展圖豬@南丫島

今日九點幾同展圖豬出門口，爸爸媽媽同展圖豬去南丫島旅行~~~~~

我地同響港外線碼頭同爸爸既朋友黑仔叔叔&佢既太太集合之後，就一齊出發搭船去索古灣，一上到船本來諗住食碗船麵先~~~~~~~點知依家既船原來係無麵食既！

所以我同爸爸唯有餓住肚得過到南丫島先食早餐啦！

到左南丫島媽媽首先係要買手信先~~~~~就係辣椒豆鼓、蒜蓉豆鼓、XO醬.......等！因為N年前媽媽同爸爸曾經去過南丫島買過呢樣野煮野真係~~~~~好正！

之後我地就開始行山啦~~~~~南丫島本身條行山路唔係太長，平時行個幾鐘就OK，不過帶住展圖豬，我地就一共行左四個鐘~~~~~~因為展圖豬有時扭計，所以到左中間之後媽媽抱左佢行一陣，爸爸就揹住佢行左好大段路。

好在我地唔係由榕樹灣出發，因為落山得發覺果邊係斜好多~~~~~~行上去一定超辛苦！

中途我地仲食左超冰凍既「媽」條~~~~~~~媽媽都係第一次食咋！阿婆豆腐花、燒雞翼、串燒尤魚~~~~~~~！

之後就搭船返中環~~~~~~然後番屋企LU！

雖然今日都好辛苦，不過媽媽見展圖豬好開心，所以都好開心呀！

戒咀大作戰day 5

今日婆婆有節目，所以展圖豬全權由媽媽同爸爸負責。

我諗展圖豬介奶咀都叫成功掛~~~~雖然始終因為無左奶咀所以比較難瞓著，不過依家都尚算ok啦！因為媽媽發覺展圖豬太鍾意食奶咀，有時整跌左，又想執番黎食，本身媽媽俾佢食奶咀就係因為唔想佢隻手周圍摸完食手指，怕污糟！無理由依家由得佢咁........再加上下年展圖豬就開始返學，無理由返學仲要食住個奶咀，所以都係介左佢啦！

展圖豬返學前媽媽仲要教識展圖豬自己食飯飲水，飲水其實依家都ok，佢口渴見到個飲管杯會自己攞黎飲，不過係仲未識開個杯。至於食飯佢真係太懶，幫佢「筆」埋d野落枝匙度，佢都唔肯放入口。

晏晝我地call左kfc既delivery，食左最新果隻桶餐yummy~~~~~~

戒咀大作戰day 4

尋晚展圖豬瞓得好好，幸好~~~~~~！所以我地都有覺好瞓！戒奶咀到依家尚算成功，不過無左個奶咀展圖豬好似唔識吞口水咁，所以成日流好多口水，就算同佢抺左，個下巴仔都係紅晒~~~~~~陰公！

今朝所有風球都除下，爸爸又要正常去做野啦！不過今日可以好早返，所以爸爸四點返屋企時call我地落樓下飲下午茶~~~~~~！

媽媽今日同佢著馬鎦衫~~~~~~不過唔記得左影相！淨係同展圖豬影相上次0708bk既生日party收到果件衫同對襪仔。

戒咀大作戰day 3 + 9號風球 + 爸爸休息

今日係展圖豬介奶咀第3日，相當難捱~~~~~~~！尋晚佢由於無左個奶咀，成晚都瞓唔好，成晚都喊醒，仲咀仔郁郁，好似啜緊奶咀咁~~~~

今日都左佢既瞓晏覺，同夜晚覺既時間，由於無左奶咀，所以喊左成個幾鐘先瞓得著，期間仲要不停抱住佢，嚴重既時候口水鼻涕都出晒黎，好似d人毒瘾發作咁。仲要到越夜喊得越勁~~~~~

不過好在可能因為之前一日已經瞓得唔好，而晏晝覺又因為無咀瞓少左一個鐘，所以夜晚八點幾已經瞓左，而且瞓得好沉，希望今晚大家都有覺好瞓啦！

另外今日係展圖豬出世以來第一次既九號風球，由於爸爸本來今日要出outdoor影野，但係因為打風既原因，所以function時取消，因此我地難得可以偷到一日既悠閒日子。

