Angry Bird Cake

呢幾日晚色趕工呢，因為接左一毎Angry Bird蛋糕order，其實angry bird都未做過，不過應該唔太難做，主要都係時間同心機。

今次呢個angry bird蛋糕正式係有得食有得玩，因為蛋糕上面既所有石仔、木頭、豬仔、angry bird，即係所有野都有可以移動既，目的係想要真係可以俾小朋友彈angry bird射豬仔~~~~~畢竟angry bird係一個遊戲黎，咁樣先至有意思！

今次呢個蛋糕淨係蛋糕體同butter cream，未加上任何裝飾都已經有接近7磅，加埋所有裝飾，超過10磅~~~~~~

希望LokLok小朋友收到呢個蛋糕會鍾意。

婆婆見到呢個蛋糕都好鍾意，話不如下年生日做俾圖圖，媽媽問左圖圖，佢話要Transformer蛋糕，呢個有d難度呢，不過有排先係圖圖生日，話唔定佢到時又改變主意。

其實媽媽仲有好多蛋糕想做，無奈圖圖生日一年得一次，幾時媽媽先有機會整多d呢????

所有公仔同配件都可以移動

港島西一日遊@觀光巴士

今日帶左圖圖去搭觀光巴士，早排媽媽見過觀光巴士既資料，睇完路線後發覺都幾適合帶小朋友玩一日。呢排天氣涼涼地，又未開始凍，係適合出遊既日子。

原來香港有兩間公司營運觀光巴士，一間係Hong Kong Big Bus

http://www.bigbustours.com/yue/hongkong/custompage.aspx?id=tickets%20and%20prices

另一駕就係城巴既人力車觀光巴士

http://www.nwstbus.com.hk/hotspots/sightseeing-bus/rickshaw/index.aspx?intLangID=2

Big Bus既價錢貴D，成人24小時車票二百幾，包得多野d，天星小輪、山頂纜車，多d路線九龍、香港、赤柱都有。分24小時車票、48小時車票，同埋夜間車票。

人力車觀光巴士就平D，成人全日票$50，長者及小童半價、淨係得港島線。

因為圖圖赤柱山頂都去過，所以就唔會搭BIG BUS，因為如果唔用佢搭免費纜車既SERVICE就真係好唔抵。而且計價錢人力車觀光巴士真係抵好多，D地方有D圖圖都未去過，所以就決定坐人力車觀光巴士，玩港島西一日遊。

朝早11點幾出發去到中環碼頭，買左車票之後就山車。原來巴士分2條路線，1 條H1線係多數去購物點(唔啱我地)，另一條H2線係睇歷史古蹟。

我地既第一個目的地係文武廟，媽媽成日以為婆婆以前住港島區，細個時仲住灣仔，應該會黎過，估唔到原來我地一家都係第一次黎。

其實廟我地都係麻麻地鍾意，因為好大煙，不過係叫黎睇下，間廟好細，行個圈唔駛2分鐘，不過個面有個鼓同鐘，俾圖圖打左2下就出返黎，出黎後圖圖竟然問媽媽間廟入面係咪三國演義，婆婆同媽媽都唔清楚，後來睇返出面既簡介先知係供奉文昌帝同關帝，咁既然有關帝，即係有三國演義~~~~~所以就答左圖圖話係！其實三國演義媽媽都未睇過，圖圖識係因為爸爸晚上有時會講三國演義作睡前故事。之後圖圖就響就面公園玩一陣，順便等巴士。

第二個目的地係孫中山博物館，其實呢個地方媽媽想黎好耐，因為以前睇過一個電視節目，介紹孫中山博物館既地點，其實就係何甘棠既大宅「甘堂第」，果個節間介紹點將呢間古老大宅修復，將佢變為孫中山博物館。

