今朝8點鐘去酒店食早餐，一心諗住展圖餓左一日早餐應該都會食野，點知食早餐時，又係咩都唔肯食(粟米片、多士、面包、蛋、奄烈、粥、面、菜、麥皮、肉類、豆類~~~~~全部都試勻)，淨係食左半片西瓜 (大小好似平時果盆果d咁細)。無辦法之下我地都唯有出發去動物園！
一去到動物園門口，嘩！超多人呀！不過好在原來d人都係塞響門口，入面一d都唔迫。入到去，門口有3個公仔人，本來覺得佢地個樣好醜，諗住唔影，點知展圖豬好鍾意，所以都係影左……之後見到有新款既公仔人展圖豬都要同佢地影相！行左一陣，真係好熱，出晒汗，諗住展圖豬都會口渴(事實上佢個嘴仔都已經乾晒)，俾水佢飲，唔肯飲！唯有出動維他奶(不嬲展圖豬都好鐘意維他奶&麥精)，點知都係飲得半包(係細包果隻既半包)已經唔肯飲。到呢個時候爸爸終於忍唔住出招，叫我地行開，打算鬧下展圖豬，等佢飲下水，點知行動都係失敗。
行左一半，大約11點幾左右，我地坐小火車睇動物，坐坐下可能實在係太攰，加上啱啱病好體力自然係差d，展圖豬又瞓著左，睇唔到最精彩既長頸鹿響我地面前橫過，不過好彩落車時又瞓醒左，所以我地又坐多一次。不過媽媽覺得坐小火車好失望呢，除左動物少之外(可能我期望太高，或者我應該去非洲大草原)，因為果個位置有d遊客可以自己渣車黎，只要俾錢就可以到呢個區域，加上假期，所以真係好多車，車仲多過動物，搞到好大沙塵，而且有d車又亂咁渣，有d人又唔守規則落車(話時話點解佢地唔知危險？)，真係搞到印象好差。
之後我地坐底食少少野，展圖豬又係唔肯食同飲，仲要汽水都唔飲，個嘴都乾都裂開見血，大家真係好擔心，迫親佢食同飲唔單止次次都唔成功，仲要搞到佢大喊，真係好心痛。
行多一陣，到走果時，我飲汽水時問展圖豬要唔要，見佢唔抗拒，雖然話佢仲有咳，但係總好過無水到肚(真係怕佢中暑)，所以都由得佢，好在都飲左1/4杯左右，跟住我地就返酒店，途中展圖豬已經瞓左，爸爸又見無咩胃口，所以爸爸陪展圖豬瞓一陣，我地就去食街揀左一間叫順德XXX(個名唔係好記得)既舖頭食，叫左乳鴿、蒸釀豆腐、生炒骨配蜜瓜炸鮮奶、醬爆茄子，今餐RMB102埋單~~~~~
之後我地上返酒店，由媽媽接力陪展圖瞓覺，婆婆去按摩，其他人就淨係按腳去按腳，除婆婆外大家預計4點幾返到黎再同展圖游水。
4點幾展圖豬自動瞓醒左，一醒左就響度笑，心情應該唔錯，所以媽媽即該沖左杯奶，點知仍然係一滴都唔飲，淨係食左一啖面包，實在令人好擔心！出發前展圖豬過左姑媽同Ingrid姐姐間房玩，見到佢地食蝦餅，竟然奇蹟地食左好多，仲飲左好多水，大家都成個人鬆晒。
之後我地去左祈福果個水上樂園同展圖豬玩水，果度真係名乎其實既水上樂園，D水淺到不得了，游都游唔到，玩左大半個鐘，太陽落下D水開始凍凍地，所以返酒店沖涼。
沖涼後出發去酒店對面既漁米之鄉食粥底打邊爐，一開始因為已經晏(大約8點)，媽媽見展圖豬扭計，諗住佢可能係餓，但係D野又未滾，所佢俾2塊餅展圖豬，而豬仔亦都食得好快，但係到開始食野時，又係一啖都唔肯食，而爸爸亦都覺得無理由展圖豬餐餐都食餅，所以今餐餓下佢都要，點知展圖就係咁硬頸，唔食就唔食，我地唯有叫左一盒炒飯返酒店，希望佢晏少少會食。
超好味，我地叫左鯇魚、雞、手切牛肉、帶子、蠔、蝦、康生菜，選擇唔係太多，但係樣樣都幾好食，尤實是條鯇魚既頭同骨用蒜蓉蒸，同埋個粥底打完邊爐後食番真係好好味！
返到酒店姑媽同Ingrid打算好似下晝叫扮食野，輕鬆d，睇下展圖豬會唔會，結果行動都係失敗，婆婆又tum又灌之下先迫到展圖豬飲半杯奶然後瞓覺。
跟住除左婆婆，就大家一齊去按摩，之後番酒店瞓覺。
沒有留言:
張貼留言