全家係喺齊屋企，展圖豬好明顯係開心好多嫁！

戒咀大作戰day 2 + 學識拜拜 + 捐過門欄入房

今日係展圖豬開始戒奶咀既第二日，事情無早幾日咁順利~~~~早兩日容易瞓著可能係因為展圖豬病左，食左藥所以容易瞓！晏晝覺同夜晚都好扭計~~~~仲要加上展圖豬仲有鼻水，瞓得唔好，同佢吸親鼻都喊到拆天~~~~~~好陰公！

早排教過展圖豬拜拜幾次，見佢好以學唔識，反正小朋友見到拜拜都唔開心，唔識都無所謂，大左一定會。點知今日食午飯時教左展圖豬一次就學識左~~~~真係好奇怪！

我地響屋企房門口既走廊整左個門欄，個門欄特登整高d，等可以俾BB(我隻狗)可以入到去飲水同小便，順便有時俾展圖豬捉得太緊時可以避下風頭！今日我入左雜物房攞野，突然間聽到聲，擰轉頭一望，展圖豬竟然發覺展圖豬入左黎。究竟佢係點入黎既呢？係上面入黎，定係趴入黎呢？結果後來我地引佢終於發現展圖豬係爬左黎既~~~~~~

呢個就係案發現場~~~~~

另外因為琴日睇左一篇文章教點佢小朋友玩可以訓練佢地既專注地，我今日試過佢展圖豬玩推波，雖然佢唔係好識推俾我，但係用手撥撥下都會撞中，不過我look親個波俾佢，佢都係成個人仔中過去抱住個波，仲要親吻個波~~~~~~真係超可愛！

第一次有姐姐賣旗俾展圖 + 笑容再現 + 戒咀大作戰day 1

因為見展圖豬今朝好番晒，連咳到無~~~~~~所以照常帶佢番playgroup，媽媽帶佢去到銅鑼灣出左地鐵無幾耐，有兩個姐姐賣緊旗，仲要貼左張俾展圖豬，事後上到班房媽媽先至發現。番到屋企緊係要影張相留念啦！

額頭上面「魚」左係因為早兩日病左發軟蹄失平衡撞落個文件櫃所致！

今日展圖豬真係精神晒，返到playgroup後期，miss Haley抱佢，佢就用個頭撞miss haley個頭(展圖鍾意用頭撞佢鍾意既人！)，爬去新黎既女同學度，咬人地隻腳~~~~~，落堂前仲要不停咁笑，勁開心！

另外由於媽媽發覺展圖呢兩日唔知點解唔准人抱佢「tum」佢瞓覺，而係要放佢落梳化，挨住d抱枕睇住電視，然後自我「吹」眠瞓著教，所以由琴晚開始，除左半夜果次，展圖豬係唔駛用奶咀就可以瞓著，既然係咁，媽媽就諗住試下開始同佢無痛介奶咀，希望可以成功啦！

夜晚同展圖豬換衫落樓下食飯，咁啱爸爸返到黎，話好得意一定要影幾張！

好番好多啦！

尋日晏晝開始展圖豬佢已經退晒燒，雖然仲係有咳，但係已經咳鬆左，無之前咁辛苦，鼻仔都無之前咁塞。

之不過始終因為病緊，所以成日無咩精神，無咩笑容，間唔中仲會扭下計，但係又唔係要玩，總之媽媽就覺得佢好可憐~~~~~

仲要成日食d唔鍾意既藥水，又要吸鼻，而且次次吸鼻都減到顛左，個人震晒出唔要聲，諗起都已經好肉赤啦！

無展圖豬份既0708 bk bb一歲生日會

今日係半年前媽媽已經同展圖豬報左名參加baby kingdom既一歲生日會，但係好可惜因為展圖豬今日仲有少少燒，為左避免展圖豬辛苦，同埋傳染比其他既小朋友，所以決定展圖豬今日唔去啦！

但係媽媽大啦啦俾左六百蚊出黎，婆婆話無理由一個都唔去，所以媽媽同爸爸就去當食番餐~~~~~~

其實我地已經遲左出門，個party係十二點開始，我地十二點先出門口，兩點幾已經番到屋企。

其實個party應該好好玩，只不過少左展圖豬，媽媽就一d都唔覺得好玩.......

不過都同幾位熟d既0708 bk媽媽傾左幾句......