聽到孫中山博物館好似好悶咁，但原來都有啱小朋友既展覽，入面有介紹孫中山既卡通片、電腦遊戲，同埋有間房俾小朋友填顏色，而且隔個星期日做會有免費既手工班/畫班。當我地離開時已經係2點，所以就同圖圖去左下面既翠華食野，順便響石板街面左少少萬聖節既佈置用品。

本來我地仲諗住去醫學博物館，但係已經成4點鐘，所以唯有放棄呢個景點，去下一個目的地正街，去正街當然係為左食源記既桑寄生蓮子蛋茶，蓮子一貫係超鬆化，但係個桑寄生茶，好似比起以前淡左少少。

之後搭車返總站，見到H1線啱啱上緊客，即刻上車去TIMES SQUARE，響CITI SUPER，媽媽買到想要買既WILTON HALLWEEN COOKIES CUTTER，之後就返屋企，途中圖圖已經攰到瞓著左LU~~~~~

輕飄飄 - 橙酒梳乎厘

梳乎厘，一個幾易整，但又唔太肥既甜品，食左落肚去似無食過咁，正常媽媽應該一早整，但唔知點解從來無整過，呢排心癮起，成日想做唔同既甜品，今次終於輪到佢啦~~~~

橙酒梳乎厘

ＢＡＳＩＣ（１０杯份量）
低粉　　　　５　　　ｇ
蛋黃　　　　３　　　ｐｃ
奶Ａ　　　　３０　　ｍｌ
奶Ｂ　　　　１２５　ｍｌ

1. 低粉、蛋黃及奶Ａ拌勻
2. 倒入已煮滾之奶Ｂ
3. 繼續加熱，並持續以蛋發攪拌至杰身離火

梳乎厘（４杯份量）

君度橙酒　　２０　　ｍｌ
Ｂａｓｉｃ　４０　　ｇ
蛋白　　　　３　　　ｐｃ
糖　　　　　２０　　ｇ

1. 梳乎厘杯邊塗上年及及撒上糖
2. 橙酒及ｂａｓｉｃ拌勻－＞Ａ
3. 糖分３次加入蛋白打至硬性發泡，加入Ａ拌勻
4. １５０Ｃ焗１２分鐘

食譜改自美味ＤＩＹ

今次整左呢個，下次
想整焗西米布甸，不過要買／整芋蓉先，我鍾意芋蓉餡多過蓮蓉餡呀～～～～

得左！ - 薑汁撞奶

其實媽媽好鍾意食奶類既中式甜品，其中最鍾意係雙皮奶同薑汁撞奶。雙皮奶咩兩層皮好似有d麻煩，要等媽媽搵日好心情再慢慢研究，近日天氣開始轉涼，食辣辣地既薑汁撞奶最好不過。

一共試左三次先成功，頭一次失敗，用阿蘇既方式煲到d奶響煲邊有bubble出，有少少煙熄火，響2個煲之間倒10次後撞入薑汁入面，失敗左，原因不明~~~~~

第二次自己用溫度計check到85度，失敗，原因為溫度必須要70-80度之間

第三次即係今次，特登去買左阿蘇講既維記高鈣低脂奶，煲到75度熄火，今次得左，終於成功~~~~yeah！

薑汁撞奶(1碗)

維記高鈣低脂奶　　１　　ｂｏｗｌ
糖　　　　　　　　１　　ｔｓｐ
薑汁　　　　　　　１　　ｔｂｓｐ

1. 薑汁隔渣放於碗中
2. 奶及糖放入煲中用小火加熱至７５Ｃ離火
3. 倒入已放薑汁的碗中
4. 靜置１５分鐘

• 糖我今次用splendor(可煮食用代糖)，所以呢碗甜品應該唔會太肥呢！

心太軟

第一次接觸心太軟，好像是10多年前，它的名字只叫作流心朱古力蛋糕，後來不佑是誰替它改了這個名字，儘管這是一個很甜心的稱呼，也很適合，但媽媽卻更喜歡它的舊名字，至少聽到名字，便會知它是甚麼。

