6日6夜@沙巴 Day 3 - 圖圖病左啦！

尋晚瞓到半夜4點幾，圖圖成身汗，之後又話好凍，因為之前果日瞓太少，下晝游河著住件救生衣又搞到成身汗，都心知不妙，即刻同佢探熱，已經係發燒邊緣，拿拿臨比定退燒藥佢食，點知都退唔到，終於燒到去到38.x度，雖然唔係好高燒，但係響熱帶雨林入面咩都無，出去搭車都要三個鐘，所以都幾驚，見佢食左3個鐘藥都退唔到燒，就加多一劑退燒藥俾佢，好在之後終於退到燒，個心都定d。

之後媽媽因為擔心圖圖又再燒，都唔係好瞓到，爸爸就天光前起左身，諗住去影日出，出到房間口，見到有好幾隻勁大飛蛾同埋甲蟲，即刻叫媽媽出去睇，d飛蛾大過媽媽隻手掌，最少有成9吋濶，甲蟲媽媽就睇唔到，不過爸爸話直徑有2吋咁大。

傳說中既勁大甲蟲


隻飛蛾超巨，仲大過隻手，媽媽唔敢放野響隔離做比例


之後爸爸同媽媽出去碼頭影日出。

河邊日出




其實今朝6點15分有遊河，不過媽媽唔放心俾婆婆一個人睇住圖圖，擔心圖圖有咩事婆婆同人溝通唔到，所以就留響房，而爸爸就繼續去遊河。

到8點幾爸爸終於返到黎，原來佢話中途落好大雨，個個成身都濕晒，原本諗住折返，點知之後又無落雨，所以繼續落去，之前爸爸仲要懶醒抽起把摭，好在個Guide好人，有個膠袋俾佢包住部相機，如果唔係真係唔知點算好。



呢隻猴子淨係會隻蟹，捉蟹既方法係將條尾放入蟹洞，等隻蟹蚶佢條尾~~~~~~?????




蜥蝪


尋日見到果條蛇，今日仍然響果度，果然係大懶蛇！


食完早餐後就坐B&B既Mini Van返回山打根，有d B&B既住客會中途落車，因為佢地要轉搭巴士去其他地方，所以Mini Van會響佢地轉巴士既地方放低佢地。今日程車就甘羅，因為圖圖發燒 + 嘔 + 去唔到大便肚仔痛，所以好辛苦，不過好在中間時間佢都瞓到下，咁先叫好D。

到左山打根我地去Rose果度攞番D行李，司機再車我地去NAK Hotel checkin，因為我地早左少少到，所以佢只係俾住一間房我地先，雖然NAK既外觀嘛嘛，無Swiss Inn咁新淨，但係我之前睇相，覺得佢既房間比Swiss Inn大d，圖圖會多d活動空間，所以我當時就揀左NAK。事實上NAK各方面都唔錯，只係冷氣唔夠凍，其他都ok啊！Swiss Inn雖然無住到，但係佢出面海皮有dd臭，所以我覺得自己選擇都無錯！



大床房




響NAK checkin後一致決定到樓下藥房買枝甘油泵比圖圖，解決佢肚仔痛呢個問題。之後媽媽買左雞飯同埋KFC(因為沙巴既KFC兒童餐送Transformer)返酒店食，而爸爸就響NAK樓下間餐廳食飯，爸爸話呢間餐廳OK，冷氣夠，好味，仲可以講廣東話！

NAK對面既藥房


NAK樓下餐廳


爸爸點既海鮮冬蔭公，雖然同泰國既唔同味，但都好味喎！爸爸話佢食左RM10左右！


之後媽媽攞埋另一間房，因為佢地原本住King Room果個客仲未返黎checkout，所以upgrade左俾間suite我地，呢間房大好多，有四柱大床呢~~~~！

套房






窗外景觀


之後我地一直響房休息直至傍晚，就上酒店上面既lounge飲佢果杯welcome drink順便影下相睇日落，原本諗住之後大家一齊出發去海上皇食晚飯。點知響lounge坐坐圖圖已經好似好攰瞓著左，所以婆婆建議我地不如照樣去食，佢就留響酒店照顧圖圖，海鮮就同佢地包返黎。

NAK樓上既Lounge，我覺得都整得幾靚


Welcome drink，好好飲架！


Lounge既另一角度



由NAK去海上皇的士RM15，車程約10-15分鐘，不過由於海上皇無的士站，所以要同的士司機約定時間，叫佢接返，據我地觀察山打根市民一般唔會坐的士，坐的士既多數係遊客，而遊客數量不多，所以的士司機都會好願意黎接返你。

