打冷

今晚婆婆去左游水，去之前婆婆已經整左三文治俾展圖豬食，不過唔肯食，淨係要食三文治既蕃茄，差不多食足一個。

跟住爸爸、媽媽同展圖豬去左觀塘打冷，我地叫左一個九菜豬紅、鵝片、大眼雞，媽媽本來俾D魚、鵝片、豆腐同白飯展圖豬食，但係結果係展圖豬最鐘意食飯，食左成大半碗，肉、魚同豆腐都唔係咁肯食，真係好奇怪~~~~~~

之後我地就返屋企，途中經個Pie & Tart買左一個鮮奶蛋撻俾展圖豬夜晚食，等佢食少少蛋，有d蛋白質~~~~~~

展圖豬去健康院做特別評估&今日變左大胃王

今朝一早帶左展圖豬去健康院做評估，雖然玩既野同平時差不多，但係問既野就詳細好多好多，淨係問問題都差不多問左一個鐘，之後又要填份100題既問卷~~~~~~但係原來今次都係初步評估，仲要排期多6個月左右等多一個專家評估先至有結果。

下晝好多人打黎關心展圖豬個評估做成點~~~~~~多謝晒各位！

今晚婆婆煮左蕃茄肉許薯仔湯飯俾展圖豬，然後就去左游水，由媽媽負責餵飯。

因為媽媽覺得展圖鍾意同大人一齊食飯多D，所以就煮左冷麵加幾片火雞肉同烚左碗菜俾自己。

最初展圖豬都肯自己食，媽媽幫展圖豬畢入匙，然後展圖豬就自己放枝匙入口，雖然都有DD論盡，食到天一半地一半，不過都無咩所謂，但係食左一半飯之後，豬仔竟然要食媽媽既冷麵，仲要不停食，食左媽媽大半個麵，不過媽媽都由得佢，反正果D都係蕎麥麵，又無加調味，OK健康，難得佢肯食。

之後又食左2個山崎既迷你包包，夜DD九點幾，媽媽又俾左20粒今日下晝買左既籃莓俾展圖豬，佢又食晒~~~~~~~夜晚仲要飲晒餐奶，真係好勁呀！

去深水埗+姑媽黎同展圖豬玩

今日一朝早因為爸爸要去深水埗買DD野，媽媽順便帶埋展圖豬去，諗住順便去福榮街睇下有無玩具啱。

點知因為太早，所有舖頭都未開門，所以白行一趟。

下晝姑媽特登黎同展圖豬玩，帶左展圖去左樓下公園玩左好耐，難得媽媽同爸爸可以休息一下呢~~~~~

展圖豬終於有自己既書檯

今日係端午節，我地一家人一早去左德福稻香飲茶，展圖豬又係食少少野就唔肯食，不過過左一陣，展圖豬竟然聊隔離枱既姨姨玩，猛咁同人笑，之後姨姨仲俾左個包展圖豬食，本來媽媽唔好意思，叫展圖豬唔好，但係因為展圖豬已經隻手渣左落去，所以都係多謝左姨姨，攞左~~~~~~

但係好奇怪，當個包拎左黎，展圖豬又唔肯拎黎食，我問爸爸，爸爸話因為我之前同展圖豬講左話唔好，媽媽諗唔到展圖豬咁乖，而且展圖豬仲係一個bb，所以諗野好直接，因為我講左話唔好，所以佢唔明點解之後又可以，結果就唔食~~~~~~媽媽唯有撕小小俾展圖豬食幾啖，等佢知道係食得，再成個包俾佢，結果展圖豬自己竟然攞住個包食晒(好叻呀~~~~~)。