這甜品，其實很容易做，也適合用來宴客，因為可以早一點預備餡心及面糊，只需在宴客前組裝好再放入雪櫃下格，待吃飯至尾聲時放入焗爐便ok。

心太軟(6個份量)

心太軟

朱古力餡心
淡忌廉　　　　　４５　　ｇ
７０％朱古力　　３０　　ｇ
牛油　　　　　　７。５　ｇ

1. 淡忌廉用微波爐加熱，倒入朱古力內拌勻
2. 加入已於室溫放軟之牛油拌勻
3. 倒入半圓矽膠模內，放入冰格冰至結實

朱古力蛋糕

牛油　　　　　　１２０　ｇ
７０％朱古力　　１４０　ｇ
蛋　　　　　　　１４０　ｇ
糖　　　　　　　６０　　ｇ
低粉　　　　　　６０　　ｇ

1. 牛油及朱古力用微波爐加熱，用蛋發拌勻＞Ａ
2. 蛋及糖用打至變稠，用蛋發拌入已篩低粉，再拌入Ａ
3. 面糊雪入雪櫃最１小時

組裝

1. 金屬模內舖好牛油紙
2. 舀入６０ｇ面糊
3. 放入一棵朱古力餡心，輕力壓至與面糊同高
4. 舀入２０ｇ面糊，用匙掃平
5. １８０Ｃ焗１３分鐘

（食譜改自豈能戒甜）

如果希望比較簡單，可以使用錫紙模代替金屬模

如果沒有小圓矽膠模，可以用朱古力紙模代替，摺小紙盒將全部朱古力漿倒入，冰好後用刀切開６份。

BBQ Buffet @ Peninsula

早上個月book左今晚既buffet，雖然只係book左個幾月，但係呢個buffet媽媽足足等左成3年，事緣係3年前既一日，媽媽響openrice睇到半島原來每年9月中至12月中(逢星期五&六晚)，響泳池對出搞BBQ Buffet。

咁當時已經好快手book左，仲要係勁好彩，book果時未知邊日係亞運開幕禮，點知後來公佈出黎就係媽媽book果日，當時諗發達啦，因為果度有無敵海景，諗住唔駛同人迫去睇煙花，圖圖一定好鍾意。點知buffet星期前圖圖開始大病，又發燒又嘔，所以唯有取消，將張枱讓左比朋友。

呢個就係pool terrace既海景

到第二年，又係一早book定，點知果次就食飯果日圖圖下晝開始發燒+嘔，唔好彩~~~~~，唯有又取消。

今年半島改左制度，book枱時要俾定credit card資料，如果果日去唔到，都會100%過數，不過鬼叫媽媽想試下，唯有照book，希望順利過度。

好彩今年唔知係咪因為圖圖暑假開始學左游水，身體好左少少，傷風感冒都少左，buffet前2個星期真係又病左一次(又係嘔)，不過好在過幾日就好返。

所以今日晏晝爸爸提意同圖圖去左太空館睇天象電影「古海龍王」，順便買太空雪糕(因為圖圖有哮喘唔可以食普通雪糕)，俾圖圖止雪糕癮，之後終於可以去食等足3年既BBQ Buffet。

首先黎一籃面包，d法方勁好味，最好味係D牛油，好香~~~~~跟住再黎餐湯，係雜菌清湯，清湯要做得好唔容易，但係佢真係好味，而且一D都唔濁。

其實果度都唔算多野食，無魚生刺身生蠔鵝肝，頭盤只有沙律、少少海鮮、prama ham(好軟，好好味)，甜品只有雪糕、sobert、macaroon、少少蛋糕，仲有dd水果。主菜全部都係燒烤、有牛扒、和牛漢堡(好香、不過有d漏)、羊架(幾好)、豬頸肉、帶子(超好味)、虎蝦(唔錯)、2款香腸、尤魚圈(食完即刻唔記得左咩味)、雞翼、菠蘿，好似仲有其他野，不過已經唔記得左。另外仲有薯茸(勁滑勁好味)、炒飯、南瓜(一定要食)、粟米(無食過)、雜菌。