今次我地叫左一條清蒸老虎斑，四隻奶油老虎蝦，一碟黑椒炒蟹，一碟蒜頭炒樹仔菜，兩杯果汁，一個白飯。條魚勁大條我估有成16吋長好厚肉，爸爸話香港食應該要過千蚊，老虎蝦有大約有10吋長，可惜佢唔係做濕既奶油老虎蝦，所以我地覺得乾左DD，蟹反而細隻左少少，不過D蟹只係RM3/100g，超平所以無所謂，樹仔菜好爽口，食落去幾得意。

Mango Juice同埋Lime Juice，芒果汁勁甜呀，lime juice就好開胃(RM4.5 & RM3.5)


蒜蓉炒樹仔菜，爽爽地好好味~~~~(RM15)


奶油老虎蝦(4隻，RM60)


黑椒炒蟹(500g，RM3 per 10g)


好大條既清蒸老虎斑，爸爸話如果香港食，淨係呢條斑都最少要一千蚊喎~~~(1KG，RM8 per 100g)


呢餐出乎我意料外，真係好平，RM200有找！回程時我地約埋的士司機聽日車我地去海龜島個碼頭。

之後我地攞個飯盒俾婆婆，婆婆話圖圖無再燒，不過就好攰，久唔久會瞓醒，玩5-10分鐘又瞓過，之後我同爸爸落樓下超市買少少野，今晚就爸爸同媽媽同圖圖瞓，等婆婆可以休息下。

希望圖圖唔好再燒快D好番啦！

八點幾已經好似死城咁

6日6夜@沙巴 Day 2 - Kinabatangan River熱帶雨林

瞓左4個鐘又要出發啦，好在尋晚住果間酒店無mini bar，得個吉既雪櫃仔，所以checkout時唔駛check黎check去，好快就搞掂！

司機一早已經黎到等緊我地，去到機場先叫婆婆同圖圖坐埋一邊等。機場得好少人，係有d台灣人，原來kk返台灣既機又係要凌晨checkin，真陰公！

晨咁早既機場係無~~~~~人既！

因為少人既關係所以超級快就搞掂，去返婆婆圖圖度，竟然有幾盒野食，原來係d台灣人住果間酒店俾既breakfast box，因為佢地覺得食唔晒要掉太浪費，所以好好人咁俾左一份婆婆，但一份既份量真係唔少，有一個蘋果，一盒炒飯，一份三文治，真係仲多過媽媽平時既lunch。本來佢地仲想要俾多一份婆婆，但係因為婆婆怕食唔晒浪費，所以婉拒左。

咁啱爸爸因為要幫我唱散紙，見到donut舖開左，所以買左2個番黎，結果係勁難食，圖圖食左2啖話唔食，爸爸食左一啖，話似一個烘唔夠既包咁~~~~~

響機場坐左成差不多2個鐘先上機，其實原本我地唔駛咁早drop baggage，但係怕個司機放飛機，唯有預多d時間，咁到時搵酒店再call第二個司機都ok呀嘛！

由KK飛山打根只要45分鐘，起飛後好快就到，因為山打根既機場好細唔多機，所以好快已經攞左行李。

山打根既機場好古式古香


今日開始2日1夜既行程媽媽原本打算響Sandakan Harbour Square訂，不過佢地個工作人Rose自己開左左間Guest House，而媽媽一向就同Rose聯絡，所以就同Rose直接訂，順便訂埋機場去佢間Guest House既接送，咁就唔駛拎住d行李周圍搵。

一出機場已經見到司機，送左我地去Rose Guest House後，再俾埋尾數(因為之前已經匯左訂金)，留低D行李就落樓下搵食，順便去Sunday Market行下，一落樓隔兩間舖位，就見到一間賣電話咭既舖頭，問下老闆娘有無上網咭賣，點知老闆娘講廣東話，仲要話佢媽媽都係香港人，呢間舖最正係我地用ipad上網，而佢提供剪咭服務。張上網咭都只係RM25，可以用5日，不過響馬來西亞買上網咭同電話咭都要登記護照呀！

