展圖豬既第二隻牙仔都現身啦！

前兩日先發現展圖豬出第一隻牙仔，今日媽媽同展圖豬沖涼刷牙時，發現點解第二隻門牙既位置都開始有d白白地色，伸隻手指去摸下又係界界地既，估唔到展圖豬一係唔出牙，一出牙就出兩隻。

不過展圖豬都好乖呀~~~好多bb出牙時會流口水、肚疴、扭計，好在展圖豬都無，係呢排唔肯飲奶，唔計加入米糊果d奶粉，朝早、下晝3點3同臨訓果餐，加埋都好似飲唔夠八安~~~~

仲要佢唔係好肯飲水，有時真係好擔心佢d便便~~~~~

今日展圖豬去左中大做研究~~~~~

早兩日媽媽上網見到中文有人話想搵9個月+-2個星期大既BB做心理研究~~~~~

詳文如下：
如果你的幼兒年齡在9 month±2 weeks，我們邀請你來到中文大學心理學系參與我們的研究。該項研究是香港中文大學心理學系副教授——張謙教授之研究計畫的一部分。詳情請參考以下網址http://www.psy.cuhk.edu.hk/en/people/hcheung/index.html
是次測試由我們心理學系的研究生和研究助理負責。在整個測試過程中，你將會抱著你的幼兒，讓他觀看實驗者操控不同的物件，從而作出反應。例如，如果幼兒對實驗者的操控感到驚訝，違反了他對實驗者意圖的假設，將會表現出對事件較長的注視時間。因此，我們將會對幼兒的注視時間進行記錄及觀察。希望藉由該次的測試資料去瞭解“幼兒心理理解能力的發展”。我們感興趣的不是個別幼兒的表現，而是多個幼兒的整體表現模式。如果結果合乎預期的話，我們將會寫成研究報告，發表在專業的學術雜誌。所以，你們的參與對我們的研究發表非常重要。
我們的測試只需要你和幼兒的一次拜訪，地點是中文大學的兒童發展研究中心。整個過程會在30分鐘內完成。有興趣的家長歡迎來信查詢

媽媽心諗反正展圖豬未做過有關既野，要付出既都係少少時間同車錢，仲可能有機會比較收展圖豬同一般小朋友有無D咩唔到，所以就報左名~~~~~之後就有中大既人聯絡我，同約左時間，今日係去做個測試既日子，因為婆婆都想睇，食完晏晝飯就同婆婆同展圖豬出去。

去到之後有幾個姐姐，係負責做研究既，佢地叫我抱展圖去一間房度，做測試既時間，我要全程抱住展圖豬坐響我大脾度，傍住佢唔好比佢周圍望，而我就要閉上眼，目的係唔俾我從觀察中影響展圖豬，測試時間都好短，我一路淨係聽到一D底音，同一D高音，其他咩都唔知，不過最後期(大約30秒)當我聽到低音時展圖有D唔高興想喊咁~~~~~~好在之後無野~~~~~

後來我問婆婆(因為婆婆響隔壁既單面玻璃觀察室)，佢話全程展圖成個人仔定晒，郁都唔郁，仲以為佢訓著左，其實係一路有兩隻公仔出現響佢面前~~~~~~其實我都唔明白婆婆講咩~~~~~

之後我問番果幾位姐姐，佢地話5月底個研究完成後，會有一份有關既報告，一份展圖豬既個人報告，同個VIDEO SEND番俾我地~~~~~媽媽超開心!收到後再同大家分享~~~~~

去中大時展圖豬上到小巴一陣已經訓著左~~~~~~~~

另外爸爸終於買左個新玩具俾媽媽(媽媽唔肯自己買，因為我係無業游民)，就係一部VIDEO，本來媽媽心目中係想買一部可以拍VIDEO既傻瓜機，因為爸爸D機實在太麻煩，而且唔適合成日拎出街，不過爸爸話拍展圖既話VIDEO好D，因為相有時表達唔到D野，所以買左部HD既入帶機，仲可以拍同600萬像左右既相，好開心，終於可以影展圖豬影夠本啦~~~~~~~

展圖豬終於出牙啦~~~~~

呢排因為無咩特別野，所以好耐好耐無寫BLOG，展圖豬既發展都無咩特別，仲未學識爬，不過已經可以原地360度轉~~~~~

仲有幾日展圖豬就黎9個月大，好多9個月大既BB都一早出左牙，出得快既仲已經有4-5隻，所以媽媽一路都有少少擔心，因為媽媽既表哥曾經因為太遲出牙，要俾醫生響牙肉度界一刀，等隻呀易D出，媽媽見展圖豬一路都未有出牙反應(流口水、發忟憎、發燒、肚疴)，所以都有少少擔心，平常媽媽日日同佢沖涼洗口果時，都撐大佢個口，想睇下佢出牙未~~~~~

今日見到佢下面既牙肉好似腫腫地，所以用D好奇，洗左手就仲雙手指入展圖個口摸下~~~~~~~界界地，應該係出牙啦！即時話俾爸爸同婆婆知，佢地爭住洗手去摸~~~~~~

不過因為隻牙啱啱出，所以咩都睇唔到，出左再影單牙相俾大家睇

以下補番展圖豬呢排影既相添~~~~~

爸爸放本書仔上去展圖豬個頭度同佢玩

去完樓下食飯，返屋企中~~~~~             

食二叔既生日飯，展圖豬第一次坐BB櫈！

媽媽果 日同展圖豬除衫，突然發現可以同佢扮印度BB!

