海鮮魚麵配梭羅魚蕃茄湯（附食譜）

今日呢碗麵睇落去好普通，但就玩足我成日。個湯底係跟呢度

d姊妹學野整既。老公成日話細個飲白色魚湯好好味，但係我屋企就從來都無煲過，亦都唔知用咩魚煲，早幾日見呢度d姊妹不約而同整呢個湯，就諗住試下。

海鮮魚麵配梭羅魚蕃茄湯（４人份量）

梭羅魚蕃茄湯

梭羅魚　　２斤
蕃茄　　　８個
薯仔　　　３個

1.梭羅魚洗淨，斜切一刀去頭去肚。
2.魚洗淨，用廚房紙印乾水。
3.煎香魚，灒入滾水，加入蕃茄煲45分鐘，期間用湯殼督爛魚及蕃茄。
4.加入薯仔煲15分鐘，熄火。
5.夾起薯仔，湯過篩。

蝦　　　　半斤
蜆　　　　１斤

1.蝦洗淨，去殼去腸後烚熟。
2.蜆洗淨，放入鹽水吐沙，再洗後烚熟。

魚麵
鯪魚　　　６條
鹽　　　　１茶匙
麻油　　　２茶匙
生粉　　　８茶匙
酒　　　　４茶匙
蛋白　　　４湯匙
胡椒粉　　適量

1.買鯪魚時叫魚販起肉
2.回家後洗淨鯪魚，一手按著鯪魚，一手順著魚骨方向用西式湯匙輕刮鯪魚起肉
3.起肉後湯匙連肉放入一大碗水中
4.所有鯪魚起肉後，將鯪魚放入魚袋中，擠出水
5.加入調味料撻至起膠
6.放入忌廉唧袋內，唧入大滾水中，煮至浮面

*鯪魚起肉時匙不可刮太深，會刮起魚骨，好似我今次就後，所以之後用調理機將碎骨打爛。
*如果有廚師機可以用佢將魚撻至起膠，真係快靚正。

講番個湯真係好正，不過真係花功夫，逐條魚切去頭鰓，之後仲要逐條洗淨肯定入面無腸留響度，但真係好飲，而且幾平。呢個魚麵我都係第一次整，唔知係咪街既係溝左粉，所以唔夠街既煙靭，下次可能加少少澄麵會好d，不過真係整左好鬼耐，淨係起肉都玩下2個鐘，所以無咁快會再試，但係我覺得呢樣野好啱d唔食魚既小朋友食，因為真係食唔出係魚，而且做多左既話可以雪入冰格，到要食時先拎落黎解凍。

唔記得講前面朵花，係用小棠菜剪既既，好容易做又靚，剩底既菜葉都唔會浪費，只係放響魚麵下。