之後一到抽獎完畢後，就急急腳番屋企睇展圖豬啦！

唔退燒再睇醫生+問題BB餅

由琴晚開始，展圖豬雖然一路食住退燒藥，但係一路都一低燒中，無退過燒。所以今日一早就打電話去高醫生度預約，但係因為今日係高醫日放假後第一日到診，所以超多人，一約已經已到下午一點三。

媽媽同婆婆廾二點九已經帶展圖豬去到高醫生既診所，但係果度真係超多人，入面迫到企唔到，仲要排隊坐到出去走廊。問下姑娘仲有排等，所以落樓下茶餐廳食少少野，上番去兩點幾，仲有排等，終於等到三點鐘先有得睇，高醫生話展圖豬係喉嚨發炎，開左幾日藥俾展圖豬食。

番到屋企食左D藥到夜晚展圖豬又生猛番，退左燒，希望可以快D好番啦！

今日睇到報紙話消委會調查市面上既BB食品，其中有兩隻有問題既BB餅既含納量超標，包括Pigeon Calcium Seaweed Cracker及Healthy Times Honey Graham Hugga bear Cookies。

報紙上面寫由於嬰兒內臟發展未成熟，納及添加糖既攝會越少會越好，否則BB長大後會增加患上高血壓及心血管病既風險。另外進食太多鹽會加重嬰幼兒腎臟負荷，所以BB既食物不應加鹽。

咳得厲害~~~~~

今日展圖豬仍然病緊~~~~~~成日都無咩退過燒，食左退燒藥就係發燒既臨界點，但係一唔食退燒藥就即時燒番~~~~~~

雖然今日既胃口好明顯比之前好左d，7安奶開稀至8安可以飲到6安左右(平時飲7安)，食飯仔雖然有dd扭，但係都肯食晒!

之不過之前未有既病徵都出晒黎，咳、有痰、鼻水，見到佢咳得咁辛苦真係有d心痛！不過好在今日精神比起尋日好左好多，至少會自己攞野玩，不過明顯體力係差左，而且無咩笑容！

朝早仲好精神，可以玩成兩個幾鐘~~~~~！

夜晚就成晚眼淚汪汪咁，好可憐！

睇怕聽日都要去睇多次醫生~~~~~星期日既0708生日會展圖都可能去唔到lu~~~~~婆婆話叫媽媽同爸爸去wor~~~~~但係就算去左都玩得唔安樂啦~~~~~

發燒~~~~與寶兒錯身而過！

尋晚展圖豬臨瞓前個身已經好似熱熱地咁，後來同佢耳探完之後發覺並無發燒。不過成晚好似瞓得唔係幾好咁，到左零晨五點鐘左右，婆婆摸下展圖豬，發覺佢變左個火爐仔咁，成身好熱，所以就叫醒爸爸媽媽同佢探熱。一探之下原來已經燒到39.2C，所以即時餵展圖豬食退燒藥先，睇下點樣，打算如果過多半個鐘都唔退燒就帶佢去睇急症。

朝早七點幾發燒中既展圖豬~~~~~~(呢次係展圖豬出世以來第二次發燒)！

由於爸爸聽日都有野做，所以媽媽同婆婆輪流睇住展圖豬，首先係媽媽，好在展圖豬退燒都退得好快，唔駛半個鐘已經退左燒，之後大約七點半就由婆婆接手，而且婆婆同媽媽打算九點幾帶展圖豬出去睇醫生！

到九點半我地就出門口，途中打俾高醫生，諗住掛號，點知晴天霹靂，高醫生竟然放緊假星期六先番，好在我地仲可以睇曾醫生，由於曾醫十一點先開始睇症，所以我地唯有響診所樓下食少少野先。

媽媽同婆婆十點四十五分就上曾醫生度，一上到去，點解唔同左樣既？打番去問姑娘，話響18樓，心諗可能係自己記左樓層，到左18樓，行番以前個方向，又唔同左，真係咁邪？原來曾醫生幾個月前已經搬左診所去第二個單位~~~~~

姑娘先同展圖度高75.5CM，磅重10.1KG，再探熱~~~~~仲有DD燒，因為果陣曾醫生仲未返黎，媽媽順口同姑娘傾幾句，話早幾日展圖朋友寶兒都黎過，姑娘話原來今日寶兒都預約左十二點幾返黎覆診，之後十一點曾醫生準時返到黎，睇過展圖豬，話係病毒感染，喉嚨有DD紅，大約星期六會退燒，如果返屋企後持續唔退燒或者嘔既話就要即刻返去覆診，但係如果星期六無再燒過就唔駛再返去。由於果陣係十一點半咋！所以我地無見到寶兒就走左啦！