行左幾步，媽媽同爸爸突然醒起原來無俾錢就走左，所以就返番去間舖俾返錢，原來佢地(老闆娘同佢個仔)都以為大家收左錢，所以都唔為意我地無俾錢就走左。

其實Rose果度行一個街口就係Sunday Market，不過我地見到有間好似舊式茶樓既食肆，所以走左入去食野醫肚。

我地就係響呢間舖頭飲茶，唔記得食左~RM26


好精緻(細粒)既點心


呢碗海鮮冬粉好大碗，個老闆仲要奇怪我地四個人只叫一碗！


山打根舊城區，感覺上似50-60年代既香港，婆婆話好似佢細個時咁樣！




之後先行Sunday Market，不過原來佢只係賣D衫、玩具、小食，見無咩野睇，又無野影，我地就開始周圍行。

Sunday Market

呢間就係Nak Hotel，曾經係山打根最高既建築物，及當時唯一一間酒店，係以前既一個議員起既，因為佢當時有感外賓來妨都無一間似樣既酒店有d失禮。



其實山打根都幾大，但係一般人同遊客都只係響舊城區活動，而舊城區只係2至3條街，所以正常人應該唔會迷路，就算迷路都可以問人，大家發覺果都真係超多人講廣東話，好多舖頭都係中文名，就算唔行舊城區入面搭的士都只係RM10。

行到好鬼死熱，見到有間KFC，就走左入去，入面有勁凍冷氣，買左幾杯野飲，加埋一個大薯茸俾圖圖食(佢個薯茸超級巨)，坐一陣休息一下，見就到12點集合時間，就去頭先經過既一間印度舖，買左幾塊薄餅，就返去Rose果度等車。

呢間係rose附近既印度食肆，佢d雞蛋薄餅好好味架！


不過可能圖圖瞓太少，加埋好熱，所以上到去坐一陣就瞓著左，等到司機黎到就上車，其實去Kinabatangan River要搭成3小時車，不過因為之前一晚瞓得太少，所以我地瞓足全程，一d都唔辛苦。

我地響Kinabatangan River住既地方叫Sukau Greenview B&B，比大家想像中既熱帶雨林有分別，唔多見參天古木，而且無咩蛇蟲鼠蟻，亦都算係乾淨，感覺有d似一個渡假營。Rose同我地講，因為Greenview正在修整，所以只係得基本住宿既配套，但估唔到佢upgrade左俾間有冷氣既房我地，之前因為無講過，所以都唔知有冷氣房，只知道join local tour係一般房間，所以真係唔錯！



活動時間表，到時候自己出現，逾時不候！


食飯時間


小賣部就係呢幾樣野賣


睡房完全估唔到會有冷氣！


原來今日係Rose生日，佢既一班朋友比個驚喜佢，偷偷地入黎買埋個蛋糕同佢慶祝，圖圖都分左一片，我試下一啖都幾好味，至d mousse好滑，唔太甜，我仲記低間餅舖個名叫Kelly，就響舊城區入面，大家如果去到山打根要買蛋糕都可以考慮呀！


搞掂晒D手續，入房擺好行李，已經差不多係黃昏遊河既時間，我地就準備上船出發！

後來才知道，可以加錢租蝦籠捕河蝦加餸~~~~~沒有試，實在太可惜啦！

捕蝦籠


對比起簡介上面Kinabatangan River入面既動物，我諗我地都算幾幸運，除左侏儒象同大嘴鳥，大部份動物我地都見到，我地見到紅毛猩猩、長鼻猴、長尾猴、鱷魚、大蜥蝪、King Fisher同Mangrove Snake，仲有一d媽媽認唔到既鳥類。因為所有動物都係野生，所以唔會好似動物園咁睇完一樣又一樣，每一種動物都要細心咁去搵，因為有d真係好強保護色，又好怕羞，不過淨係咁大家都已經睇到好滿足。











長鼻猴


鱷魚


大蜥蝪


我唔識佢既鵲


長尾猴+長尾猴BB

Mangrove Snake


King Fisher


落船後已經係食飯時間，餸菜雖然唔多選擇，但係估唔到有D都幾美味，響物資匱乏既地方唔可以有太高要求，其實食得飽已經叫OK。雖然選擇不多，但都ok好味，我地最鍾意佢有一味魚仔，甜甜地好香口。



食完飯天色已經全黑，今次係晚間遊河既時間，主要係睇夜間動物。夜晚只係靠個Guide枝電筒同月光睇野，所以搵動物真係幾困難，我地就只係睇到貓頭鷹同埋鱷魚，D鱷魚都好鬼竄，只係突對眼同埋個鼻出黎。個Guide好勁，離遠用電筒掃到河面有對紅色眼，就知果度有鱷魚。

雖然夜晚遊河我地唔係睇到好多動物，但因為我地只係靠月光去睇周圍環境，如果入左小河道，仲要俾樹遮埋d月光，個Guide又熄埋電筒既話真係伸手不見5指，所以都幾有趣同刺激，而且夜晚相對涼好多，所以比起下午真係舒服好多。