飲完茶，我地就去IKEA度買左張書枱同幾張椅俾展圖豬，等展圖豬第日有朋友仔都可以有得一齊坐，之後我地就一袋二袋返屋企啦！

見營養師

爸爸媽媽見營養師，媽媽身體既脂肪比例高過爸爸成7%，慘慘~~~~~睇黎真係要減肥啦！

之後媽媽同爸爸去左蘭桂坊一間樓上舖食飯，味道一般，所以唔駛推介啦！

展圖豬人生既第一次補習

今日下午Ingrid姐姐黎教展圖豬，不過大家都睇唔到，因為Ingrid姐姐話小朋友如果有熟人在場，就會唔聽話。

不過Ingrid姐姐夜晚打左電話俾媽媽，話今日教左展圖豬紅色同綠色，教左展圖豬玩煮飯仔係唔可以真係食，係要扮食。

慶祝母親節@金龍船

今日係母親節，爸爸早幾日已經響金龍船訂左位飲茶。今日飲茶既有嫲嫲、婆婆、爸爸媽媽、展圖豬、姑媽同姑媽既朋友~~~~~~點解會有姑媽既朋友？事緣姑媽知道展圖豬到依家成21個月都唔肯講野，健康院又轉介展圖豬再做評估，所以今日特登約左佢既朋友Ingrid姐姐黎，睇下展圖豬，因為Ingrid姐姐係教開playgroup~~~~~

飲完茶之後Ingrid姐姐應承我地一星期黎我地屋企2次，每次1個鐘，黎教展圖豬。

之後婆婆去街，姑媽返屋企一陣，Ingrid姐姐要去做野，嫲嫲就黎我地屋企，我地一家人就約埋夜晚再食晚飯。

健康院~~~~

今日婆婆下晝展圖豬要去健康院，或者大家可能話唔係歲半果時做咩，點解會遲咁多~~~~~原因為媽媽以為今次去健康院要打針，之前展圖豬又病過一兩次，所以想佢身體好D先打針。

點不知原來媽媽擺左烏龍，原來今次歲半針應該返高醫生度打~~~~~

不過始終去健康院都最少要做做發展監察，婆婆話磅重既姑娘讚展圖成日笑。

今次做監察要Check搭積木，其實展圖豬一向都無玩積木(因為媽媽無買呢個玩具。姑娘教展圖搭積木時，婆婆話展圖豬搭一舊都未叫好穩陣時，就已經拍晒手，所以姑娘教教左一陣，但係期間都不斷拍手，姑娘都笑話展圖豬鍾意人讚呢~~~~~！其實有邊個人唔鍾意人讚，大人都鍾意啦！

不過因為展圖豬到依家都未肯講野，所以安排左見醫生，醫生見完後同我地安排左5月份同展圖豬做評估~~~~~~其實都唔知訐估咩，所以到時先算！不過醫生話呢個評估一日只可以同一個小朋友做，所以唔可以遲到~~~~~~~

不過姑娘話小朋友玩煮飯仔好有益，所以媽媽打算拆展圖豬個廚房出黎俾佢玩。

展圖@Mega Box

今日婆婆放假去街一天，朝早爸爸話今日不如去Mega Box飲茶，媽媽諗起上次同婆婆去食飯果間醉紅樓都幾好食，所以十點幾媽媽幫展圖豬沖好涼就過去啦！

一去到Mega Box去二樓借車仔先，因為媽媽今次偷懶無帶車仔~~~~

去到醉紅樓，媽媽即刻點野食，最緊要緊係上次食過好好味既小籠包，仲有一定要叫嫩雞煨面同包包俾展圖豬~~~~~

飲茶果陣因為隔離有個BB，展圖豬超級開心，仲要成日大叫~~~~~~

之後飲完茶，我地又落樓下既小型遊樂場玩左一個鐘，玩到展圖豬攰晒~~~~~終於仲要響走果時瞓著左~~~~搞到媽媽要抱佢返屋企，對手爭D斷~~~~~(唔好話爸爸唔抱，因為爸爸腳痛呀！)

好可愛既樣 +好邪惡既樣

歲半針

因為之前媽媽擺左大烏龍，所以今日婆婆帶番展圖豬去高醫生度打歲半針~~~~~，可能展圖豬依家大左，比初出世時身體好D，所以無咩大反應，太好啦~~~~~