展圖豬後海灣既秘密終於俾爸爸揭開左，原來除左係因為展圖豬眼訓鍾意捽頭多，最大原因係佢浸住訓既毛巾太鞋~~~~~

展圖仲係響地下學緊爬(未識爬)，我估最大原因係佢條腰未夠力~~~~~

輕盈麥皮麵包 Light Oat Bread

輕盈麥皮麵包 Light Oat Bread

水　　　　　２９５　ｍｌ
牛油　　　　２５　　ｇ
鹽　　　　　１／２　ｔｓｐ
高粉　　　　３７５　ｇ
麥皮　　　　４０　　ｇ
黃糖　　　　２　　　ｔｂｓｐ
速發酵母　　１／　　ｔｓｐ

1. 將所有材料依次序放入麵包機中
2. 用白麵包程序，750g，中度烘焙
3. 待所有程序完成後，取出麵包放置一小時，切片即成

原本呢個食譜入面既牛油係植物油，因為反式脂肪既問題，我將佢轉左做牛油。而鹽亦由原來食譜既1 tsp減至1/2 tsp。

雖然睇到d麥皮，但係食唔出~~~~~

落有d似麥包

因為呢排整既包包都係有味既，婆婆查唔到野，所以今次整隻無味既(食落都好似麥包)，而且白麵包加左d麥都好似健康d(雖然得果少少~~~~)

講番個包先，呢個包唔知係咪因為無加奶同蛋，仲要加左少少麥皮，所以唔會太軟熟，不過一出爐時個外皮都幾脆，後來我地發覺用佢呢做多士一流，好香脆，但係就咁食就差少少啦~~~~~~！下次再做既話我會將佢切厚d，做厚切多士應該會唔錯。

肉桂卷 Clone of a Cinnamon

肉桂卷 Clone of a Cinnamon

麵糰
奶　　　　１２０　　　ｍｌ
蛋　　　　１　　　　　ｐｃ
牛油　　　３５　　　　ｇ
高粉　　　３１０　　　ｇ
鹽　　　　１／２　　　ｔｓｐ
糖　　　　５０　　　　ｇ
速發酵母　１－１／４　ｔｓｐ

餡料
紅糖／黃糖１１０　　　ｇ
肉桂粉　　１－１／２　ｔｂｓｐ
軟牛油　　４０　　　　ｇ

糖霜面
忌廉芝士　４０　　　　ｇ
軟牛油　　３０　　　　ｇ
糖霜　　　９５　　　　ｇ
雲呢拿油　２　　　　　ｔｓｐ
鹽　　　　１／８　　　ｔｓｐ

1. 將麵糰材料依次序放入麵包機中
2. 用麵糰程序
3. 在麵包機制作麵糰時，我們將所有肉桂餡料及糖霜面料分別攪拌至均勻
4. 麵糰制成後將它擀平至8吋 x 12吋大小
5. 將肉桂餡料放入微波爐以高熱叮10秒，取出均勻塗上麵糰
6. 麵糰卷起成8吋長之肉桂麵糰，並切成12塊
7. 將焗爐放入水盤，預熱至200C後熄火，放入肉桂卷
8. 等待50分鐘，肉桂卷發酵至兩倍大
9. 取出肉桂麵糰將焗爐預熱至175C，預熱後放入肉桂卷，焗20分鐘
10. 將糖霜面料放入微波爐以高熱叮10秒，以匙更淋上已焗好之肉桂卷上

• 我自己、婆婆及爸爸覺得這肉桂卷很香，但稍甜，下次再做應該會減少一半黃糖及牛油的餡料份量。
• 如果覺得麻煩的話飾面糖霜這個程序去掉也可以。

迷迭香麵包

今日因為婆婆已經食完上次既湯種奶油麵包，所以媽媽今日整左rosemary bread，呢個食譜係響allreceipes.com果度搵番黎，黎緊我應該會試多幾隻果度搵到既包包食譜。