由於尋晚我地淨係用耳探機同展圖豬探熱，媽媽覺得唔係好準，所以婆婆就話買番枝電子探熱針可以同展圖豬肛探~~~~

之後媽媽就同婆婆返屋企，途中嫲嫲地電話黎話買左D野俾爸爸，順便上黎探下展圖豬。

返到屋企喂展圖豬食飯仔，好在都肯食，不過係唔係好肯飲水同飲湯~~~~~！展圖豬食完飯仔玩左一陣就開始瞓覺，一直瞓到夜晚八點，途中食左一次藥同飲奶，之後八點媽媽叫醒佢諗住同佢餵飯仔，一摸之下個身又係好熱，用耳探機探下36.8C即係無燒，不過媽媽覺得唔係好準，所以再同展圖豬肛探，原來燒到39.4C~~~~~爭好鬼遠!

傍晚展圖豬再發過燒，媽媽用溫水同佢抺身順便探熱，不過期間展圖豬疴濕左爸爸媽媽張床~~~~~

燒到面紅紅，抺完身換好晒衫貼埋退熱貼既展圖豬！

所以各位媽媽如果BB發燒為穩陣起見都係肛探好D~~~~~~

食完飯仔，玩左一陣，展圖豬又好攰咁所以就再「TUM」佢瞓覺，今晚媽媽同婆婆又係輪流照顧展圖豬啦!希望展圖豬可以快D好番啦！

另外想要問下各位朋友有無邊隻退熱貼係貼得穩陣D，我用過小林同白元都係好易跌落黎~~~~~？

巧遇~~~~鬧鐘媽！

今朝展圖豬要返playgroup，由於時間尚早，所以同展圖落樓下食早餐先~~~~~不過展圖豬淨係可以食白麵包！食完早餐後就諗住去搭車~~~~~

一出商場無耐，就俾人響後面嗌住，轉頭一望，原來我我生完展圖後黎過我地屋企，幫左我地好大忙既鬧鐘媽巧遇~~~~鬧鐘媽！

鬧鐘媽仲話展圖生得好高添~~~~跟住傾左幾句，唔知鬧鐘媽係咪知道我地既煩惱(展圖豬仲未識講野同行路)，所以話俾我知原來鬧鐘仔都係未肯講野，同埋都係啱啱行到。而且鬧鐘媽仲話俾我知如果BB仔爬多D，對佢地腦部協調有好處，爬行多D會好D咁話！

呢個意見係Professional嫁，大家要信呀！

好啦!放下相先~~~~呢d係今日媽媽既功課！

啱啱瞓醒~~~~成個憂鬱小生咁！

展圖豬真係好鍾意睇書~~~~~！

展圖豬都唔知解好鍾意摺住對腳黎坐！

呢排展圖豬唔知點解好鍾意「I」落個cushion度！

媽媽真係好鍾意展圖豬呢個笑容！

睇睇下書又要睇電視！

己渣奶樽--->原來唔係唔識，係懶唧！

今日媽媽下晝出左去反斗城換玩具呀~~~~~原因係展圖豬上個月尾生日會時收左兩件玩具，而屋企又有類似既，所以今日就去換啦！

因為展圖佢有三個表哥仔大佢dd，所以佢不嬲接收左好多免費玩具，原本媽媽心諗希望換d第二d特別d，或者係反斗城先有得賣既玩具俾展圖豬，點知行黎行去都無咩啱心水，好似樣樣都有d差不多既野~~~~~咁唯有買媽媽心目中既後備玩具---->單車。

不過原來尖沙咀既反斗城雖然係大，但係單既既選擇，尤其是可以俾男仔揀既真係好少，之前見到有網友響又一城果間買到既thomas單車都無，要摺得果d，仲係諗都唔駛諗。所以媽媽唯有揀左部米奇單車.......另外再買左一部泡泡機，諗住第日展圖豬識行識走時，拎落樓下俾佢玩追泡泡。

又後等左兩個鐘，等d staff切好部單車就番屋企，點知果陣個天落緊毛毛雨，搞到超論盡~~~~~~~不過返到屋企抺乾淨部單車俾展圖豬佢好似好大興趣咁，真係咩都抵番晒！

