剪頭髮

話說圖圖既頭髮有點長，又將要拍考小一的證件相，媽媽心想今次不如帶圖圖去媽媽剪髮那裡去吧，因為那個髮型師剪得比較比較斯文及有心機。

媽媽決定後便去問圖圖

媽媽：「圖圖，不如聽日媽媽帶你去俾一個姐姐剪頭髮好嗎?」
圖圖：「但係我想哥哥剪喎~~~~~」
媽媽：「但係姐姐剪得靚d喎~~~~~」
圖圖：「但係我唔想紥辮喎~~~~~」
媽媽：「姐姐唔會幫你紥辮嫁~~~~~」(偷笑中)
圖圖：「佢係咪知我係男仔呀~~~~~」
媽媽：「係呀，咁聽日搵姐姐同你剪髮好唔好?」
圖圖：「好啦!」

好可愛 - 3D Minnie Cake

我講緊好可愛既唔係我個蛋糕，係今次訂蛋糕果位媽媽既囡囡，即係生日果位小朋友，因為我同果位媽媽email通訊時，見到佢張頭像相係超級得意呀~~~~~~!

Minnie Cake

呢位媽媽同我訂蛋糕時想要Minnie Cake，但係想要有一點不同，媽媽當時心想太好了，因為之前果個Minnie Cake已做了不止一次，大家都好似係睇相訂蛋糕咁，做到有d悶呢，正心想唔好近期再做同一款，好在今次Melissa既媽媽想要不一樣既，真係打救左我，如果唔係我實會悶死~~~~~!


Minnie Cake

Melissa喜歡蝴蝶結，Melissa媽媽想要個蛋糕女仔d，但媽媽又唔鍾意用單一粉紅，覺得咁會唔靚，所以今次在5種唔同既紅色(相機好似影唔到咁多種紅)，加上白色同淺綠做襯托，希望Melissa會鍾意呢!



另外Melissa媽媽都訂左Cakepop做回禮，因為想要配合返建蛋既顏色，所以做左白朱古力外層，沾上粉色碎糖同埋挷上粉紅色既薄紗絲帶，希望收到既小朋友會鍾意。

Hello Kitty 2D Cake

今次係Hello Kitty蛋糕，原本呢位媽媽係想要cheese cake，不過小朋友睇過我既blog後，話想要一個Hello Kitty既2D蛋糕，原來小朋友想要既係朱古力慕絲蛋糕，呢個OK無難度呢!

Hello Kitty 2D Cake

因媽媽媽一向唔鍾意慕絲一大舊，咁食落去勁漏，所以將個蛋糕薄切，分左4層蛋糕，3層慕絲，咁食落去一定啖啖都會有蛋糕同慕絲。
另外呢位媽媽都同我訂左1打CUPCAKE，其實都係原味戚風加CREAM CHEESE TOPPING，因為無特別要求，所以媽媽就隨自己心意做左2個款出黎。其實正常一打應該只出一款，同埋基本只係唧花加糖碎，只不過媽媽想要做下新款出黎開心下，所以就友做左2個款，希望小朋友會鍾意呢!




Cherry Blossom

3D鬆弛熊蛋糕工地篇

訂呢個蛋糕時，果位媽媽話係用黎慶祝BB既一歲生日，因為BB既乳名叫鎚仔，所以想要加一個鎚仔上蛋糕上。因為我覺得淨加一個鎚仔怪怪咁，所以建議不如俾鬆弛熊帶上工地帽，同埋俾駕手推車佢，咁會MATCH番鎚仔呢!

 

因為想俾BB食少少蛋糕，但我又覺得一歲BB唔好食忌廉太油膩，所以徵求左果位媽媽同意，上層淨係做一個4吋既小蛋糕，中間夾香蕉同埋搽上杏桃果醬，咁BB食多少少都OK呢!



上次做鬆弛熊，因為係第一次做，所以唔知隻雞仔叫豬鼻雞，仲要有個豬鼻，今次再做，從善如流，就比返個豬鼻佢啦!

呢幾日唔知係咪因為轉天氣，好潮濕，搞到成日都覺得好鬼攰。

今日完成呢個蛋糕後，覺得有超超超攰，真係要早D瞓.......

婆婆生日飯@Tiffin

基本上我地一家比較少食自助餐，一來一家幾口不便宜，二來食太多，對腸胃唔好，食太少又好似唔抵。

不過每年都會食1-2次，多數都係生日飯，因為唔駛諗，基本上食咩都得。

今年婆婆生日飯都係揀返sunday brunch，因為大家都覺得自助餐早d食好，有多d時間去消化，唔駛飽住去瞓覺咁辛苦。

圖圖雖然已經4歲，但訂位時Grand Hyatt都講明話免費，好抵!唔知究竟佢可以免費到幾歲呢?






仲有一個雪糕櫃，有6種雪糕，2種sobert，仲可以要即制waffle(呢個勁厚勁好味)，加埋雪糕同一堆配料超正呀!

必食既當然係要order，我地一家既至愛Egg Benedict，呢樣真係超好味，每次brunch既必食之選!另一樣要試既係生牛肉他他，

唔係次次都有生蠔，不過今次就有，好新鮮，勁爽口同鮮甜!