迷迭香麵包

水　　　　　２３５　　　ｍｌ
橄欖油　　　４５　　　　ｍｌ
糖　　　　　６　　　　　ｇ
鹽　　　　　６　　　　　ｇ
意大利香草　１／４　　　ｔｓｐ
五色胡椒　　１／４　　　ｔｓｐ
迷迭香　　　１　　　　　ｔｓｐ
高粉　　　　３４０　　　ｇ
速發酵母　　１－１／４　ｔｓｐ

1. 將所有材料依次序放入麵包機中
2. 用白麵包程序，750g，中度烘焙
3. 待所有程序完成後，取出麵包放置一小時，切片即成

原本呢個食譜入面既五色胡椒原本係黑胡椒，但係因為我屋企得五色胡椒，所以轉左用五色胡椒。另外因為我怕麵包焗出黎d rosemary會太大塊，所以我預先將佢整碎左少少。

個樣都ok嫁，不過無湯種包包發得咁高！

見到入面都有好多香草，呢個包包配醋油應該好好味！

個包因為有胡椒，所以有好少好少辣味，如果比小朋友食可以考慮用少d胡椒/唔用。另外因為我本食都係鍾意清淡d，所以下次鹽量應該要試下減半！

婆婆話呢個包包好味d，有風味d，因為平時街賣果d香草包包多數一係好貴，一係無香草味，所以呢個抵整呀！

展圖豬依家已經可以好快咁中俯臥轉做仰臥啦！仲識巢一d周圍擺既野~~~~同媽媽散檔。

湯種奶油麵包

湯種奶油麵包

湯種
高粉　　　　９０　　　　ｇ
水　　　　　６５　　　　ｇ
含鹽奶油　　３５　　　　ｇ
糖　　　　　５　　　　　ｇ

1. 將高筋麵粉放在大碗內
2. 取另一小鍋置入水、糖及奶油，小火加熱煮到小滾之後立即沖入麵粉中
3. 邊沖邊用筷子攪拌，再捏塑成麵糰
4. 待涼後蓋上保鮮模放入冰箱冷藏24小時
5. 使用前需放室溫至回軟

主麵糰
全脂牛奶　　１６０　　　ｇ
糖　　　　　３５　　　　ｇ
鹽　　　　　１　　　　　ｔｓｐ
蛋黃　　　　１　　　　　ｐｃ
無鹽奶油　　１０　　　　ｇ
高粉　　　　２６０　　　ｇ
速發酵母　　１－１／８　ｔｓｐ
湯種麵糰　　１　　　　　份

1. 將以上材料依序放入麵包機
2. 用Program 1設定、750g、中間金黃既程式去烘個麵包，等麵糰開始攪拌之後將湯種麵糰撕成小塊狀加入

今次個包既size似番出街果d，而且鬆軟d，爸爸話上次果個黏口d，我就覺得呢個包牛油味無上次果個咁濃，無咁漏，啱我口味d，不過我會繼續造新包包，等造出一個啱自己口味既。

呢個就係我用緊既麵包機

手工烏冬

早一排婆婆話俾我知原來屋企有一盒麵粉未開，仲要就到期，咁啱我上網睇到呢個食譜，就試下整！

手工烏冬

麵粉　４００　ｇ
水　　１８０　ｍｌ
鹽　　１８　　ｇ

1. 將鹽加落水中攪至溶
2. 逐小加入麵粉，搓成糰(我覺得水唔夠加多左10ml左右)吸飽水既麵糰係光滑既!
3. 用保鮮紙包起麵糰放置1.5-3小時，待麵糰吸飽水粉
4. 將麵糰擀薄，摺3摺，重覆4次
5. 放置麵糰10分鐘，待麵糰鬆弛
6. 在工作台上洒上麵粉，將麵糰置放上面擀至3-4mm厚，摺3摺，切條
7. 將麵條拉開，並放入煑滾之水中
8. 煑4-6分鐘，待烏冬發大浮起後過冷河
9. 可放湯/放涼凍食

自己做既烏冬可能麵粉無漂白，所以黃黃地，而且因為加左鹽，有d鹹鹹地，下次如果有麵粉多再做既話我會試下唔加鹽睇下o唔ok！

另外上個禮拜我教過展圖豬兩日由趴低反返轉仰臥，之後都唔記得教佢，結果今日放佢落地，爸爸發現佢自己可以反到啦，一路look look look向同一個方look，好搞笑！

仲有就係今晚係有史以來最成功餵糊仔，展圖豬15分鐘搞掂左由兩湯匙米粉開既糊仔，期間竟然係無喊過~~~~~~~！重要間唔中係自己張大個口，唔駛「橋」開佢~~~~謝天謝地！希望佢餐餐都係咁就好羅！

