再睇醫生(今次係睇兒童心理，順便睇理咳)

由於展圖d咳未清得晒，再加上唔肯食同飲，所以今日帶展圖睇一位新醫生(姑媽介紹)，呢位醫生寫過幾本有關兒童心理既書，希望可以睇下展圖唔肯飲同食係心理問題，定係真係因為唔舒服所以唔食。

因為呢位無得電話booking要親身攞籌排隊，所以今朝一早爸爸就去左排隊，到12點左右終於睇完，呢位醫生好細心同有耐性，俾我地講晒展圖一直以黎同呢幾日既狀況，聽完後醫生話小朋友生病就一定係無胃口，加上依家展圖仍然有少少感冒未清，所以都唔可以肯定佢係因為心理，定係生理(生病)既問題而唔肯食野，不過今次就開左一d開胃藥俾展圖豬食，另外叫展圖豬轉飲加營素。

今次呢位醫生開既開胃藥真係超級work (之前趙長成都開過一D但係無咩作用)，今日展圖豬已經食左2條蛋卷、2次砵仔糕(每次大半個)、1盒豆腐花、1碗杰粥、半碗飯、半碗粟米，中間仲有食少少餅仔~~~~~~~好勁呀！

夜晚食完飯後爸爸媽媽同展圖去爺爺嫲嫲屋企接番BB，爺爺同嫲嫲都肉赤展圖呢幾日唔食野，話聽日過黎一齊飲茶，順便同展圖玩下！

返到屋企之後媽媽同展圖豬沖涼，原本展圖豬又係顧住玩水唔肯出黎，後來媽媽同佢講，不如我地出黎著衫，媽媽之後同你講故事，之後展圖又肯俾媽媽抱出黎，所以媽媽可以肯定展圖真係明我地講咩，只係因為語言能力未發展好，所以未試表達自己想要既野。

另外媽媽又發現一件事，過去我地呢一個星期開始教展圖豬數數，今日開始佢會自言自語咁自己講1、2、3…….10，不過係有時間唔中會漏左4同8，唔知點解呢？