Service方面係一流既，比起下面露台餐廳好多多聲，環境都勁正，因為今日天氣涼爽又唔熱(不過我知凍既時候佢都會有暖爐)，而且佢地每日淨係做十幾枱(今日係13枱)，所以好有privacy。

食完野之後媽媽同爸爸叫左杯Latte，圖圖要左熱朱古力，婆婆要左Earl Grey Tea，但係杯Latte真係差左dd，好淡~~~~，明明樓下既好好飲........

不過埋單時有驚喜呢，佢地無收圖圖錢，明明今次媽媽好乖，訂位俾credit card資料時都係寫3 adults + 1 child，結果係3大1細用埋張半島咭埋單，唔駛$1800~~~~，比起正價抵好多！

不過媽媽、爸爸同婆婆都一致覺得價錢差不多既話Marriott既Sunday Brunch係好味d同抵d，有果汁、香檳、紅白餐酒、魚子醬(圖圖至愛)、鵝肝、海鮮、魚生、仲有媽媽最like既egg benedict。

下次有d想試The Market，睇openrice食評好似唔錯呢~~~~~

辣辣辣辣辣 - 口水雞

一直好鍾意麻辣，麻到條脷痺晒，辣到係咁飲水，次次食親傷X酸辣粉都例牌點口水雞。

早兩日心癮起又想食，無聊之下SEARCH食譜原來都幾易做，同埋材料都幾簡單，今日襯重陽假期，就試下整~~~~


口水雞

雞　　　　　１　　　ｐｃ
花生　　　　ａ　ｌｉｔｔｌｅ　ｂｉｔ
蔥花　　　　ａ　ｌｉｔｔｌｅ　ｂｉｔ

1. 花生放入焗爐以100-120 C焗1小時

浸雞料

花椒　　　　２　　　ｔｂｓｐ
紹酒　　　　２　　　ｔｂｓｐ
薑　　　　　３　　　ｓｌｉｄｅ
鹽　　　　　１　　　ｔｂｓｐ
蔥白　　　　２　　　ｐｃｓ

1. 凍水下浸雞料，留意水要能蓋過雞
2. 雞洗淨，水滾後放下雞，雞胸向下，收細火煮15分鐘
3. 撈起雞浸入冰水中至雞凍

醬料
油　　　　　２　　　ｔｂｓｐ
花椒　　　　１　　　ｔｂｓｐ
指天椒　　　３　　　ｐｃｓ
蒜頭　　　　４　　　ｐｃｓ
頭抽　　　　３　　　ｔｂｓｐ
麻醬　　　　１　　　ｔｂｓｐ
辣油　　　　３　　　ｔｂｓｐ
糖　　　　　１　　　ｔｂｓｐ
醋　　　　　２　　　ｔｂｓｐ
麻油　　　　２　　　ｔｓｐ
鹽　　　　　１　　　ｔｓｐ
水　　　　　１／４　ｃｕｐ

1. 指天椒切圈去籽，蒜頭刴碎
2. 花椒用白鑊以中火炒至有香氣
3. 加入油，指天椒及蒜茸略炒後，移至大碗
4. 將其餘材料加入碗內
5. 最後將醬料淋上雞上，晒上蔥花及花生

(食譜轉載自江獻珠女士)

• 今次我沒有用全雞，只係用左3隻急凍雞脾，味道都OK
• 全程我只係用左2棵蔥，蔥白煮雞，其餘切蔥花上碟
• 因為我用既辣油係超辣，所以只係用左1湯匙
• 我喜歡超麻，所以下次可以將花椒加倍，而且醋也可以加多一點

