忙忙忙~~~~

病左成個禮拜，所有野都未做，要今個星期趕住做晒佢呢~~~~~

今日下晝襯圖圖出去學跳彈床&上科學班時去左上一個西餐COURSE，其實主要係想學做好個脆焦糖面，其他野雖然識，但當溫故知新，而且學多左兩樣野，就係易潔鑊要耐用D要凍鑊落油。第二樣係解凍牛扒係要用35度左右既水/水喉水沖至完全解凍塊扒先至可以保留最多肉汁&好味！

今日學左火焰紅酒汁牛扒，有得玩點火超好玩，下次我要屋企整牛扒時玩下，南瓜忌廉湯，焦糖雜果乳酪同埋軟心朱古力。今次個焦糖好成功，之前一直唔係好OK，我諗最主要係枝火槍問題，其實我估緊係咪我枝火槍有問題，因為入左GAS都好快無氣，D火又唔夠勁，所以上兩個星期見陳枝記有COUP果枝紅色火槍，而且都唔貴，又買番黎，呢枝好勁呀，我諗下次煮焦糖一定OK！至於個軟心朱古力，做出黎有D似ROYCE果隻，又係好易做，溶左撈埋一齊雪凍就食得，或者新年等我做少少先~~~~

估唔到間教室唔駛用STEAK PAN都煎得幾好

之後就出左去九龍城，見到有么鳳(雖然我都知呢間同cwb果間唔同)，但都買左D蝦子花生同芋蝦，原本今年諗住自己試做芋蝦，但病左，所以唯有下年先啦！跟手去埋TONY WONG度訂爸爸個生日蛋糕，同埋買左幾件番屋企！

D玫瑰花蛋糕真係超級FANCY

好多人訂蛋糕呀，間舖超多人，真係收錢都收到手軟

婆婆話都OK，但呢個CHOCOLATE TRUFFLE無特別，出面都好易食到

我覺得最好味既GREEN TEA OPERA

2TEA1，其實係伯爵茶＋紅茶（我估）蛋糕，我覺得最普通係佢

車厘子拿破崙，塊餅好鬆化，幾好！

之後就返屋企食團年飯啦~~~~今年團年飯因為之前病左，所以無預備，好在婆婆響蓮香樓訂左八寶鴨同埋釀鯪魚外賣。所以今年團年就係食佢啦！

食完飯食返個桂花湯圓，但今次真係好難食，媽媽早排因為諗方便響二記見到有桂花糖，所以買左樽番屋企看門口，但係原來超級難食，婆婆話未食過咁難食既桂花糖，今次一轉就出事，下次都係去番CWB間新三陽買。