夜晚臨訓前婆婆同佢換片片，側面放左支奶，平時我地無咁做，一係飲左奶先，一係支奶放響第二度，點知展圖豬望望下，自己伸手攞左支奶想放入口，我見佢想飲同佢開左個蓋，佢又扶住個奶樽飲得好好地，不過因為我係用玻璃奶樽都幾重，見佢飲左半支，咪用隻手幫佢「豆」住個樽等佢唔駛飲得咁辛苦，點知佢發現左就即刻放手唔肯拎~~~~~~原來佢真係好鬼懶！

成歲仔先第一次渣奶樽!仲要郁黎郁去！

一同佢攞個奶樽，就放手~~~~正一大懶蟲！

鍾意睇史力加~~~~~？

今日無咩做，響屋企au~~~~~~係落街食左早餐同飲茶咋！

今晚媽媽自動請纓煮飯~~~~~煑左一樣叫「餓釘」既野，係響一位住響日本既blog友度學番黎！另外仲有茶碗蒸.......

婆婆同爸爸食完後既評語係~~~~~

茶碗蒸~~~~好水.......蒸水蛋好d
餓釘~~~~爸爸話好似菜乾湯煮出黎咁好清，婆婆話都ok清清地幾好......

睇黎媽媽今次失敗左~~~~定係日本人既家常飯係咁清？真係唔知.....

之後電視播史力加，展圖豬超興奮不停大笑&尖叫，仲要走埋去電視度近距離觀看。

寶兒一歲生日會

今日係一位BK0708 BB寶兒既生日會，媽媽早幾日知道佢既媽媽Joey同佢搞生日會就報定名啦~~~~~~無辦法啦！早排媽媽比較忙，所以搞到展圖豬錯過左好多朋友仔既生日會，今次日子ok，哽係一定要黎參加！

下晝食完飯~~~又扮貓樣引我地笑。

出發前又影兩張~~~~！

因為生日會下傍晚先至開始，所以媽媽響五點半先約好爸爸做完野後一齊由地鐵站去寶兒屋企，去到之後原來另一位朋友仔軒軒同佢媽媽、仲有另一位媽媽金仔都黎左~~~~~

展圖豬同軒軒既生日會主角寶兒都玩得好開心~~~~媽媽發覺展圖豬原來好鍾意玩寶兒隻彈彈馬，所以諗住買番個俾佢，不過難為寶兒為因為d唔舒服，所以有時少少不在狀態。

因為今日係BBQ Party，所以響天台燒野食，不過因為媽媽怕展圖太熱，所以大部份時間都係響樓下歎冷氣，而爸爸就辛苦啦，因為要燒野食俾媽媽食~~~~~~哈哈！

到九點幾左右，人齊晒，就開始切蛋糕lu~~~~~之後因為爸爸發覺展圖開始低電量，所以早少少番屋企~~~~~不過總括而言，今日展圖好開心！

我地仲要又食有拎，有禮物呀~~~~~(圖中相片果位主角就係寶兒啦！)

多謝晒，joey同佢老公既招呼~~~~當然仲有壽星女寶兒啦！

BB展人多到~~~~~~呢！

今朝媽媽一早十點鐘出發去會展，今日係BB展既頭一日，媽媽希望星期五既上晝會少D人~~~~~~

去到會展雖然都未至於打蛇餅，但係都唔少人排隊買飛入場，正當我諗住過去排隊時，竟然俾人叫住，原來係一位舊同事，原來佢依家做緊迪迪尼度做緊~~~~哈哈！媽媽今次出路遇貴人，唔駛排隊，又唔駛俾錢入場~~~~~~~~

入到去，雖然都叫多人，但係未至至於太多，所以慢慢行，點知越行越多越行越多，後來迫到行唔到咁滯，真係無咩心機。

不過原來今次EXPO都無PLAYGROUP，所以心目中既目的都達唔到，但係都買左少少野，最抵係買左兩件COMBI玩具~~~~今次七折呀！仲有DD野都幾抵所以都買左DD。

行到十二點幾開始覺得無咩好行，所以就閃人LU~~~~~之後既然去開灣仔，就緊係去下二德惠啦!今次媽媽買左朱古力、玫瑰精油、同玫瑰花粉，想試下睇下整唔整到玫瑰味既朱古力，因為之前響CHOCOLINE度食果一隻超好味~~~~~~好懷念~~~之但係佢好貴又遠，所以想試下可唔可以自己整~~~~~跟住就攰到爆咁番屋企！

