2008年10月28日 星期二

展圖豬學行啦~~~~

今日展圖豬唔知點解企好多,仲要響夜晚時開始學行~~~~~係呀學行,佢可以轉到彎同好慢咁行一呎左右,雖然只係一呎,但係媽媽都已經覺得好叻啦!

2008年10月27日 星期一

展圖豬咳咳呀~~~~

今日展圖豬起身有D咳,所以婆婆一早帶佢去睇高醫生,聽人講高醫生可能會響今年內退休既,好可惜,因為佢真係一位好好既醫生~~~~~

夜晚嫲嫲同爺爺黎左打邊爐,順便睇下展圖豬,不過可惜係因為食左藥既關係,所以一路瞓瞓瞓呢!

2008年10月26日 星期日

展圖豬@halloween party

今日爸爸要做野,而婆婆又約左朋友去街街,所以全日展圖豬都係由媽媽take care,一朝早婆婆將展圖抱過黎同媽媽一齊瞓,到左8點幾,竟然自已醒左,仲要企響屋度猛咁禁燈制~~~~~~好可愛呀!

媽媽起左起餵左展圖豬飲奶同換片過後就同展圖豬去將軍澳廣場,因為媽媽要去吉之島10蚊店買多幾隻早前買既啫喱杯~~~~~~跟住又買左一d垃雜野,跟住就同展圖豬去美心食早餐,媽媽食早餐時餵左展圖豬食通粉(之前未比過街既通粉展圖豬食),展圖豬好鍾意食呀!本來有dd扭計都即時乖晒!食完早餐後媽媽就帶展圖豬返屋企餵飯仔,坐車途中隻豬仔竟然瞓著左~~~~~

下晝兩點媽媽又帶展圖豬出街,因為幾日前媽媽知道將軍澳東山既Halloween Party,所以約左媚姨姨同佢既囡囡一齊去玩,去到東山泊好bb車就入課室,不過唔知係咪第一間課室對於bb太驚嚇,2個BB入到課室都即時大喊~~~~~~陰公!

後來我地公第二個課室,可能光D又Colourful D,又有D汽球響樹,兩個BB都玩得好開心,展圖豬周圍爬來爬去,又爬出門口走路,媽媽捉左佢成十幾次~~~~~

到左講故事時間,一開始展圖就大喊,媽媽唯有抱展圖豬行開一陣,怕影響人地,點知可能展圖豬可能係太攰既關係,一抱就瞓著左,仲響果度瞓足成個鐘,等媚姨姨同佢既BB玩完先一齊走~~~~~

2008年10月25日 星期六

展圖豬學識禁燈制

今日媽媽放左工後帶展圖豬返KinderU,仲同展圖豬著果日買既萬聖節衫仔出去,點不知原來,KinderU下個星期係Halloween Party,所以下星期又要著多次呢件衫仔出現呢~~~~~

另外今日展圖豬學識左企響媽媽張床果度禁燈制,仲要玩得超開心~~~~~!

2008年10月24日 星期五

展圖豬出第5隻牙仔啦!

因為展圖豬到現時為止都係得果2隻牙仔,今日媽媽夜晚特登吼睇下,發覺展圖右手門牙傍終於見到第5隻牙仔既踪影啦~~~~~~!展圖豬生牙仔好似比一般既小朋友慢dd,唔知幾時佢先出到大牙呢?

2008年10月23日 星期四

大出血啦~~~~

之前幾日因為媽媽上Baby Kingdom知道永安今日會開始大減價,因為有個超正既焗爐好抵($1398減到$998),所以放工之之後約左婆婆帶埋展圖豬過大古城,順便去埋Bossini買番件萬聖節衫仔比展圖豬,行左一輪~~~

一去到太古城,食左飯,買左衫仔,就去永安,見到promotion果個焗爐,功能係唔錯,不過細左dd,左諗右諗後,都係決定買個無減得咁平,但係大少少既焗爐~~~~因為媽媽成日都覺得屋企既既焗爐唔夠大,如果貪平買個細既反而可能唔啱用。

跟住就好睇婆婆想買好耐既高速煲,由於Apita都做緊高速煲既promation所我得行左一排比較下,終於都係決定買永安既Fissler 10L (因為大D價錢又差不多)。

買左呢兩樣野都大出血啦~~~~所以唯有番屋企!

