申請回鄉咭+第二天上學

爸爸放假上午帶展圖豬去中旅社，下午因為爸爸約左一位攝影師食飯，所以由婆婆帶展圖豬返學，返學就爸爸同婆婆一齊接放學。

展圖豬睇黎真係好鍾意返學，到放學時唔肯走添！

第一天正式返學

今日係展圖第一日正式返學，媽媽今日放假陪展圖豬，返學前我地先去影証件相先，因為媽媽同展圖豬book左聽日去中旅社申請回鄉咭。

返到學校等左一陣，reception開門俾我地入校園範圍，嬸嬸先帶展圖去vv先，然後展圖就入課室啦！不過今日家長唔可以入課室陪小朋友啦，所以媽媽唯有響門外隔住玻璃睇，展圖豬今日返學都好開心，媽媽見佢好似響屋企玩咁，不停係咁攞玩具玩。不過展圖都好乖，玩完d玩具有時會自助自覺，有時老師叫一下就會clear up~~~~~~

今日返學都係1小時，放學後我地到攞番頭先影既証件相，同埋去快餐店食少少野，不過展圖豬真係無晒電，上一秒仲食緊媽媽既碗仔翅，下一秒竟然已經瞓著左~~~~

遊戲日@Think Kindergarden

今日係展圖豬返幼稚園既第一日，由於媽媽要做野，所以同唔到展圖豬去，不過爸爸、婆婆同姑媽都陪左展圖豬返學。

一去到學校，可能由於有遊樂場既關係，所以展圖豬已經好開心周圍玩，直至老師叫返入課室~~~~~~因為以為無得玩，所以有dd扭計，不過好快無事。

入到課室，雖然今日家長可以入課室同抱住小朋友上堂，但係大家由於想展圖快d適應，所以都係企響一邊睇 (仲要企到好埋，唔比展圖豬睇到！)，好在展圖豬好叻，適應良好 (但係好多同學仔喊) ，仲識得周圍攞玩具玩，只不過係有d坐唔定，成日走左去，要勞煩老師同助教捉番佢埋位。

放學後媽媽去稻香會合大家飲茶，其實展圖豬可能真係玩得太耐，瞓著左lu~~~~！

爸爸 & KISS

我地肯定展圖豬識叫爸爸。

 今日我同婆婆帶展圖豬去旺角會合爸爸去睇早前既驗身報告，一去到診所放低展圖豬，展圖豬見到爸爸就走過去，仲叫「爸爸」~~~~~~，之後夜晚番到屋企，又係自己走去爸爸度，叫「爸爸」，展圖豬第一個會叫既人係爸爸呢~~~~！

仲有一樣就係展圖豬呢個星期開始除左，會「呵」(面頰對面頰)我地，仲會錫我地個嘴，由於我地從來無教過展圖豬，所以一直好奇怪展圖豬響邊度學番黎，今日迷底終於揭開，我地見到展圖豬睇開ELMO教著衫既碟原來ELMO有錫入面個BB，所以應該係響呢度學番黎，雖然話同展圖豬錫錫好似唔衛生，但係真係好SWEET呀~~~~！

媽媽生日@海洋公園

因為媽今日有野做，所以十二點幾先番屋企同爸爸、婆婆&展圖豬去海洋公園，好在今日門口賣票唔駛排隊，所以好快入到去~~~~~

入到去，第一時間帶展圖豬去熊貓館，因為上次去海洋公園展圖豬睇左海洋劇場同海洋館已經無電，所以我地淨係可以同瞓著左既展圖豬去熊貓館~~~~~~

因為今日熊貓安安好合作，坐正係玻璃前面食竹葉，所以入到去熊貓館展圖豬見到安安已經嘩嘩聲好開心~~~~~既然見展圖豬開心，所以由得展圖豬睇左好耐，管埋員仲好好人幫我地影相，到展圖豬睇到肯行開時我地就去睇新既亞洲動物館，之後諗住去海洋館，但係真係太熱，所以去餐應坐一陣，買左DD野俾展圖豬食，俾D野佢飲，之後海洋劇場已經差不多到時間表演，所以我地諗住先睇海洋劇場，但係展圖豬睇睇下竟然瞓著左，所以我地決定唔再睇搭的士番屋企。

