6日6夜@布吉 Day 3 – Egg Island & Patong + 圖圖生日

因為尋日見酒店既早餐唔太精神，所以反正要出Patong去Banzaar Fresh Market買海鮮，所以就出去食lu！

本來我地諗住去食雞飯，點知爸爸渣架車渣得太快，媽媽未睇清楚路已經過左，咁就索性去Hemingway或者Bazzaar入面既food court食啦！去到見到Hemingway都幾靚仔，所以就決定今日響度開餐，叫左一個pat thai同埋一個泰式燒牛肉沙律，嘩個沙律好辣，但係超好味~~~~~！

Pad Thai 90 Baht

燒牛肉沙律 120 Baht

之後我地就入去fresh market買海鮮，買左一條東星斑、2隻blue crab、500g蜆、3隻超大tiger prawn 420Baht，真係勁抵呀！

之後因為大頭蝦唔記得帶Adapter，所以仲要去家樂福買，又唔知點解爸爸applied左個1 day internet package但係部電話上唔到網，所以又要去Dtac搞，終於11點半搞掂晒所有野，飛車番酒店，即刻換泳衣，拎埋野就落Lobby，時間啱啱好司機到啦！

唉點知因為太心急無攞相機，唯有諗住用爸爸部電話影相頂住數先！坐左大約一個鐘車，圖圖由唔眼瞓變到差不多瞓著時終於到碼頭，又係貼label既時間，等左一陣間，已經夠人可以上船lu！上左船，最初緊係行得慢之後行得勁快，好在都係好短時間，雖然都幾拋，但係圖圖唔驚，仲要瞓著左~~~~~

落船後租左沙灘椅，就帶圖圖去餵魚，不過真係好大浪，有時一個大浪打黎，會企唔穩跌低，我就係其中一個，仲要撞左落舊石度，超級痛！仲要沖走左圖圖副太陽眼鏡~~~~

雖然d水有d濁，但真係好多魚，圖圖勁開心，餵餵下魚，仲話要捉魚魚！呢個時間慘劇發生左，爸爸個防水袋唔知做咩鬼入左水，佢部電話報銷，陰公，仲要係啱啱出左唔夠2個星期既Samsung Galaxy S，不過今次奇怪爸爸好似唔多肉赤，係可惜蛋島上面無晒D相同埋video。

玩左一陣間，一舊超大烏雲吹過黎，就咁就落大雨，仲變到好凍，所有人啦啦臨走入d檔口避雨，之後見細雨小小，媽媽就走左去買杯麵、young coconut jelly同埋香蕉pan cake食下驅下寒。

後來圖圖瞓著左，爸爸就走去餵魚用埋剩番果麵包，之後個guide都有走入黎拎水果俾我地食。到3點半左右就上船番去，點知上船時太大浪沖走左我一隻鞋，呢個時候我諗慘啦~~~~唔通我要著一隻鞋番酒店？好在後面有位仁兄幫我執番，真係超感激！

返到酒店即刻沖返個超暖既bubble bath，然後換衫返去Hemingway果度食我地既晚飯！呢餐加工費一共890 Baht，加埋炒菜炒飯及飲品等，全單共收1405 Baht。

食完飯就返酒店call 番reception幫我地拎之前order左果個蛋糕上黎，個樣雖然好似茶餐廳果d咁，而且甜左少少，不過生日點都要切下蛋糕既~~~~，食完蛋糕之後俾圖圖飲番啖水，驚心動魄既事發生~~~~~

圖圖飲水時咬爆左個玻璃杯，嚇到我同爸爸大叫，圖圖唔好郁，佢個口仲咬住一大塊玻璃，之後我地拎出黎，叫圖圖不停嗽口，又摸勻佢個口入面有無玻璃插住，但係d碎片爭左一小塊，又搵極都搵唔到，見圖圖好似無咩事，但問佢痛唔痛佢又指住個口話痛(因為都損左dd)，嚇到我地成晚同佢check心跳，驚佢內出血。