年初一

今日係大年初一，黎展圖過第一年新年，今日行程好緊迫呀！同展圖豬著好件老鼠衫(媽媽秋天已經買定啦！)，揹好個背嚢(裝展圖豬d利是)就出街啦！

朝早我地去爺爺嫲嫲屋企拜年同食開年飯，姑媽因為啱啱去完日本，仲特登買左幾件衫送俾展圖豬添！食完飯之後，我地就入馬鞍山去四姨婆屋企拜年，嘻嘻一去到，個個就搶住同展圖豬玩，媽媽同爸爸就趁機閃左去新城市行街~~~~~之但係因為搭巴士出去都好耐，媽媽同爸爸響巴士都訓到死左咁滯~~~~~無辦法年尾前舖頭忙到傻左，訓都無得訓，媽媽落巴士果陣仲暈下暈下，企唔穩撞左落人地度，好瘀呀！

行街行左唔夠一個鐘又要返去啦~~~~因為展圖豬食米糊進度未如理想，所以今日就放佢一日假啦！

個個都讚展圖豬易湊好乖，食奶又快，又唔喊，玩到攰就算嘈得好緊要都訓得好好，媽媽真係覺得超威風呀！