今日晏晝響屋企玩，媽媽又影左幾張~~~~不過對唔到焦~~~~好渣！

而今晚係我地中國既奧運開幕式，一家都響屋企睇到眼定定，好感動~~~~~~唔知應該點形容心情！

展圖豬有份睇奧運開幕式，不過好似唔係好感興趣咋！

展圖豬好鍾意捐枱底，呢張証據係爸爸影既！

八字唔夾？

今日二叔黎我地屋企整d野，咁啱展圖豬瞓晏覺瞓醒左，咁媽媽自然係抱佢出廳玩，點知佢一見到二叔即時大喊~~~~~~仲係好大聲果隻，而二叔其實根本咩都無做過淨係坐響度~~~~~真係好奇怪！！！！

其實展圖豬對二叔咁已經唔係第一次，試過好幾次二叔同佢講野，語氣又唔係惡，又唔係大聲，但係展圖豬一聽到就會即時大喊，好奇怪~~~~~所以我就成日笑話二叔同展圖豬八字唔夾~~~~~

另外今日展圖豬佢俾媽媽偷睇到佢企起身，偷偷地攞電視櫃上面既後，唔知係咪掛住睇件野，竟然放左手幾秒鐘自己企，雖然之後又扶番個櫃，但已經令媽媽好驚喜~~~~~

媽媽偷用爸爸相機

今日八號風球~~~~~朝早媽媽餵飯俾展圖豬途中，佢竟然中途無電暈左，由於媽媽好耐之前已經唔滿意部video既相機效果，所以偷偷地攞左爸爸部相機影左幾張。

大家欣賞下媽媽第一次既作品啦~~~~~

仲有今日媽媽見到bk0708既寶兒豬黎緊星期六會開生日會，今次難得時間available緊係要報名啦~~~~~！

今日爸爸食緊芋頭脆皮雪條，問我展圖豬食唔食得，我話俾佢試少少囉，結果爸爸俾佢「lam」左幾啖，仲要拍爸爸俾佢食，睇黎佢真係幾鍾意食零食~~~~

今晚展圖豬好早訓，夜晚爸爸叫我去聞下展圖豬條片片係咪疴左臭臭，果陣展圖豬訓響樹，我同爸爸一左一右咁聞佢條片片，好搞笑~~~~我細細聲問爸爸：「其實你係咪好enjoy聞佢條片？」爸爸竟然答係，仲要錫左展圖豬一啖~~~~~

我的第一個便當

琴日買左新玩具，咁啱屋企早前買左d野食，諗住整壽司，哽係整d黎玩下啦~~~~~

所以今日媽媽就開工做左一個便當，諗住俾爸爸~~~~~不過今日媽媽煮日本米果陣衰左，唔記得日本米係吸水d，所以d米煮出黎硬左d，黏性唔夠，做出黎既壽司好散~~~~~~好在今次唔係諗住請人食既唧！

媽媽整下整下發覺原來最難整既係剪紫菜，所以個人仔同熊貓個樣都係衰衰地咁，希望媽媽第日做多d會熟能生巧啦!因為媽媽想第日展圖豬可以帶靚飯盒返學~~~~

不過今次係第一次媽媽對呢個飯盒都叫好滿意架啦~~~~！

買左好左做飯團既工具

因為今日爸爸既朋友請我地去CAFE KOOL度食自助餐，親出開去，諗住去倫敦果間jusco 10蚊店行下，睇下有無心水既整野食野，事關早排見到個網友響果度買左d矽膠模，所以想順便睇下有無~~~~~~

去到原來已經執左，變左間modern beauty，唔順氣，唯有搭車過黃埔~~~~~

去到見到好多想買既野，買左幾個矽膠模，諗住可以整甜品/焗野/第二時整小型便堂俾展圖豬食，順帶一提媽媽最近迷上左日本小朋友既便當，上網搵左好多圖，諗住遲d得閒試下整！

另外仲見到好多飯糰模，其實呢樣野啱啱出時都買過，不過不知整既竅門，所以d飯成日黏住個模，結果早幾日上網睇到，原來個模係要濕濕地整先至唔會黏住晒d飯，所以又買個幾個唔到形狀既！

買左飯糰模無理由整白飯架~~~~所以又買左幾隻飯素!仲買左鰹魚粉，諗住試下整日式甜蛋，同買左支汁整親子丼！!