返到屋企，展圖豬又醒番，咁我地即刻同佢沖涼，再去麗港軒食飯(之前媽媽訂左枱)，因為爸爸之前一日話想食潮州野，其實我地係第一次去食呢，不過真係都幾好味~~~~尤其是個湯~~~~之後就返屋企啦！媽媽今日好開心呀，因為我地一家人都好開心呢~~~~！

生日飯@旺角稻香

大約一個月前爺爺已經訂左今日同展圖豬慶祝生日，所以媽媽已經訂左位。

今日下午爸爸帶左展圖豬去爺爺屋企玩，所以爺爺好高興~~~~~展圖豬今日都心情靚靚，二叔同女朋友都有黎呢~~~~~！不過可惜係姑媽因為病左所以黎唔到！

但係大家都滿意呢一餐呢！

屋企開party

今日屋企開lunch party，因為本來今年想要同展圖豬生日去迪士尼，但係上個月已經去左，又唔想求求其其咁過，所以想要響屋企開個小型party，請展圖豬既表哥仔同朋友仔黎，等有d小朋友同佢玩，開心下~~~~~

因為今次都係細搞，所以媽媽整左dd野食，order左個壽司~~~~~~

今日好多人黎，南叔叔、媚姨姨同佢地既囡囡熹熹、嘉煕表哥、進培表哥同薇姨仲有儀姨，仲有五姨婆同嫲嫲、大姑媽同Goldie姨and Ingrid姐姐。

媽媽同爸爸一早將已經收起左幾個月既波波池拎番出黎吹好氣，諗住俾小朋友玩~~~~結果個個小朋友真係玩得好開心，玩到大約四點幾先走，展圖豬又玩到無晒電，唔駛TUM就瞓著，媽媽見到展圖豬玩得咁開心都覺得好滿足~~~~~

學講野啦！

今日爸爸放假，響屋企陪展圖豬，媽媽就要出去做野，下午時間，爸爸sms俾媽媽，話展圖豬今日拎住個麵包，好認真咁叫「包包」~~~~~，展圖豬好似真係學講野啦！

展圖@HK Disneyland Day 2

展圖豬今日好早7點幾未夠8點就已經起左身，執好行李同梳洗後，我地一家就落酒店既米奇廚師餐應食早餐，點知因為餐廳有太多人，所以要等一陣間，媽媽就襯呢段時間check-out同埋寄存行李，諗住今日去樂園玩完先番黎攞。

等左一陣終於有得食，因為媽媽知道呢間餐廳比翠樂庭平d，同埋之前響openrice都見到不少唔太好既評語，所以都不抱任可期望，點知原來都ok，好多野揀~~~~~有中式麵、粥、不同煮法既蛋、麵包、壽司、粟米片、麥皮、沙律、煙三文魚、鬆餅~~~~~仲有幾款果汁~~~~~~本來展圖豬已經食到唔肯食，不過媽媽竟然俾個米奇窩夫佢，佢見到又好開心，仲食左dd~~~~~~原來咁細既小朋友都會見到得意賣相既食物會食多d，食完之後我地就入樂園啦！

去到樂園第一件事哽係影張全家福先~~~~~然後係去玩小飛象 (因為之前有網友話過每日十一點有米奇黎同小朋友玩呢~~~~~)，玩完之後已經好辛苦啦，因為真係好熱好晒，展圖豬熱到塊面仔都紅晒，跟住再玩施轉木馬，玩完之後真係熱到頂唔順，所以帶展圖豬去洗手間用濕手巾抺身，之後我地就開始每玩完一個game就同展圖豬抺身，等佢休息下，無咁辛苦無咁熱~~~~~~

玩到點幾鐘，實在太晒，我地入左快餐店買野飲，同買少少野俾展圖豬食，可能真係太熱，展圖豬都無咩胃口 (已經係佢鍾意既包包)，仲要坐坐下瞓著左，瞓左個幾鐘，然後再玩過，再玩多一兩個game，太約4點幾，爸爸就番酒店攞行李，媽媽同展圖豬行多一陣gift shop，買左個八達通套俾展圖豬，就去地鐵站同爸爸會合。

