原本今個假期係諗住帶展圖豬去新加坡既動物園睇動物，不過因為下年新加坡會開環球片場同全世界(定係全亞洲？)最大既水族館，所以媽媽打算下年先去。
已旅遊地點就改左去長隆睇動物，今次係我地第一次去番禺，亦都係展圖豬第一次離開香港~~~~~~
由於媽媽話長隆酒店太貴，而且展圖豬太細水上樂園同埋歡樂世界又唔岩，用唔到唔駛排隊同無限次出入offer，所以我地今次訂左祈福酒店，亦都順理成章坐直通巴士上祈福~~~~~~
巴士好早，朝早7點45分就開車 (不過媽媽話咁早仲好，因為展圖豬可以上車瞓覺，唔駛覺得捱3個鐘車咁辛苦)，所以6點幾已經要出門口~~~~~~
去到巴士站同姑媽&Ingrid姐姐會合就上車啦~~~~~因為太高興所以展圖豬坐3個鐘車淨係瞓左唔夠一個鐘，其餘時間都係不停咁睇街，不停叫「巴士」、「的士」、「貨車」…….
11點左右已經到左祈福，一落車隔離就係酒店好方便，原本我地要3點先可以check in，不過因為已經有房，所以酒店都俾左房我地，放低行李後，俾展圖豬飲左杯奶，透一陣，就去食飯~~~~~~
今次午餐我地去左祈福食街入面一間叫「客家人」既舖頭食，點左咸雞(好硬)，梅菜扣肉(好肥，不過梅菜好味)，水煮魚(超好味，而且魚唔辣，淨係配菜先辣)，煎南瓜餅(好粉，麻麻地)，鐵板蝦醬炒通菜(好味)，餐廳仲送左豆腐花(好滑唔甜，正!)~~~~~~盛惠RMB200-，不過展圖豬唔知係咪因為飲左奶既關係，咩都唔肯食~~~~呢個亦都係我地行程惡夢既開始！
食完飯返酒店休息左一個鐘，之後我地已經約左司機1點50分出發去睇長隆大馬戲(因為呢幾日係國慶假期，所以加到1日有3個場次，可能係加場既關係，入面都唔算太多人，我地好容易就搵到一個正中位置，坐低一陣馬戲就開始啦！
可能係因為音樂太強太多重音既關係，展圖豬開頭又係好似睇迪士尼煙花咁緊張，攬住我地黎睇，當睇到有動物表演時，展圖豬超開心，就唔記得左驚，不過可能唔驚個人放鬆晒，所以睇左一半就瞓著左Zzzzz，大家都叫可惜呢！ (唔緊要啦，長隆又唔係遠，最多第二時再黎過~~~~！) 媽媽就覺得長隆既馬戲除外有動物呢個優勢外，都係索拉奇既馬戲比較好睇，無輪場地、服飾、化裝、氣份營造、音樂、過場~~~~，不過價錢當然亦差一大截，所以有差別亦係正常，下次媽媽要帶展圖豬去澳門睇ZAIA！
睇完馬戲走啦！展圖豬亦都醒左，之後我地影幾張相，返酒店瞓一陣然後再出去食晚飯。
今晚晚飯係響「漁民新村」，呢個地方係媽媽上網search番黎，d人話好大 (有幾個足球場咁大，不過媽媽覺得言過其實！)。其實呢間係一間好大既酒樓，有幾層，樓下果層有一半位置擺放海鮮同其他食物，客人需要拎住酒樓俾既單出去揀食物(包括海鮮/菜/湯/刺身(不過太陸刺身我地唔敢食)/燒味…….)所有海鮮都放響缸入面，個缸會有個牌，寫名價錢(價錢以每500g計)，而價錢牌上面會寫可以揀咩煮法(清蒸、白灼、燒、薑蔥炒、芝士焗……)，講真媽媽覺得果度幾似鯉魚門，不過d海鮮檔係響酒樓入面，同埋多好多種類，淨係蟹已經N咁多種！不過有D都幾貴，我記得有阿拉斯加皇帝蟹，賣R5XX/500g，我諗一隻最少2kg，即係淨係隻蟹都要2千幾，不過有d都合理既！
今餐我地點左白灼蝦(唔記得係咩蝦)、薑蔥炒蟹(唔記得係咩蟹)、西蘭花龍躉炒球、海膽蒸蛋、燒蠔、蒜容炒象拔蚌、炒荀、干炒牛河~~~~~~係都RMB5XX，好抵!
但係唔知點解，展圖豬又係咩都唔肯食，TUM極、餵極、鬧極一啖都唔肯試，一俾佢試，佢就喊，擺到埋口淨係擰頭，後來我地大人實在頂佢唔順，媽媽唯有俾個零食盒佢(入面有棉花糖、星星餅、馬利餅、甜包仔)，展圖就肯食，仲要係食得好急，咁即係肚餓啦！但係點解唔肯食其他野，包括平時都鍾意食既白飯同菜？
我地返返祈福，就去supermarket行下，順便買個蛋糕同埋俾展圖豬揀d餅仔，行完後去食糖水，媽媽試下餵佢食飲奶，但係又係一啖都唔肯食，試下餵佢蛋糕，比佢用手指仔篤下試下味，點知佢就淨係篤，「lam」都唔肯「lam」。
返到酒店又「tum」又鬧展圖豬先飲完杯奶，媽媽諗咁至少佢都有杯奶到肚，但係一個人仔點可以一日食咁少野！
沒有留言:
張貼留言