中旅社申請回鄉咭。

返到學校等左一陣，reception開門俾我地入校園範圍，嬸嬸先帶展圖去vv先，然後展圖就入課室啦！不過今日家長唔可以入課室陪小朋友啦，所以媽媽唯有響門外隔住玻璃睇，展圖豬今日返學都好開心，媽媽見佢好似響屋企玩咁，不停係咁攞玩具玩。不過展圖都好乖，玩完d玩具有時會自助自覺，有時老師叫一下就會clear up~~~~~~

今日返學都係1小時，放學後我地到攞番頭先影既証件相，同埋去快餐店食少少野，不過展圖豬真係無晒電，上一秒仲食緊媽媽既碗仔翅，下一秒竟然已經瞓著左~~~~

遊戲日@Think Kindergarden

今日係展圖豬返幼稚園既第一日，由於媽媽要做野，所以同唔到展圖豬去，不過爸爸、婆婆同姑媽都陪左展圖豬返學。

一去到學校，可能由於有遊樂場既關係，所以展圖豬已經好開心周圍玩，直至老師叫返入課室~~~~~~因為以為無得玩，所以有dd扭計，不過好快無事。

入到課室，雖然今日家長可以入課室同抱住小朋友上堂，但係大家由於想展圖快d適應，所以都係企響一邊睇 (仲要企到好埋，唔比展圖豬睇到！)，好在展圖豬好叻，適應良好 (但係好多同學仔喊) ，仲識得周圍攞玩具玩，只不過係有d坐唔定，成日走左去，要勞煩老師同助教捉番佢埋位。

放學後媽媽去稻香會合大家飲茶，其實展圖豬可能真係玩得太耐，瞓著左lu~~~~！

爸爸 & KISS

我地肯定展圖豬識叫爸爸。

 今日我同婆婆帶展圖豬去旺角會合爸爸去睇早前既驗身報告，一去到診所放低展圖豬，展圖豬見到爸爸就走過去，仲叫「爸爸」~~~~~~，之後夜晚番到屋企，又係自己走去爸爸度，叫「爸爸」，展圖豬第一個會叫既人係爸爸呢~~~~！

仲有一樣就係展圖豬呢個星期開始除左，會「呵」(面頰對面頰)我地，仲會錫我地個嘴，由於我地從來無教過展圖豬，所以一直好奇怪展圖豬響邊度學番黎，今日迷底終於揭開，我地見到展圖豬睇開ELMO教著衫既碟原來ELMO有錫入面個BB，所以應該係響呢度學番黎，雖然話同展圖豬錫錫好似唔衛生，但係真係好SWEET呀~~~~！

媽媽生日@海洋公園

因為媽今日有野做，所以十二點幾先番屋企同爸爸、婆婆&展圖豬去海洋公園，好在今日門口賣票唔駛排隊，所以好快入到去~~~~~

入到去，第一時間帶展圖豬去熊貓館，因為上次去海洋公園展圖豬睇左海洋劇場同海洋館已經無電，所以我地淨係可以同瞓著左既展圖豬去熊貓館~~~~~~

因為今日熊貓安安好合作，坐正係玻璃前面食竹葉，所以入到去熊貓館展圖豬見到安安已經嘩嘩聲好開心~~~~~既然見展圖豬開心，所以由得展圖豬睇左好耐，管埋員仲好好人幫我地影相，到展圖豬睇到肯行開時我地就去睇新既亞洲動物館，之後諗住去海洋館，但係真係太熱，所以去餐應坐一陣，買左DD野俾展圖豬食，俾D野佢飲，之後海洋劇場已經差不多到時間表演，所以我地諗住先睇海洋劇場，但係展圖豬睇睇下竟然瞓著左，所以我地決定唔再睇搭的士番屋企。

返到屋企，展圖豬又醒番，咁我地即刻同佢沖涼，再去麗港軒食飯(之前媽媽訂左枱)，因為爸爸之前一日話想食潮州野，其實我地係第一次去食呢，不過真係都幾好味~~~~尤其是個湯~~~~之後就返屋企啦！媽媽今日好開心呀，因為我地一家人都好開心呢~~~~！