返到屋企已經5點幾6點，我地都攰到死左咁滯，好在婆婆幫展圖豬沖涼，然後食埋飯就休息啦~~~~~

展圖@HK Disneyland Day 1

今朝一早起身媽媽同爸爸就超忙，因為要執野入Disneyland，因為早兩個星期媽媽上網睇到有迪士尼既2日1夜promotion，所以就啦啦臨訂左，諗住同展圖豬去玩2日，因為大家都知道我屋企同迪士尼有一段距離，如果要即日來回一定玩得好少野，同展圖豬一定超辛苦。

朝早得展圖豬起身，落樓下飲完茶10點幾就出發啦！

媽媽同爸爸都係第一次黎香港既迪士尼，原來車站都幾靚呀~~~~~

到左迪士尼首先坐shuttle bus去Hollywood酒店做pre check-in先，原來都幾多人喎~~~~

跟住因為要3點先攞到房，所以我地就響酒店既花園周圍行同影下相，跟住天氣實在太熱，所以入番酒店既禮品店，展圖豬揀左一個玩具風扇同一架搖控車(其實展圖豬樣樣都攞，真係唔知係媽媽同爸爸揀，定係展圖豬揀？)。然後我地又同展圖豬去左兒童遊戲室玩一陣，再去快餐店度買左杯奶同比D包展圖豬食。

響快餐店入店仲發生左一件不幸既事件，事緣爸爸今次俾展圖豬坐大人坐位，媽媽已經覺得有D危險，因為呢張大人椅後面係有一大個洞，媽媽見到時已經心諗展圖豬會唔會跌落去~~~~~但係因為留意左一陣，覺得展圖豬都坐得幾定，所以就算數，點知展圖豬坐坐下突間跣左落個洞度click住左，仲爭d跌落地，即時嚇下大叫~~~~~~~好在媽媽同爸爸都快手接住，所以都無損傷，不過係嚇親dd~~~~~

之後我地就去攞房啦~~~~~！雖然之前媽媽已經同酒店講左要大床房，諗住可以爸爸同媽媽可以一左右夾住展圖豬瞓，唔驚佢跌落床，但係酒店話因為太多人request所以無，好左佢地都會同我上番個床欄(不過個床欄好鬼矮，聊勝於無！)。

因為第2日就係父親節，所以酒店擺左個小禮物響樹送俾爸爸既~~~~~其實見到呢個禮物媽媽先記得第2日係父親節呢~~~~~！原本媽媽諗住同展圖豬游一陣水，不過見展圖豬有d攰，所以俾展圖豬瞓番個靚覺先，豬仔可能因為之前響花園時曬到個人攰晒，好快就瞓著啦！

到6點幾展圖豬終於醒左，媽媽即刻同佢浸浴，然後換衫去樂園睇煙花~~~~~~！

響城堡前睇既煙花真係好靚，不過可能展圖豬第一次睇，有dd驚，不過無叫，係一路抱住媽媽一路好好奇咁睇，真係好可愛呀~~~~~~

之後我地一家響城堡前影一張相，就去迪士尼既另一間酒店既餐廳翠樂庭食buffet啦~~~~~~！

一去到展圖豬已經好開心，因為呢度有3個卡通人物響度同每枱影相~~~~~~展圖豬一見到每個character都好開心，猛咁用手搞Mickey同Minnie個鼻，仲要同跳跳虎hi-5~~~~~~之後Minnie行過，仲做手勢叫Minnie過黎~~~~~~(展圖豬之前從來未試過嫁！)超開心。仲要食左好多野，食左中式麵、黑魚汁麵、pizza、好多熱盤，仲要食左爸爸1/4碟甜品~~~~~~

之後我地響酒店影一陣相就番房沖涼同瞓覺~~~~~~~~

展圖豬好乖，唔駛tum就瞓著左

點知~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~到左半夜3點展圖豬竟然醒左，本來媽媽擔心佢認陌生地方，會驚，但係佢竟然好開心咁指住房入面既Mickey & Minnie擺設，仲要好開心咁行黎行去~~~~~~好在之後擺番佢落床都係乖乖瞓覺！