返到屋企同爸爸講笑話我地啱啱蒸發左佢4000蚊~~~~~~

2008年10月7日 星期二

展圖豬@動植物公園

之前媽媽已經想帶展圖豬去動植物公園,今日適逢公眾假期,天氣又相當清涼,而且不太晒,所以下午等展圖豬訓醒晏覺後,就帶展圖豬出發~~~~~~~

媽媽同婆婆先同展圖豬搭地鐵去中環再轉的士,點知竟然遇上一個唔識路既的士司機......oh ~~~~~~!!!

不過好在司機問下其他人都搵到~~~~~動植物公園依家好似比起媽媽細個時少左好多動物,好快就行左一圈~~~~~~!雖然我地覺得好似無咩好睇,不過展圖豬見到d馬騮就好鍾意,笑得好大聲~~~~!而且成日抬高頭望d樹!

因為展圖豬仲未識行,所以我地無去個遊樂場同公園,不過如果展圖豬識行既話再去應該好開心!

之後我地落左中環,媽媽好開心買左一條粉紅色好閃既釘珠披肩,跟住仲去左H&M同ZARA買左三頂帽俾展圖豬再響IFC度食埋海南雞飯~~~~

返到屋企已經係八點鐘,咁樣我地就出左街五個鐘啦!

2008年10月4日 星期六

第一日離手企

今日媽媽放左工,就返屋企接展圖豬返PLAYGROUP。

因為今日展圖豬未瞓過覺就返學,所以狀態只係一般咋~~~~~

不過上上下堂,當展圖豬扶住媽媽對手面向Miss.Heley既時候,竟然因為大興奮,唔記得左,而放開媽媽對手企左響樹,仲要超開心彈下彈下~~~~~~既狀態下,自己企左十幾秒,先發覺自己係自己企緊,就坐返低~~~~~

不過淨係咁媽媽已經覺得展圖豬又已經大個左啦~~~~~

2008年9月6日 星期六

展圖豬有機會做花仔

自從發表左上個blog之後朋友A打電話黎關心問我點解唔做全職媽媽~~~~~~順帶正式發出通碟,展圖豬正式收到Invitation,下年會響朋友既婚禮做花仔,而媽媽就會做bridemaid~~~~~好開心呀!

朋友既婚禮地點仲未確實,不過好大機會去東南亞行chapel,好浪漫~~~~~~!響呢度要再正式恭喜~~~~~~~好朋友!

如無意外既話睇黎第一次同展圖豬出國會係參加婚禮呢~~~~~~!而且呢個婚禮仲會有三個花女~~~~~~嘩!好多囡囡呀!

由於媽媽依家要返工,所以星期三唔可以同展圖豬返kinderu,咁啱星期六Miss. Haley又有位,所以同展圖豬轉左返星期六。呢個班唔係男校咁啦~~~~有兩位女同學,而且大家既年齡有dd差距,大既就歲半,細既就十一個月~~~~不過都無所謂啦!

由於臨近中秋,放左學之後媽媽走左過老三陽買左呢幾年都好鍾意食既上海月餅,今年仲買埋鮮肉月餅同金華火腿~~~~~金華火腿好正呀!下個星期再去買多幾個先,事關過左中秋就無嫁啦!

2008年9月1日 星期一

脫離全職媽媽的日子

係呀大家無睇錯,今日媽媽開始脫離做全職媽媽既日子,開始要返工啦~~~~~~!

其實返工最主要原因係婆婆成日都話媽媽,無所事事響屋企~~~~~~~媽媽成日話遲幾年等展圖豬返小學時先至考慮返工,但係終於都係抵擋唔住婆婆既音波功,所以響上個星期開始搵工。

搵左一個星期,見左四份工,有三份請左,媽媽終於決定左揀今日做果份,因為最近屋企,十五分鐘可以返到工,無咩OT,容易請假~~~~~所以雖然呢間唔係最高人工,但係媽媽為左放工之後可以九秒九返屋企睇展圖豬,所以就揀左呢間啦~~~~!

要返成日工,見唔到展圖豬真係好唔捨得,媽媽尋晚仲偷偷地喊添呀~~~~~!唔知婆婆可唔可以一個人take care依家越黎越黏人既展圖豬?