媽媽同圖圖講佢地就係winne the pooh入面既貓頭鷹博士


鬼竄鱷魚


之後我地就返房沖涼瞓覺，不過因為佢地沖涼無熱水，所以都幾凍，圖圖怕佢凍親唯有只同佢抺頭同抺身。

6日6夜@沙巴 Day 1 - 沙巴我黎啦

原本今日大約5點幾搭機去KK，但因為AA改左時間，出發時間再晚一點，所以要成十點幾先去到KK，十一點先checkin酒店。

今次我地試下搭巴士，唔搭機鐵，點知響佐敦果度超級塞車，所以我地都晏少少先去到機場，點知地勤話隻機會早10分鐘起飛，於是我地啦啦臨響T2食埋野，再搭2程無人駕駛，跑住去閘口，點知都已經係final call，閘口爭5分鐘就close。



真係爭d送機尾！

今次唔知點解AA會搞錯，派餐果度miss左我地，後來爸爸見唔對路，問下d空姐，佢地先知漏左，補番2個餐，另外2個淨係俾杯麵我地頂住，好在我地之前食左d野，係圖圖可憐d，我地一心諗住上機有野俾佢食，上機前佢又食左成個包，所以頭先食野唔迫佢，搞到佢餓左一陣間。

之後搭機途中，遇到氣流，玩左幾下過山車，圖圖就話好好玩，但係媽媽就嚇到手汗都出埋。

今日我地住既係Gaya Center Hotel，之後響山打根返黎KK都係住呢間。



之前有考慮過第一晚住Citiel Express，貪佢平同夠企理，反正第一晚我地瞓個鐘又要去機場坐內陸機去山打根，所以住平平地既就可以，不過後來見Gaya Center再平D，所以就決定住Gaya Center。

呢間酒店係我響Air Asia Go做promotion時訂，所以係超級抵，今晚每間房只係HK$110，已經好平，但未係最平，最平係我地由山打根返KK 13-15/7果2晚，我訂到HK$70一間房，真係激抵，仲平過住hostel。

原本我一直考慮13-15/7住STAR定係Magellan，但見到Gaya Center個價錢平到咁，真係唔住對唔住自己，所以就改左住Gaya Center。

海鹽焦糖榛子薩瓦林鬆酥

今日無出街，已經好耐無整餅，有成兩個星期啦~~~~~今次做豈能介甜既食譜，YUMMY~~~~~，我係第一次做呢個咋！婆婆話好味！

不過我做見到個食譜勁邪惡就唔敢食太多囉~~~~~！今次係我第一次玩ISOMALT！

今日仲要做多個婆婆ORDER既代糖版咖啡戚風，代糖真係發得無咁高，不過好在都鬆軟，而且比白糖版更容易徒手甩模。

上山學藝

其實呢堂已經係係第3堂呢，因為之前2堂所學做出黎既成品大家都睇唔到D咩，所以都無寫出黎，今次終於有D野睇下啦~~~~~~

其實呢個只係做左一半既裝飾，仲有好多野未整

我既第一朵糖花

啱啱舖起糖皮既樣

其實上堂其中一樣最期待既係食到RACHEL做既超好味晚餐

其實好多同學仔做得超級靚，真係見到都嘩嘩聲~~~~

搞咩鬼

嬲呀~~~~~打晒成篇野，唔知點解facebook發表唔到，之後仲要無埋~~~~好火呀~~~~~~

其實聽日先係婆婆生日，不過因為媽媽聽日要上山學藝，同婆婆切唔到蛋糕，所以決定提早一日。

因為媽媽想試新野，所以一個月前響vanlily度訂左個蛋糕，個蛋糕係榛子mousse，真係好好味呢~~~~好香榛子味，而且超級滑，究竟媽媽要點做mousse cake先可以做到咁滑?

呢個蛋糕全家一致通過比tony wong既好味呢~~~~~

冬去春來 (17白麵包)

今年冬天實在太凍，又凍得太耐，因為我個爐無發酵功能，D包包做出黎都發唔好，搞到無晒心機~~~~

終於呢2個星期暖番有15-20C，終於等到可以再做包包，唔駛再食出面果D，YEAH~~~~

過左聖誕&新年，肥左DD，要減番啦，所以唔想食有饀既包，今日做最簡單美味既白麵包，我聽朝要食厚切士多啤梨吐司做早餐，諗起已經好開心！

新年做新包17小時無花果合桃包包

見大家個個新年都開爐做新食譜，等我都做番個新既17小時包包，想做呢個包好耐，但要買齊合桃、無花果同黑粿麥粉真係唔容易！終於新年前買齊晒，琴日過完大海番黎即刻做左個中種先，今日入爐！

好多餡，但係都發得好好，好鬆軟
仲要平時唔食果仁包包既爸爸依家半夜都食左3片，婆婆平時都已經好鍾意食，我諗好快又要番兜！