為幼稚園晚會作準備 - Green Tea Opera & Custard Puff

今日係圖圖學校既民放服裝晚會，其實個晚會做d咩媽媽一d都唔清楚，只係知道要準備食物用黎開大食會。

左思右想，諗黎諗去，都係諗住做番最拿手既蛋糕，咁蛋糕又做咩蛋糕好呢???至少唔應該係街邊xx西餅都買到果d，考慮一番決定做青木定治既Bamboo (Green Tea Opera)。

Opera其實不難做，只是步驟比較多，層數比較多，只是看起來複習，實際失敗率很低的蛋糕。

因為多步驟所以只寫下組合給家參考


Bamboo (Green Tea Opera)

防潮糖霜
綠茶粉
Butter Cream
綠茶杏仁薄蛋糕
Ganache
綠茶糖水
綠茶杏仁薄蛋糕
Butter Cream
綠茶糖水
綠茶杏仁薄蛋糕
Ganache
綠茶糖水
綠茶杏仁薄蛋糕

不過我現在才記起自己大頭蝦，沒有在最底層的杏仁薄蛋糕底部塗上一層朱古力防止糖水滲漏。

這蛋糕媽媽試過後覺得味道道不錯，但Ganache多了一點，我想下次只要用75%的Ganache便可以，而且綠茶粉的份量也可以略為加大。


Custard Puff (約32小粒)

Puff
水　　　　６５　　ｇ
奶　　　　６５　　ｇ
牛油　　　６０　　ｇ
糖　　　　３　　　ｇ
鹽　　　　２　　　ｇ
低粉　　　７０　　ｇ
蛋　　　　３　　　ｐｃ

1. 水、奶、牛油、糖及鹽煮滾熄火，立刻加入低粉攪拌成麵糰。
2. 加入半份蛋漿快手攪勻。
3. 逐少蛋漿加入攪勻。
4. 180C焗22分鐘。

 (食譜轉載自VANLILY)

清Paprika - 檸檬甜椒粉焗雞

之前買左一樽Paprika用黎焗薯皮，但係焗薯皮用得果少少，唔想掉左佢咁浪費~~~~~終於諗起呢個以前抄低，但一直無試過既食譜

檸檬甜椒粉焗雞

雞　　　　　　　　１　　　　ｐｃ
Ｐａｐｒｉｋａ　　２　　　　ｔｂｓｐ
橄欖油　　　　　　１　　　　ｔｂｓｐ
檸檬青　　　　　　１　　　　ｐｃ
檸檬汁　　　　　　１／３　　ｐｃ
黑椒　　　　　　　ａ　ｌｉｔｔｌｅ　ｂｉｔ
海鹽　　　　　　　ａ　ｌｉｔｔｌｅ　ｂｉｔ　
甘筍　　　　　　　４　　　　ｐｃ
蕃茄　　　　　　　６　　　　ｐｃ
西芹　　　　　　　１／４　　ｐｃ
洋蔥　　　　　　　２　　　　ｐｃ

1. 雞洗淨，抺乾
2. Paprika、橄欖油、檸檬青、檸檬汁、黑椒、海鹽撈勻，塗上雞身略醃
3. 甘筍、西芹切件
4. 蕃茄及洋蔥開４－６件
5. 焗盆放上錫紙，所有蔬菜放最底，然後放上雞
6. 170C焗90分鐘

• 原來食譜好像是沒有蔬菜的，不過焗雞我喜歡放上一點蔬菜，待蔬菜吸收了雞汁便很美味
• 焗雞時要睇火，如果己上色，有少許燶便要蓋上錫紙，中間可以將盆底的汁液淋上雞上
• 焗雞後期我喜歡用叉刺穿雞皮，讓雞油流出來
• 今次我用底溫一點焗，婆婆說這次焗得很嫩，而且比起蜜糖芥末籽，她便喜歡這個味道。爸爸都認為不錯呢！