媽媽同爸爸今日要去澳門同珠海兩日呀！

今日一早媽媽同爸爸出發去澳門啦~~~~~因為之前媽媽買左2套澳門既來回船票，而爸爸又話佢上次去澳門做野都無時間食野，所以今次趁過年就同爸爸去澳門一次順便過珠海按摩同住一晚。

第一日一去左澳門我地就直去珠海，首先去左書城同酒店checkin先，今次媽媽係經網上訂酒店，經過上年去澳門住左一間好差既話酒店其實好似賓館既野，今次媽媽穩陣d訂番5星，雖然珠海人地話酒店差過澳門，5星唔夠5星，只係得3星咁上下，但係媽媽都覺得ok，至少房間乾淨，光猛，張床夠大又ok舒服，而且全間酒店有暖氣！(今年得果幾度，呢樣野超緊要)

Check-in左之後我地去番關閘附近按摩，媽媽由有左展圖豬4-5個月左右已經無按摩，最初係因為有bb，之後就係要湊佢，然後係舖頭忙忙忙，今日終於可以按番夠本，同爸爸按一個鐘腳+2個鐘身之後，本來媽媽話去食譚魚頭，不過爸爸話想食海鮮多d，所以我地去左之前有地講既灣仔海鮮街，果度好得意，條街中間全部係賣海鮮既檔口，兩邊就係代工煮海鮮既舖頭。我地揀左聖子、帶子、鮑魚仔、花甲、賴尿蝦，一共買左二百幾蚊，再去間舖頭煮，加多個菜代工加埋其他酒水都係$140，呢餐食左3百幾，但係幾好食，口味好啱香港人，好味過之前人地帶去深圳湖貝路食果d海鮮，唔會話細細隻，無野食。食完之後我地又去關閘又書城行，因為媽媽之前走果時，先發覺書城入面有一part未行，媽媽想要買d書俾展圖，所以又返去。結果媽媽買左一d大圖咭同幾張大海報，又後就返酒店休息啦！