比較係萬豪，各有優勝，萬豪坐得舒服d，環境好d闊落d。

海鮮方面萬豪多d，但係甜品就麻麻，但係又有黑松露菌炒蛋同魚子醬，Prama Ham就萬豪好味D。

Tiffin海鮮少d，焗龍蝦麻麻地，但係佢既煎鵝肝比萬豪既好食好多，甜品係超多同好味，因為呢樣係Tiffin既強項，仲要所有水果係超甜(橙除外，爸爸話未試過食咁酸既橙)。

果汁同咖啡茶方面萬豪個drink list多好多，淨係佢壼上既Lanvendar Tea就好正，但係Tiffin就得幾樣。

每位$6xx + 10%，如果鍾意飲酒既可以加多100，就可以任飲rose champagne，仲有幾種cocktail，不過婆婆同爸爸都唔飲酒，之後我地又有行程，所以今次媽媽都無飲到，如果唔係都幾抵!

之後我地一家坐船過返九龍去Element睇戲，再之後係爸爸同圖圖去溜冰，媽媽死都唔去，因為媽媽係一個運動白痴，讀書時試過同同學去溜冰，跌過一次五體投地，自此之後就死都唔入冰場。不過圖圖勁鍾意，一d都唔怕跌，原本媽媽諗住大少少比圖圖學下，睇黎可以提早d學呢!

感激 - 麵包超人蛋糕

我要感激同我訂呢個蛋糕既朋友，因為佢係響好幾個月前已經同我訂呢個蛋糕，其實佢未食過我既製成品，只係見過我幫其他朋友做既幾張蛋糕相，就相信我俾機會我同佢做生日糕。

最開心係佢比幾個choice我去揀做咩款蛋糕，搞到我勁開心，有發揮既蛋糕，可以做到新設計我最最最鍾意，因為咁我既蛋糕相又多一張，有時我睇下自己整過幾蛋糕相就好開心，可以睇好耐~~~~~~(有d變態!)
今次Vicky(係呀同我地同名)同我訂呢個蛋糕特別想要咖啡味，同埋要勁多cream，我今次真係落重手左，希望佢會覺得夠，因為咖啡味同雜果/士多啤梨唔夾，但係又唔想要香蕉，所以我建議落朱古力脆珠，每層中間都夾左滿滿既脆珠，希望佢會覺得好味!

停一停透一透 - 竹炭蕃薯包

原本今個星期有mission要做個生日蛋糕比爸爸，仲考慮做叮噹定係做貓頭鷹既魔幻篇，之但係爸爸今個星期唔舒服，叫媽媽唔好整，所以今個星期媽媽可以休息一下呢~~~~~~

呢個竹炭蕃薯包其實想做好耐，但係媽媽怕死又嫌尖，311地震後已經唔敢再買日本既農作物，但係大陸蕃薯又唔想用，好在上個星期響Taste見到有韓國蕃薯，所以終於可以開工。

竹炭蕃薯包


包包只係用番一超軟包做包底，不過加多左5g竹炭粉，蕃薯預先用air fryer 200C焗25分鐘，切去頭尾再切開一半，第一發酵後做型時包做餡就OK，出爐後撒上少少糖霜。

食落韓國蕃薯食落一定無日本既咁甜，同中國既差不多，不過係乾淨好多~~~~~，我覺得都OK，尤其是我好鍾意食蕃薯......

小一報名及面試時間表

2012年5月26日前

(星期一至五0900 - 1700、星期六0900 - 1300)

國際基督教優質音樂曁小學報名
http://icqm.edu.hk/included/category/information/latestnews/download/2013-2014_P1_App_form.pdf

2012年6月9日(SAT)
國際基督教優質音樂曁小學面試

2012年6月16日(SAT)
國際基督教優質音樂曁小學面試

魔幻蛋糕 - 天馬篇

今次係一位準新娘子訂比未婚夫既生日蛋糕呢，好開心今次俾我自由發揮，新娘子既唯一要求係唔好食肥佢，所以2層蛋糕入面一層係普通既士多啤梨cream cake，而另一層就係伯爵茶味既Cheese Cake，芝士蛋糕改左用0%脂肪既cream chesse同埋用代糖做，雖然係咁但係味道同一般正常既chesse cake係一樣架。



至於裝飾方面新娘子俾我自由發揮，真係超開心呀，我有好幾個Magical Cake想做，天馬係其中一款、仲有一款係貓頭鷹、同埋一款係絛龍趴響城堡上面(不過呢款我已經諗左等圖圖生日做比佢)。

其實呢個天馬都難造，因為佢果2對腳係唔夠力承托個身，所以要黏實都花左好多功夫~~~~~，好在終於整好，而且今次都幾滿意呢!

大量士多啤梨 - 鬆弛熊蛋糕

尋晚做左個Cinderella，但因之前做過，所以今次無影相啦~~~~~~!

今日既主角係鬆弛熊蛋糕，壽星對蛋糕無咩特別要求，只係要求要鬆弛熊，同埋蛋糕要有大量士多啤梨，幸好呢個時間士多啤梨真係好靚，今次用左2盒韓國士多啤梨，仲要將佢厚切，相信以滿足對壽星女既要求。

因為主角只係要鬆弛熊，其他無特別要求，顏色同裝飾都可以自由發揮，所以今次都幾滿意呢!

希望壽星女Carrie會喜歡呢個蛋糕，祝生日快樂!