結果買左咁多野都係登登登登~~~~盛惠$170超級抵！

$170就有咁多野~~~~

Black Angus vs New Zealand

早係兩個幾用前，媽媽去左間凍肉批發買左呢兩個牛扒每樣一件，諗住煎係比較下睇下點解兩個價錢分別咁大~~~，black angus ~$100一件、new zealand ~$30一件

因為以前媽媽煎牛扒，就算用幾貴既扒都好，可能係為係用普通易潔鑊煎既關係，總係唔好食，就算煎到塊扒好少少濃，d肉汁都搞到水汪汪唔夠香，所以次次唯有用d牛扒汁做調味，side左塊扒，早排見惠康有wedgwood烤盆即時換番個，諗住用黎煎牛扒。

今次就係用呢兩塊扒同個烤盆開光，因為個盆夠大，可以一齊煎，而煎之前淨係用左dd海鹽同五色胡椒醃左唔夠五分鐘。今次我係用牛油+橄欖油黎開鑊，每邊先煎45s，再煎1min。

出黎效果好好，終於煎到心目中合格既牛扒，至於相，因為大家太肚餓食得太快，所以一張都無影~~~~~

講番兩塊扒先我覺得black angus係焾d，但係new zealand就香d，其實差別我地一致覺得唔值爭三倍咁多，所以以後我都可能買new zealand算lu，又慳番好多~~~~

不過講番工具真係好緊要，今次既煎牛扒水準可以拍住街既steak house，以前煎極都係好差~~~~~

另外今日媽媽仲整左鰻魚汁焗帶子、炸洋葱鹹牛肉薯餅同埋冷麵。

媽媽既生日

今日係媽媽生日，而媽媽今年要求慶祝生日既方法係，同展圖豬去海洋公園。

由於適逢海洋公園做promotion，而婆婆又咁啱係免費，一位陪同婆婆既人可以半價-->即係爸爸，展圖豬又係三歲以下，換言之我地一家幾口淨係要俾半個大人錢，即係$104就可以入去玩啦~~~~~超級抵呀！

我地一早等展圖豬飲完奶，就落樓下食早餐，之後就搭車去海洋公園，去到時已經十點半啦~~~~

之後由於十一點半有海洋劇場，所以決定去睇先，去到等左一陣，就已經開場，雖然海洋劇場都幾長，不過展圖豬睇得好留心，而且好開心添，成日要企起身睇，睇睇下又拍手又扮貓樣，仲會手舞足蹈，散場後，我地哽係去就近既海洋館。

因為到左海洋館已經十二點半，所以餵左展圖豬食飯先，然後再同佢睇魚，唔知係咪好新鮮，佢猛咁摸個魚缸。

出左海洋館，見有幾點雨，所以去左間gift shop，婆婆見到有個好cute既熊貓袋仔，就買左俾展圖豬，然後媽媽醒起入海洋館時我地影左兩張相，所以叫爸爸睇下影得好唔好，ok既話就買番黎做記念，而爸爸當然買左啦！

停左雨我地就啱纜車落山，諗住帶展圖豬去睇熊貓，因為展圖豬未出世前，媽媽已經話第日佢出左世，要同佢著著熊貓衫睇熊貓同埋影相。

點知我地搭纜車時，展圖仲仲好八掛咁周圍望，但係可能今日d野實在太新奇，用好多精神去睇，所以一落纜車，放左展圖豬落車仔，佢竟然即時訓著左~~~~~

本來媽媽諗住搵間有冷氣既餐廳食野，順便等展圖豬訓醒再去睇熊貓，但係原來山下面既餐廳係無冷氣，所以爸爸提議不如淨係去熊貓館影下相就算，去到熊貓館，四隻熊貓加上我手抱既都訓著晒，而且仲係超lum，所以決定都係影下相就算~~~~

之後我地就走lu，果時大約兩點左右，返到樓下飲埋茶就返屋企~~~~

雖然呢個係媽媽咁耐以黎最簡單既生日，但係唔知係咪因為見到展圖豬開心，所以媽媽都好開心，仲覺得呢個係有史以黎最開心既生日！