長隆3日2夜(展圖)瘋狂發顛之旅 – DAY 3

一早我地就去酒店食早餐，可能真係太餓既關係，展圖終於肯食少少(1片西瓜、2匙粟米、半個包仔、1啖西多)，同飲左杯奶，之後媽媽同婆婆又去按摩，而原本爸爸打算帶展圖去祈福會所個兒童樂園玩(果度好大，好似playtown)，不過由於展圖扭扭下計瞓左，所以無去到。
12點同展圖換片，發覺佢疴得好少尿，之後幾大家執好野，checkout，寄低行李，就搭車出天河行街，去到周圍行下，途中終飲左dd水，本來諗住去綠島食飯，點知原來已經執左，變左間意大利餐應，照去食，都幾好食(好多廣州西餐廳好難食)，估計係綠島原班人馬開既，我地叫左墨魚汁炒意大利飯、海鮮pizza、肉醬螺絲粉、濶條面、煎牛柳、果汁，樣樣都幾好食，埋單RMB6XX。中間展圖豬食左2個包仔，一啖PIZZA，少少果汁同水，雖然好少，但係叫好過無，佢呢幾日因為飲野食野真係搞到我地幾個大人神經緊張。

之後我地就去書城，因為媽媽想要去買個讀咭機同埋少少圖書比展圖豬，因為時間唔多夠，媽媽一個鐘就搞掂，終於決定買左枝點讀筆(送一套書)，再加幾本遊戲書仔，一共用左RMB600。

之後就去書城下底既KFC搵番大家，一落到去展圖已經大喊緊，仲要會全場觸目果隻，KCF已經夠嘈，可以想像展圖喊得有幾緊要。原來爸爸迫展圖食薯蓉，好辛苦先餵晒，之後婆婆話我知試過同佢換片，但係片片一D都無濕，估計係因為展圖飲得太少水，加上太熱出得多汗，身體已經無多餘水份可以排尿，所以一直無尿疴，因為驚佢會中尿毒出事，所以唯有灌佢飲水，希望佢有尿尿。

之後我地就搭的士返祈福，攞番行李後坐直通巴返屋企，返到屋企己經差不多10點展圖又係一D野都未食，所以婆婆煮左碗面，煎左隻蛋佢展圖，展圖又係一D都唔肯食，爸爸終於忍唔住爆發迫佢食蛋，用匙餵唔到就用手，媽媽見到都覺得好慘，但係唔食又會有事，真係好肉痛，今次爸爸真係好惡，媽媽都驚佢會整親展圖。

終於展圖企左埋一便喊，媽媽tum左一陣，可能佢真係嚇親，今次終於肯食，慢慢食，食到1/3碗左右。之後婆婆開左杯奶，原本展圖都唔肯飲，不過媽媽見佢想睇幻燈片，問下佢不如飲左杯奶，然後我就同佢睇幻燈片，結果見佢無再擰頭，俾佢飲又真係肯飲，媽媽發覺展圖其實真係明我地講咩。