無牛奶既牛奶麵包

13號晚即係啱啱整好左一磅牛奶包包，其實媽媽早響坐緊月果陣已經買左個麵包機，不過一路都未同佢剪綵，因為日頭去左灣仔二德惠果樹買齊野(其實買左好多野)，三百幾蚊都唔知點解會拎到手都斷咁滯！~~~~~~講遠左添！因為終於有高筋粉，所以開始第一次整包包。整包之前一兩日媽媽已經上網做晒資料搜集，睇左好多食譜，終於決定做最易既牛奶麵包。

頭一次整緊係超興奮，將所有材料倒晒入麵包機，因為太心急掉入去d次序亂晒，不過我諗都係會攪勻佢無所謂啦，因為頭一次整好緊張，所以成日check住部機，點知過左成個鐘一d動靜都無，咁唯有即刻睇說明書，睇睇睇睇睇~~~~~點知俾我發現到，原來我未將枝攪棒放入部機，所以根本攪唔到面糰。咁唯有再黎過，今次好乖睇清楚先落料，次序份量跟足晒，所以終於成功啦!

不過焗起都要等一個鐘先可以食，所以等到依家先啱啱切起，食左最細果塊，好香牛油味，有dd鹹鹹地，不過好鬆軟，暖暖地~~~~好味!不過下次我會試下減少d牛油同鹽，因為都有d漏漏地，同埋想食得健康d，自己整麵包既價錢同出街買差不多，不過可以食少d化學野~~~~~~:p

無牛奶既牛奶麵包

牛油　　　４０　　ｇ
鹽　　　　１　　　ｔｓｐ
糖　　　　２　　　ｔｂｓｐ
水　　　　２００　ｍｌ
面粉　　　３１０　ｇ
速發酵母　１　　　ｔｓｐ

1. 將己上所有材料依次放入麵包機內
2. 待所有程序完成後，取出麵包放置一小時，切片即成

原本呢個食譜入面既水係牛奶，不過我見人地話用水無咁漏，所以轉左用水。

今次我整左500g麵包、用最唔金黃既setting去烘個包，結果係個包面係白色，下次可以較中度試一試，今次個包包整左出黎好香牛油味，我覺得有少少漏，都鬆軟，不過有d黏口。

第一次切麵包都算切得唔錯啦~~~~~人地話好難切嫁！

同場加映坐到側晒既展圖豬，呢期佢唔知搞咩，將佢擺正佢又坐側，擺正又坐側，有時側到條頸好似斷左咁，搞到我有d擔心佢條腰骨會唔會因為咁生歪左！

尋晚媽媽作病+今日展圖豬自行停課

尋日晏晝舊同事Chris Dai來訪，探展圖豬~~~~~~尋日因為係婆婆既打牌日，媽媽見爸爸既病都好得七七八八，所以本來打算整海南雞飯，點知唔知搞咩鬼，Chris黎到之後無耐開始頭痛，走左之後仲要作嘔，唯有同爸爸講話唔煮得飯，唔知係咪作病既關係由傍晚六點左右訓到成十一點幾，期間仲要訓極都唔暖咁，不過訓左一覺，食番dd野，飲番杯寶礦力，頭痛好似好少少，無再作嘔，之後到點幾再訓過，今朝好番晒。

由於最近流感太利害(有小朋友因為流感病逝)，加上展圖豬返playgroup既時間係上晝d人返工既rush hr，所以爸爸同婆婆叫媽媽暫時唔好帶佢返學住，為左展圖豬既健康，媽媽亦都不得不同意啦！

今晚媽媽整返尋日既海南雞飯，都ok喎，雞ok，黑色果個醬好味，飯ok係油少少，下次我會試下早排響超市買果包海南雞飯醬煮飯試下，係個酸辣汁差d lor，唔知點先可以整到好似街果d咁又辣又好味呢？

海南雞飯(3-4人份)

黑醬油
老抽　　適量
沙糖　　適量

1. 將老抽及沙糖放入鑊中略煮

油飯
雞油
蒜頭　　數瓣
米　　　２。５　杯
雞湯　　適量

1. 將雞油放落鑊炸出油
2. 加入蒜頭爆香、挑出雞油棄掉
3. 將己洗好之米加入鑊中略炒
4. 將米及蒜頭放入飯煲中、加入適量煮雞之雞湯煮飯

海南雞
雞　　　1　　　　隻

1. 將雞放入已煮滾之水中，水需要蓋過整隻雞，轉小火(蝦眼水)
2. 將雞抽離水面，再放入水中3-4次
3. 等待12分鐘，重覆步驟 2
4. 驗試雞是否熟透，可以將筷子插入雞脾中，如果透出來的水是清的不是血水則表示已熟 (不過我發覺這個做法測試出來的雞中間仍會有些紅，所以最好熄火將雞再於熱水中多浸15分鐘)
5. 取出雞啤水或放大盆中用冰蓋起10分鐘

辣醬方面我覺得唔好味，整得好味再後補食譜啦！

呢次係我咁大個女第二次將成隻雞分屍咋~~~~~肉酸唔好笑我........